ปัญหาวาร

๔๘๑ปีติสหคโต ธมฺโม ปีติสหคตสฺส ธมฺมสฺส เหตุปจฺจเยน ปจฺจโย ปีติสหคตา เหตู สมฺปยุตฺตกานํ ขนฺธานํ เหตุปจฺจเยน ปจฺจโย ปฏิสนฺธิกฺขเณ ปีติสหคตา เหตู สมฺปยุตฺตกานํ ขนฺธานํ เหตุปจฺจเยน ปจฺจโย ฯ

๔๘๒ปีติสหคโต ธมฺโม สุขสหคตสฺส ธมฺมสฺส เหตุปจฺจเยน ปจฺจโย ปีติสหคตา เหตู สมฺปยุตฺตกานํ สุขสหคตานํ ขนฺธานํ เหตุปจฺจเยน ปจฺจโย ปฏิสนฺธิกฺขเณ ... ฯ

๔๘๓ปีติสหคโต ธมฺโม ปีติสหคตสฺส จ สุขสหคตสฺส จ ธมฺมสฺส เหตุปจฺจเยน ปจฺจโย ปีติสหคตา เหตู สมฺปยุตฺตกานํ ปีติสหคตานญฺจ สุขสหคตานญฺจ ขนฺธานํ เหตุปจฺจเยน ปจฺจโย ปฏิสนฺธิกฺขเณ ... ฯ

๔๘๔สุขสหคโต ธมฺโม สุขสหคตสฺส ธมฺมสฺส ... ปีติสหคตสฺส ธมฺมสฺส ... ปีติสหคตสฺส จ สุขสหคตสฺส จ ธมฺมสฺส ... สุขมูเล ตีณิ ฯ

๔๘๕อุเปกฺขาสหคโต ธมฺโม อุเปกฺขาสหคตสฺส ธมฺมสฺส เหตุปจฺจเยน ปจฺจโย อุเปกฺขาสหคตา เหตู สมฺปยุตฺตกานํ ขนฺธานํ เหตุปจฺจเยน ปจฺจโย ปฏิสนฺธิกฺขเณ ... ฯ

๔๘๖ปีติสหคโต จ สุขสหคโต จ ธมฺมา ปีติสหคตสฺส ธมฺมสฺส ... สุขสหคตสฺส ธมฺมสฺส ... ปีติสหคตสฺส จ สุขสหคตสฺส จ ธมฺมสฺส เหตุปจฺจเยน ปจฺจโย ปีติสหคตา จ สุขสหคตา จ เหตู สมฺปยุตฺตกานํ ปีติสหคตานญฺจ สุขสหคตานญฺจ ขนฺธานํ เหตุปจฺจเยน ปจฺจโย ปฏิสนฺธิกฺขเณ ... ฯ

๔๘๗ปีติสหคโต ธมฺโม ปีติสหคตสฺส ธมฺมสฺส อารมฺมณปจฺจเยน ปจฺจโย ปีติสหคเตน จิตฺเตน ทานํ ทตฺวา สีลํ สมาทิยิตฺวา อุโปสถกมฺมํ กตฺวา ตํ ปีติสหคเตน จิตฺเตน ปจฺจเวกฺขติ ปีติสหคตา ฌานา วุฏฺฐหิตฺวา มคฺคา วุฏฺฐหิตฺวา ผลา วุฏฺฐหิตฺวา ตํ ปีติสหคเตน จิตฺเตน ปจฺจเวกฺขติ อริยา ปีติสหคเตน จิตฺเตน ปีติสหคเต ปหีเน กิเลเส ปจฺจเวกฺขนฺติ วิกฺขมฺภิเต กิเลเส ปจฺจเวกฺขนฺติ ปุพฺเพ สมุทาจิณฺเณ กิเลเส ชานนฺติ ปีติสหคเต ขนฺเธ ปีติสหคเตน จิตฺเตน อนิจฺจโต ทุกฺขโต อนตฺตโต วิปสฺสนฺติ อสฺสาเทนฺติ อภินนฺทนฺติ ตํ อารพฺภ ปีติสหคโต ราโค อุปฺปชฺชติ ทิฏฺฐิ อุปฺปชฺชติ ปีติสหคเต ขนฺเธ อารพฺภ ปีติสหคตา ขนฺธา อุปฺปชฺชนฺติ ฯ

๔๘๘ปีติสหคโต ธมฺโม สุขสหคตสฺส ธมฺมสฺส อารมฺมณปจฺจเยน ปจฺจโย ปีติสหคเตน จิตฺเตน ทานํ ทตฺวา สีลํ สมาทิยิตฺวา อุโปสถกมฺมํ กตฺวา ตํ สุขสหคเตน จิตฺเตน ปจฺจเวกฺขติ ปีติสหคตา ฌานา วุฏฺฐหิตฺวา มคฺคา วุฏฺฐหิตฺวา ผลา วุฏฺฐหิตฺวา ตํ สุขสหคเตน จิตฺเตน ปจฺจเวกฺขติ อริยา สุขสหคเตน จิตฺเตน ปีติสหคเต ปหีเน กิเลเส ปจฺจเวกฺขนฺติ วิกฺขมฺภิเต กิเลเส ปจฺจเวกฺขนฺติ ปุพฺเพ สมุทาจิณฺเณ กิเลเส ชานนฺติ ปีติสหคเต ขนฺเธ สุขสหคเตน จิตฺเตน อนิจฺจโต ทุกฺขโต อนตฺตโต วิปสฺสนฺติ อสฺสาเทนฺติ อภินนฺทนฺติ ตํ อารพฺภ สุขสหคโต ราโค อุปฺปชฺชติ ทิฏฺฐิ อุปฺปชฺชติ ปีติสหคเต ขนฺเธ อารพฺภ สุขสหคตา ขนฺธา อุปฺปชฺชนฺติ ฯ

๔๘๙ปีติสหคโต ธมฺโม อุเปกฺขาสหคตสฺส ธมฺมสฺส อารมฺมณปจฺจเยน ปจฺจโย ปีติสหคเตน จิตฺเตน ทานํ ทตฺวา สีลํ สมาทิยิตฺวา อุโปสถกมฺมํ กตฺวา ตํ อุเปกฺขาสหคเตน จิตฺเตน ปจฺจเวกฺขติ ปีติสหคตา ฌานา วุฏฺฐหิตฺวา มคฺคา วุฏฺฐหิตฺวา ผลา วุฏฺฐหิตฺวา ตํ อุเปกฺขาสหคเตน จิตฺเตน ปจฺจเวกฺขติ อริยา อุเปกฺขาสหคเตน จิตฺเตน ปีติสหคเต ปหีเน กิเลเส ปจฺจเวกฺขนฺติ วิกฺขมฺภิเต กิเลเส ปจฺจเวกฺขนฺติ ปุพฺเพ สมุทาจิณฺเณ กิเลเส ชานนฺติ ปีติสหคเต ขนฺเธ อุเปกฺขาสหคเตน จิตฺเตน อนิจฺจโต ทุกฺขโต อนตฺตโต วิปสฺสนฺติ อสฺสาเทนฺติ อภินนฺทนฺติ ตํ อารพฺภ อุเปกฺขาสหคโต ราโค อุปฺปชฺชติ ทิฏฺฐิ อุปฺปชฺชติ วิจิกิจฺฉา อุปฺปชฺชติ อุทฺธจฺจํ อุปฺปชฺชติ เจโตปริยญาเณน ปีติสหคต- จิตฺตสมงฺคิสฺส จิตฺตํ ชานนฺติ ปีติสหคตา ขนฺธา เจโตปริยญาณสฺส ปุพฺเพนิวาสานุสฺสติญาณสฺส ยถากมฺมูปคญาณสฺส อนาคตํสญาณสฺส อาวชฺชนาย อารมฺมณปจฺจเยน ปจฺจโย ปีติสหคเต ขนฺเธ อารพฺภ อุเปกฺขาสหคตา ขนฺธา อุปฺปชฺชนฺติ ฯ

๔๙๐ปีติสหคโต ธมฺโม ปีติสหคตสฺส จ สุขสหคตสฺส จ ธมฺมสฺส อารมฺมณปจฺจเยน ปจฺจโย ปีติสหคเตน จิตฺเตน ทานํ ทตฺวา สีลํ ... อุโปสถกมฺมํ กตฺวา ตํ ปีติสหคเตน จ สุขสหคเตน จ จิตฺเตน ปจฺจเวกฺขติ ปีติสหคตา ฌานา วุฏฺฐหิตฺวา มคฺคา วุฏฺฐหิตฺวา ผลา วุฏฺฐหิตฺวา ตํ ปีติสหคเตน จ สุขสหคเตน จ จิตฺเตน ปจฺจเวกฺขติ อริยา ปีติสหคเตน จ สุขสหคเตน จ จิตฺเตน ปีติสหคตํ ปหีนํ กิเลสํ ปจฺจเวกฺขนฺติ วิกฺขมฺภิตํ กิเลสํ ปจฺจเวกฺขนฺติ ปุพฺเพ สมุทาจิณฺเณ กิเลเส ชานนฺติ ปีติสหคเต ขนฺเธ ปีติสหคเตน จ สุขสหคเตน จ จิตฺเตน อนิจฺจโต ทุกฺขโต อนตฺตโต วิปสฺสนฺติ อสฺสาเทนฺติ อภินนฺทนฺติ ตํ อารพฺภ ปีติสหคโต จ สุขสหคโต จ ราโค อุปฺปชฺชติ ทิฏฺฐิ อุปฺปชฺชติ ปีติสหคเต ขนฺเธ อารพฺภ ปีติสหคตา จ สุขสหคตา จ ขนฺธา อุปฺปชฺชนฺติ ฯ

๔๙๑สุขสหคโต ธมฺโม สุขสหคตสฺส ธมฺมสฺส อารมฺมณปจฺจเยน ปจฺจโย ฯ สุขสหคโต ธมฺโม ปีติสหคตสฺส ธมฺมสฺส ... อุเปกฺขาสหคตสฺส ธมฺมสฺส ... ปีติสหคตสฺส จ สุขหคตสฺส จ ธมฺมสฺส อารมฺมณปจฺจเยน ปจฺจโย สุขสหคเต ขนฺเธ อารพฺภ ปีติสหคตา จ สุขสหคตา จ ขนฺธา อุปฺปชฺชนฺติ ฯ

๔๙๒อุเปกฺขาสหคโต ธมฺโม อุเปกฺขาสหคตสฺส ธมฺมสฺส อารมฺมณปจฺจเยน ปจฺจโย อุเปกฺขาสหคเตน จิตฺเตน ทานํ ทตฺวา สีลํ สมาทิยิตฺวา อุโปสถกมฺมํ กตฺวา ตํ อุเปกฺขาสหคเตน จิตฺเตน ปจฺจเวกฺขนฺติ อุเปกฺขาสหคตา ฌานา ... มคฺคา ... ผลา วุฏฺฐหิตฺวา ตํ อุเปกฺขาสหคเตน จิตฺเตน ปจฺจเวกฺขติ อริยา อุเปกฺขาสหคเตน จิตฺเตน อุเปกฺขาสหคตํ ปหีนํ กิเลสํ ปจฺจเวกฺขนฺติ วิกฺขมฺภิตํ กิเลสํ ปจฺจเวกฺขนฺติ ปุพฺเพ สมุทาจิณฺเณ กิเลเส ชานนฺติ อุเปกฺขาสหคเต ขนฺเธ อุเปกฺขาสหคเตน จิตฺเตน อนิจฺจโต ทุกฺขโต อนตฺตโต วิปสฺสนฺติ อสฺสาเทนฺติ อภินนฺทนฺติ ตํ อารพฺภ อุเปกฺขาสหคโต ราโค อุปฺปชฺชติ ทิฏฺฐิ อุปฺปชฺชติ วิจิกิจฺฉา อุปฺปชฺชติ อุทฺธจฺจํ อุปฺปชฺชติ เจโตปริยญาเณน อุเปกฺขาสคต- จิตฺตสมงฺคิสฺส จิตฺตํ ชานาติ อากาสานญฺจายตนํ วิญฺญาณญฺจายตนสฺส อารมฺมณปจฺจเยน ปจฺจโย อากิญฺจญฺญายตนํ เนวสญฺญา- นาสญฺญายตนสฺส อารมฺมณปจฺจเยน ปจฺจโย อุเปกฺขาสหคตา ขนฺธา อิทฺธิวิธญาณสฺส เจโตปริยญาณสฺส ปุพฺเพนิวาสานุสฺสติ- ญาณสฺส ยถากมฺมูปคญาณสฺส อนาคตํสญาณสฺส อาวชฺชนาย อารมฺมณปจฺจเยน ปจฺจโย อุเปกฺขาสหคเต ขนฺเธ อารพฺภ อุเปกฺขาสหคตา ขนฺธา อุปฺปชฺชนฺติ ฯ

๔๙๓อุเปกฺขาสหคโต ธมฺโม ปีติสหคตสฺส ธมฺมสฺส ... สุขสหคตสฺส ธมฺมสฺส ... ปีติสหคตสฺส จ สุขสหคตสฺส จ ธมฺมสฺส อารมฺมณปจฺจเยน ปจฺจโย อุเปกฺขาสหคเตน จิตฺเตน ทานํ ทตฺวา สีลํ สมาทิยิตฺวา อุโปสถกมฺมํ กตฺวา ตํ ปีติสหคเตน จ สุขสหคเตน จ จิตฺเตน ปจฺจเวกฺขติ อุเปกฺขาสหคตา ฌานา วุฏฺฐหิตฺวา มคฺคา วุฏฺฐหิตฺวา ผลา วุฏฺฐหิตฺวา ตํ ปีติสหคเตน จ สุขสหคเตน จ จิตฺเตน ปจฺจเวกฺขติ อริยา ปีติสหคเตน จ สุขสหคเตน จ จิตฺเตน อุเปกฺขาสหคตํ ปหีนํ กิเลสํ ปจฺจเวกฺขนฺติ วิกฺขมฺภิตํ กิเลสํ ปจฺจเวกฺขนฺติ ปุพฺเพ สมุทาจิณฺเณ กิเลเส ชานนฺติ อุเปกฺขาสหคเต ขนฺเธ ปีติสหคเตน จ สุขสหคเตน จ จิตฺเตน อนิจฺจโต ทุกฺขโต อนตฺตโต วิปสฺสนฺติ อสฺสาเทนฺติ อภินนฺทนฺติ ตํ อารพฺภ ปีติสหคโต จ สุขสหคโต จ ราโค อุปฺปชฺชติ ทิฏฺฐิ อุปฺปชฺชติ อุเปกฺขาสหคเต ขนฺเธ อารพฺภ ปีติสหคตา จ สุขสหคตา จ ขนฺธา อุปฺปชฺชนฺติ ฯ

๔๙๔ปีติสหคโต จ สุขสหคโต จ ธมฺมา ปีติสหคตสฺส ธมฺมสฺส ... สุขสหคตสฺส ธมฺมสฺส ... อุเปกฺขาสหคตสฺส ธมฺมสฺส อารมฺมณปจฺจเยน ปจฺจโย ปีติสหคเตน จ สุขสหคเตน จ จิตฺเตน ทานํ ทตฺวา สีลํ สมาทิยิตฺวา อุโปสถกมฺมํ กตฺวา ปีติสหคเต จ สุขสหคเต จ ขนฺเธ อุเปกฺขาสหคเตน จิตฺเตน อนิจฺจโต ทุกฺขโต อนตฺตโต วิปสฺสติ อสฺสาเทติ อภินนฺทติ ตํ อารพฺภ อุเปกฺขาสหคโต ราโค อุปฺปชฺชติ ทิฏฺฐิ ... วิจิกิจฺฉา ... อุทฺธจฺจํ อุปฺปชฺชติ เจโตปริยญาเณน ปีติสหคตสุขสหคตจิตฺตสมงฺคิสฺส จิตฺตํ ชานาติ ปีติสหคตา จ สุขสหคตา จ ขนฺธา เจโตปริยญาณสฺส ปุพฺเพนิวาสานุสฺสติญาณสฺส ยถากมฺมูปคญาณสฺส อนาคตํสญาณสฺส อาวชฺชนาย อารมฺมณปจฺจเยน ปจฺจโย ปีติสหคเต จ สุขสหคเต จ ขนฺเธ อารพฺภ อุเปกฺขาสหคตา ขนฺธา อุปฺปชฺชนฺติ ฯ

๔๙๕ปีติสหคโต จ สุขสหคโต จ ธมฺมา ปีติสหคตสฺส จ สุขสหคตสฺส จ ธมฺมสฺส อารมฺมณปจฺจเยน ปจฺจโย ฯ สงฺขิตฺตํ ฯ

๔๙๖ปีติสหคโต ธมฺโม ปีติสหคตสฺส ธมฺมสฺส อธิปติปจฺจเยน ปจฺจโย อารมฺมณาธิปติ สหชาตาธิปติ ฯ อารมฺมณาธิปติ: ปีติสหคเตน จิตฺเตน ทานํ ทตฺวา สีลํ สมาทิยิตฺวา อุโปสถกมฺมํ กตฺวา ปีติสหคเตน จิตฺเตน ตํ ครุํ กตฺวา ปจฺจเวกฺขติ ปีติสหคตา ฌานา วุฏฺฐหิตฺวา มคฺคา วุฏฺฐหิตฺวา ผลา วุฏฺฐหิตฺวา ปีติสหคเตน จิตฺเตน ตํ ครุํ กตฺวา ปจฺจเวกฺขติ ปีติสหคเต ขนฺเธ ปีติสหคเตน จิตฺเตน ครุํ กตฺวา อสฺสาเทติ อภินนฺทติ ตํ ครุํ กตฺวา ปีติสหคโต ราโค อุปฺปชฺชติ ทิฏฺฐิ อุปฺปชฺชติ ฯ สหชาตาธิปติ: ปีติสหคตาธิปติ สมฺปยุตฺตกานํ ขนฺธานํ อธิปติปจฺจเยน ปจฺจโย ฯ

๔๙๗ปีติสหคโต ธมฺโม สุขสหคตสฺส ธมฺมสฺส อธิปติปจฺจเยน ปจฺจโย อารมฺมณาธิปติ สหชาตาธิปติ ฯ อารมฺมณาธิปติ: ปีติสหคเตน ฯเปฯ สหชาตาธิปติ: ปีติสหคตาธิปติ สมฺปยุตฺตกานํ สุขสหคตานํ ขนฺธานํ อธิปติปจฺจเยน ปจฺจโย ฯ

๔๙๘ปีติสหคโต ธมฺโม อุเปกฺขาสหคตสฺส ธมฺมสฺส อธิปติปจฺจเยน ปจฺจโย ฯ อารมฺมณาธิปติ: ปีติสหคเตน จิตฺเตน ทานํ ทตฺวา อุเปกฺขาสหคเตน จิตฺเตน ฯ สงฺขิตฺตํ ฯ

๔๙๙ปีติสหคโต ธมฺโม ปีติสหคตสฺส จ สุขสหคตสฺส จ ธมฺมสฺส อธิปติปจฺจเยน ปจฺจโย อารมฺมณาธิปติ สหชาตาธิปติ ฯ อารมฺมณาธิปติ: ปีติสหคเตน ฯเปฯ สหชาตาธิปติ: ปีติสหคตาธิปติ สมฺปยุตฺตกานํ ปีติสหคตานญฺจ สุขสหคตานญฺจ ขนฺธานํ อธิปติปจฺจเยน ปจฺจโย ฯ

๕๐๐สุขสหคโต ธมฺโม สุขสหคตสฺส ธมฺมสฺส อธิปติปจฺจเยน ปจฺจโย อารมฺมณาธิปติ สหชาตาธิปติ ฯ อารมฺมณาธิปติ: สุขสหคเตน ฯเปฯ สงฺขิตฺตํ ฯ สหชาตาธิปติ: สุขสหคตาธิปติ สมฺปยุตฺตกานํ ขนฺธานํ อธิปติปจฺจเยน ปจฺจโย ฯ

๕๐๑สุขสหคโต ธมฺโม ปีติสหคตสฺส ธมฺมสฺส อธิปติปจฺจเยน ปจฺจโย อารมฺมณาธิปติ สหชาตาธิปติ ฯ สงฺขิตฺตํ ฯ สหชาตาธิปติ: สุขสหคตาธิปติ สมฺปยุตฺตกานํ ปีติสหคตานํ ขนฺธานํ อธิปติปจฺจเยน ปจฺจโย ฯ

๕๐๒สุขสหคโต ธมฺโม อุเปกฺขาสหคตสฺส ธมฺมสฺส อธิปติปจฺจเยน ปจฺจโย ฯ อารมฺมณาธิปติ: ฯ สงฺขิตฺตํ ฯ

๕๐๓สุขสหคโต ธมฺโม ปีติสหคตสฺส จ สุขสหคตสฺส จ ธมฺมสฺส อธิปติปจฺจเยน ปจฺจโย อารมฺมณาธิปติ สหชาตาธิปติ ฯ สงฺขิตฺตํ ฯ สหชาตาธิปติ: สุขสหคตาธิปติ สมฺปยุตฺตกานํ ปีติสหคตานญฺจ สุขสหคตานญฺจ ขนฺธานํ อธิปติปจฺจเยน ปจฺจโย ฯ

๕๐๔อุเปกฺขาสหคโต ธมฺโม อุเปกฺขาสหคตสฺส ธมฺมสฺส อธิปติปจฺจเยน ปจฺจโย อารมฺมณาธิปติ สหชาตาธิปติ ฯ สงฺขิตฺตํ ฯ สหชาตาธิปติ: อุเปกฺขาสหคตาธิปติ สมฺปยุตฺตกานํ ขนฺธานํ อธิปติปจฺจเยน ปจฺจโย ฯ

๕๐๕อุเปกฺขาสหคโต ธมฺโม ปีติสหคตสฺส ธมฺมสฺส อธิปติปจฺจเยน ปจฺจโย ฯ อารมฺมณาธิปติ: ฯ สงฺขิตฺตํ ฯ อุเปกฺขาสหคโต ธมฺโม สุขสหคตสฺส ธมฺมสฺส อธิปติปจฺจเยน ปจฺจโย ฯ อารมฺมณาธิปติ: ฯ สงฺขิตฺตํ ฯ

๕๐๖อุเปกฺขาสหคโต ธมฺโม ปีติสหคตสฺส จ สุขสหคตสฺส จ ธมฺมสฺส อธิปติปจฺจเยน ปจฺจโย ฯ อารมฺมณาธิปติ: ฯ สงฺขิตฺตํ ฯ

๕๐๗ปีติสหคโต จ สุขสหคโต จ ธมฺมา ปีติสหคตสฺส ธมฺมสฺส อธิปติปจฺจเยน ปจฺจโย อารมฺมณาธิปติ สหชาตาธิปติ ฯเปฯ สหชาตาธิปติ: ปีติสหคตา จ สุขสหคตา จ อธิปติ สมฺปยุตฺตกานํ ปีติสหคตานํ ขนฺธานํ อธิปติปจฺจเยน ปจฺจโย ฯ

๕๐๘ปีติสหคโต จ สุขสหคโต จ ธมฺมา สุขสหคตสฺส ธมฺมสฺส อธิปติปจฺจเยน ปจฺจโย อารมฺมณาธิปติ สหชาตาธิปติ ฯ สงฺขิตฺตํ ฯ สหชาตาธิปติ: ปีติสหคตา จ สุขสหคตา จ อธิปติ สมฺปยุตฺตกานํ สุขสหคตานํ ขนฺธานํ อธิปติปจฺจเยน ปจฺจโย ฯ

๕๐๙ปีติสหคโต จ สุขสหคโต จ ธมฺมา อุเปกฺขาสหคตสฺส ธมฺมสฺส อธิปติปจฺจเยน ปจฺจโย ฯ อารมฺมณาธิปติ: ฯ สงฺขิตฺตํ ฯ

๕๑๐ปีติสหคโต จ สุขสหคโต จ ธมฺมา ปีติสหคตสฺส จ สุขสหคตสฺส จ ธมฺมสฺส อธิปติปจฺจเยน ปจฺจโย อารมฺมณาธิปติ สหชาตาธิปติ ฯ อารมฺมณาธิปติ: ฯเปฯ สหชาตาธิปติ: ปีติสหคตา จ สุขสหคตา จ อธิปติ สมฺปยุตฺตกานํ ปีติสหคตานญฺจ สุขสหคตานญฺจ ขนฺธานํ อธิปติปจฺจเยน ปจฺจโย ฯ

๕๑๑ปีติสหคโต ธมฺโม ปีติสหคตสฺส ธมฺมสฺส อนนฺตรปจฺจเยน ปจฺจโย ปุริมา ปุริมา ปีติสหคตา ขนฺธา ปจฺฉิมานํ ปจฺฉิมานํ ปีติสหคตานํ ขนฺธานํ อนนฺตรปจฺจเยน ปจฺจโย ปีติสหคตํ อนุโลมํ โคตฺรภุสฺส อนนฺตรปจฺจเยน ปจฺจโย ฯ อิมินา การเณน สพฺเพสํ ปทานํ ปจฺจโยติ ทีเปตพฺพํ ฯ อนุโลมํ โวทานสฺส โคตฺรภุ มคฺคสฺส โวทานํ มคฺคสฺส มคฺโค ผลสฺส ผลํ ผลสฺส อนุโลมํ ปีติสหคตาย ผลสมาปตฺติยา อนนฺตรปจฺจเยน ปจฺจโย ฯ

๕๑๒ปีติสหคโต ธมฺโม สุขสหคตสฺส ธมฺมสฺส อนนฺตรปจฺจเยน ปจฺจโย ปุริมา ปุริมา ปีติสหคตา ขนฺธา ปจฺฉิมานํ ปจฺฉิมานํ สุขสหคตานํ ขนฺธานํ อนนฺตรปจฺจเยน ปจฺจโย ปีติสหคตํ อนุโลมํ สุขสหคตสฺส โคตฺรภุสฺส อนนฺตรปจฺจเยน ปจฺจโย ปีติสหคตํ อนุโลมํ สุขสหคตสฺส โวทานสฺส ฯ สงฺขิตฺตํ ฯ ปีติสหคตํ อนุโลมํ สุขสหคตาย ผลสมาปตฺติยา อนนฺตรปจฺจเยน ปจฺจโย ฯ

๕๑๓ปีติสหคโต ธมฺโม อุเปกฺขาสหคตสฺส ธมฺมสฺส อนนฺตรปจฺจเยน ปจฺจโย ปีติสหคตํ จุติจิตฺตํ อุเปกฺขาสหคตสฺส อุปปตฺติจิตฺตสฺส อนนฺตรปจฺจเยน ปจฺจโย ปีติสหคตํ ภวงฺคํ อาวชฺชนาย อนนฺตรปจฺจเยน ปจฺจโย ปีติสหคตา วิปากมโน- วิญฺญาณธาตุ กิริยามโนวิญฺญาณธาตุยา อนนฺตรปจฺจเยน ปจฺจโย ปีติสหคตํ ภวงฺคํ อุเปกฺขาสหคตสฺส ภวงฺคสฺส อนนฺตรปจฺจเยน ปจฺจโย ปีติสหคตํ กุสลากุสลํ อุเปกฺขาสหคตสฺส วุฏฺฐานสฺส กิริยํ วุฏฺฐานสฺส ผลํ วุฏฺฐานสฺส อนนฺตรปจฺจเยน ปจฺจโย ฯ

๕๑๔ปีติสหคโต ธมฺโม ปีติสหคตสฺส จ สุขสหคตสฺส จ ธมฺมสฺส อนนฺตรปจฺจเยน ปจฺจโย ปุริมา ปุริมา ปีติสหคตา ขนฺธา ปจฺฉิมานํ ปจฺฉิมานํ ปีติสหคตานญฺจ สุขสหคตานญฺจ ขนฺธานํ อนนฺตรปจฺจเยน ปจฺจโย ปีติสหคตํ อนุโลมํ ปีติสหคตสฺส จ สุขสหคตสฺส จ โคตฺรภุสฺส อนนฺตรปจฺจเยน ปจฺจโย ฯ สงฺขิตฺตํ ฯ ปีติสหคตํ อนุโลมํ ปีติสหคตาย จ สุขสหคตาย จ ผลสมาปตฺติยา อนนฺตรปจฺจเยน ปจฺจโย ฯ

๕๑๕สุขสหคโต ธมฺโม สุขสหคตสฺส ธมฺมสฺส อนนฺตรปจฺจเยน ปจฺจโย ปุริมา ปุริมา สุขสหคตา ขนฺธา ปจฺฉิมานํ ปจฺฉิมานํ สุขสหคตานํ ขนฺธานํ อนนฺตรปจฺจเยน ปจฺจโย สุขสหคตํ อนุโลมํ สุขสหคตสฺส โคตฺรภุสฺส อนนฺตรปจฺจเยน ปจฺจโย ฯ สงฺขิตฺตํ ฯ สุขสหคตํ อนุโลมํ สุขสหคตาย ผลสมาปตฺติยา อนนฺตรปจฺจเยน ปจฺจโย ฯ

๕๑๖สุขสหคโต ธมฺโม ปีติสหคตสฺส ธมฺมสฺส อนนฺตรปจฺจเยน ปจฺจโย ปุริมา ปุริมา สุขสหคตา ขนฺธา ปจฺฉิมานํ ปจฺฉิมานํ ปีติสหคตานํ ขนฺธานํ ฯ สงฺขิตฺตํ ฯ สุขสหคตํ อนุโลมํ ปีติสหคตาย ผลสมาปตฺติยา อนนฺตรปจฺจเยน ปจฺจโย ฯ

๕๑๗สุขสหคโต ธมฺโม อุเปกฺขาสหคตสฺส ธมฺมสฺส อนนฺตรปจฺจเยน ปจฺจโย สุขสหคตํ จุติจิตฺตํ อุเปกฺขาสหคตสฺส อุปปตฺติจิตฺตสฺส อนนฺตรปจฺจเยน ปจฺจโย สุขสหคตํ ภวงฺคํ อาวชฺชนาย อนนฺตรปจฺจเยน ปจฺจโย สุขสหคตํ กายวิญฺญาณํ วิปากมโนธาตุยา อนนฺตรปจฺจเยน ปจฺจโย สุขสหคตา วิปากมโนวิญฺญาณธาตุ กิริยามโนวิญฺญาณธาตุยา อนนฺตรปจฺจเยน ปจฺจโย สุขสหคตํ ภวงฺคํ อุเปกฺขาสหคตสฺส ภวงฺคสฺส อนนฺตรปจฺจเยน ปจฺจโย สุขสหคตํ กุสลากุสลํ อุเปกฺขาสหคตสฺส วุฏฺฐานสฺส กิริยํ วุฏฺฐานสฺส ผลํ วุฏฺฐานสฺส อนนฺตรปจฺจเยน ปจฺจโย ฯ

๕๑๘สุขสหคโต ธมฺโม ปีติสหคตสฺส จ สุขสหคตสฺส จ ธมฺมสฺส อนนฺตรปจฺจเยน ปจฺจโย ปุริมา ปุริมา สุขสหคตา ขนฺธา ปจฺฉิมานํ ปจฺฉิมานํ ปีติสหคตานญฺจ สุขสหคตานญฺจ ขนฺธานํ ฯ สงฺขิตฺตํ ฯ สุขสหคตํ อนุโลมํ ปีติสหคตาย จ สุขสหคตาย จ ผลสมาปตฺติยา อนนฺตรปจฺจเยน ปจฺจโย ฯ

๕๑๙อุเปกฺขาสหคโต ธมฺโม อุเปกฺขาสหคตสฺส ธมฺมสฺส อนนฺตรปจฺจเยน ปจฺจโย อาวชฺชนา ปญฺจนฺนํ วิญฺญาณานํ อนนฺตรปจฺจเยน ปจฺจโย ปุริมา ปุริมา อุเปกฺขาสหคตา ขนฺธา ปจฺฉิมานํ ปจฺฉิมานํ อุเปกฺขาสหคตานํ ขนฺธานํ ฯ สงฺขิตฺตํ ฯ อุเปกฺขาสหคตํ อนุโลมํ อุเปกฺขาสหคตาย ผลสมาปตฺติยา นิโรธา วุฏฺฐหนฺตสฺส เนวสญฺญานาสญฺญายตนํ อุเปกฺขาสหคตาย ผลสมาปตฺติยา อนนฺตรปจฺจเยน ปจฺจโย ฯ

๕๒๐อุเปกฺขาสหคโต ธมฺโม ปีติสหคตสฺส ธมฺมสฺส อนนฺตรปจฺจเยน ปจฺจโย อุเปกฺขาสหคตํ จุติจิตฺตํ ปีติสหคตสฺส อุปปตฺติจิตฺตสฺส อาวชฺชนา ปีติสหคตานํ ขนฺธานํ วิปากมโนธาตุ ปีติสหคตาย วิปากมโนวิญฺญาณธาตุยา อุเปกฺขาสหคตํ ภวงฺคํ ปีติสหคตสฺส ภวงฺคสฺส อุเปกฺขาสหคตํ กุสลากุสลํ ปีติสหคตสฺส วุฏฺฐานสฺส กิริยํ วุฏฺฐานสฺส ผลํ วุฏฺฐานสฺส นิโรธา วุฏฺฐหนฺตสฺส เนวสญฺญานาสญฺญายตนํ ปีติสหคตาย ผลสมาปตฺติยา อนนฺตรปจฺจเยน ปจฺจโย ฯ

๕๒๑อุเปกฺขาสหคโต ธมฺโม สุขสหคตสฺส ธมฺมสฺส ... ปีติสหคตสฺส จ สุขสหคตสฺส จ ธมฺมสฺส อนนฺตรปจฺจเยน ปจฺจโย ฯ ตานิเยว จ คมนานิ นิยาเมตพฺพานิ ฯ

๕๒๒ปีติสหคโต จ สุขสหคโต จ ธมฺมา ปีติสหคตสฺส ธมฺมสฺส ... สุขสหคตสฺส ธมฺมสฺส ... อุเปกฺขาสหคตสฺส ธมฺมสฺส อนนฺตรปจฺจเยน ปจฺจโย ปีติสหคตญฺจ สุขสหคตญฺจ จุติจิตฺตํ อุเปกฺขาสหคตสฺส อุปปตฺติจิตฺตสฺส ปีติสหคตญฺจ สุขสหคตญฺจ ภวงฺคํ อาวชฺชนาย ปีติสหคตา จ สุขสหคตา จ วิปากมโนวิญฺญาณธาตุ กิริยามโนวิญฺญาณธาตุยา ปีติสหคตญฺจ สุขสหคตญฺจ ภวงฺคํ อุเปกฺขาสหคตสฺส ภวงฺคสฺส ปีติสหคตญฺจ สุขสหคตญฺจ กุสลากุสลํ อุเปกฺขาสหคตสฺส วุฏฺฐานสฺส กิริยํ วุฏฺฐานสฺส ผลํ วุฏฺฐานสฺส อนนฺตรปจฺจเยน ปจฺจโย ฯ

๕๒๓ปีติสหคโต จ สุขสหคโต จ ธมฺมา ปีติสหคตสฺส จ สุขสหคตสฺส จ ธมฺมสฺส อนนฺตรปจฺจเยน ปจฺจโย ปุริมา ปุริมา ปีติสหคตา จ สุขสหคตา จ ขนฺธา ปจฺฉิมานํ ปจฺฉิมานํ ปีติสหคตานญฺจ สุขสหคตานญฺจ ขนฺธานํ ฯ สงฺขิตฺตํ ฯ ปีติสหคตญฺจ สุขสหคตญฺจ อนุโลมํ ปีติสหคตาย จ สุขสหคตาย จ ผลสมาปตฺติยา อนนฺตรปจฺจเยน ปจฺจโย ฯ

๕๒๔ปีติสหคโต ธมฺโม ปีติสหคตสฺส ธมฺมสฺส สมนนฺตรปจฺจเยน ปจฺจโย ฯ อนนฺตรปจฺจยสทิสํ ฯ

๕๒๕ปีติสหคโต ธมฺโม ปีติสหคตสฺส ธมฺมสฺส สหชาตปจฺจเยน ปจฺจโย ปีติสหคโต เอโก ขนฺโธ ติณฺณนฺนํ ขนฺธานํ สหชาตปจฺจเยน ปจฺจโย เทฺว ขนฺธา ทฺวินฺนํ ขนฺธานํ สหชาตปจฺจเยน ปจฺจโย ฯ ปฏิจฺจสทิสํ ฯ สหชาเต ทส ปญฺหา ฯ

๕๒๖ปีติสหคโต ธมฺโม ปีติสหคตสฺส ธมฺมสฺส อญฺญมญฺญปจฺจเยน ปจฺจโย นิสฺสยปจฺจเยน ปจฺจโย ฯ ทส ปญฺหา กาตพฺพา ฯ

๕๒๗ปีติสหคโต ธมฺโม ปีติสหคตสฺส ธมฺมสฺส อุปนิสฺสยปจฺจเยน ปจฺจโย อารมฺมณูปนิสฺสโย อนนฺตรูปนิสฺสโย ปกตูปนิสฺสโย ฯ ปกตูปนิสฺสโย: ปีติสหคตํ สทฺธํ อุปนิสฺสาย ปีติสหคเตน จิตฺเตน ทานํ เทติ สีลํ สมาทิยติ อุโปสถกมฺมํ กโรติ ปีติสหคตํ ฌานํ อุปฺปาเทติ วิปสฺสนํ ... มคฺคํ ... สมาปตฺตึ อุปฺปาเทติ มานํ ชปฺเปติ ทิฏฺฐึ คณฺหาติ ปีติสหคตํ สีลํ ... สุตํ ... จาคํ ... ปญฺญํ อุปนิสฺสาย ปีติสหคเตน จิตฺเตน ทานํ เทติ สีลํ สมาทิยติ มานํ ชปฺเปติ ทิฏฺฐึ คณฺหาติ ปีติสหคตํ ราคํ ... โมหํ มานํ ทิฏฺฐึ ... ปตฺถนํ อุปนิสฺสาย ปีติสหคเตน จิตฺเตน ทานํ เทติ สีลํ สมาทิยติ อุโปสถกมฺมํ กโรติ ปีติสหคตํ ฌานํ อุปฺปาเทติ สมาปตฺตึ อุปฺปาเทติ ปีติสหคเตน จิตฺเตน อทินฺนํ อาทิยติ มุสา ภณติ ปิสุณํ ภณติ สมฺผํ ปลปติ สนฺธึ ฉินฺทติ นิลฺโลปํ หรติ เอกาคาริกํ กโรติ ปริปนฺเถ ติฏฺฐติ ปรทารํ คจฺฉติ คามฆาตํ กโรติ นิคมฆาตํ กโรติ ปีติสหคตา สทฺธา ... สีลํ สุตํ จาโค ปญฺญา ราโค โมโห มาโน ทิฏฺฐิ ... ปตฺถนา ปีติสหคตาย สทฺธาย สีลสฺส สุตสฺส จาคสฺส ปญฺญาย ราคสฺส โมหสฺส มานสฺส ทิฏฺฐิยา ปตฺถนาย อุปนิสฺสยปจฺจเยน ปจฺจโย ฯ

๕๒๘ปีติสหคโต ธมฺโม สุขสหคตสฺส ธมฺมสฺส อุปนิสฺสยปจฺจเยน ปจฺจโย อารมฺมณูปนิสฺสโย อนนฺตรูปนิสฺสโย ปกตูปนิสฺสโย ฯ ปกตูปนิสฺสโย: ปีติสหคตํ สทฺธํ อุปนิสฺสาย สุขสหคเตน จิตฺเตน ทานํ เทติ ฯเปฯ สมาปตฺตึ อุปฺปาเทติ มานํ ชปฺเปติ ทิฏฺฐึ คณฺหาติ ปีติสหคตํ สีลํ ... สุตํ จาคํ ปญฺญํ ราคํ โมหํ มานํ ทิฏฺฐึ ... ปตฺถนํ อุปนิสฺสาย สุขสหคเตน จิตฺเตน ทานํ เทติ ฯเปฯ สมาปตฺตึ อุปฺปาเทติ สุขสหคเตน จิตฺเตน อทินฺนํ อาทิยติ ... นิคมฆาตํ กโรติ ปีติสหคตา สทฺธา ... ปตฺถนา สุขสหคตาย สทฺธาย ปตฺถนาย สุขสหคตสฺส กายวิญฺญาณสฺส อุปนิสฺสยปจฺจเยน ปจฺจโย ฯ

๕๒๙ปีติสหคโต ธมฺโม อุเปกฺขาสหคตสฺส ธมฺมสฺส อุปนิสฺสยปจฺจเยน ปจฺจโย อารมฺมณูปนิสฺสโย อนนฺตรูปนิสฺสโย ปกตูปนิสฺสโย ฯ ปกตูปนิสฺสโย: ปีติสหคตํ สทฺธํ อุปนิสฺสาย อุเปกฺขาสหคเตน จิตฺเตน ทานํ เทติ ... อภิญฺญํ อุปฺปาเทติ สมาปตฺตึ อุปฺปาเทติ ... ทิฏฺฐึ คณฺหาติ ปีติสหคตํ สีลํ ... ปตฺถนํ อุปนิสฺสาย อุเปกฺขาสหคเตน จิตฺเตน ทานํ เทติ ... นิคมฆาตํ กโรติ ปีติสหคตา สทฺธา ... ปตฺถนา อุเปกฺขาสหคตาย สทฺธาย ปตฺถนาย อุปนิสฺสยปจฺจเยน ปจฺจโย ฯ

๕๓๐ปีติสหคโต ธมฺโม ปีติสหคตสฺส จ สุขสหคตสฺส จ ธมฺมสฺส อุปนิสฺสยปจฺจเยน ปจฺจโย อารมฺมณูปนิสฺสโย อนนฺตรูปนิสฺสโย ปกตูปนิสฺสโย ฯ ปกตูปนิสฺสโย: ปีติสหคตํ สทฺธํ อุปนิสฺสาย ปีติสหคเตน จ สุขสหคเตน จ จิตฺเตน ทานํ เทติ ... ทิฏฺฐึ คณฺหาติ ปีติสหคตํ สุขสหคตํ สีลํ ... ปตฺถนํ อุปนิสฺสาย ปีติสหคเตน จ สุขสหคเตน จ จิตฺเตน ทานํ เทติ ... นิคมฆาตํ กโรติ ปีติสหคตา สทฺธา ... ปตฺถนา ปีติสหคตาย จ สุขสหคตาย จ สทฺธาย ปตฺถนาย อุปนิสฺสยปจฺจเยน ปจฺจโย ฯ

๕๓๑สุขสหคโต ธมฺโม สุขสหคตสฺส ธมฺมสฺส อุปนิสฺสยปจฺจเยน ปจฺจโย อารมฺมณูปนิสฺสโย อนนฺตรูปนิสฺสโย ปกตูปนิสฺสโย ฯ ปกตูปนิสฺสโย: สุขสหคตํ สทฺธํ อุปนิสฺสาย สุขสหคเตน จิตฺเตน ทานํ เทติ ... ทิฏฺฐึ คณฺหาติ สุขสหคตํ สีลํ ... ปตฺถนํ ... สุขสหคตํ กายวิญฺญาณํ อุปนิสฺสาย สุขสหคเตน จิตฺเตน ทานํ เทติ ... นิคมฆาตํ กโรติ สุขสหคตา สทฺธา ... ปตฺถนา ... สุขสหคตํ กายวิญฺญาณํ สุขสหคตาย สทฺธาย ปตฺถนาย สุขสหคตสฺส กายวิญฺญาณสฺส อุปนิสฺสยปจฺจเยน ปจฺจโย ฯ

๕๓๒สุขสหคโต ธมฺโม ปีติสหคตสฺส ธมฺมสฺส อุปนิสฺสยปจฺจเยน ปจฺจโย อารมฺมณูปนิสฺสโย อนนฺตรูปนิสฺสโย ปกตูปนิสฺสโย ฯ ปกตูปนิสฺสโย: สุขสหคตํ สทฺธํ อุปนิสฺสาย ปีติสหคเตน จิตฺเตน ทานํ เทติ ... ทิฏฺฐึ คณฺหาติ สุขสหคตํ สีลํ ... ปตฺถนํ ... สุขสหคตํ กายวิญฺญาณํ อุปนิสฺสาย ปีติสหคเตน จิตฺเตน ทานํ เทติ ... นิคมฆาตํ กโรติ สุขสหคตา สทฺธา ... ปตฺถนา ... สุขสหคตํ กายวิญฺญาณํ ปีติสหคตาย สทฺธาย ปตฺถนาย อุปนิสฺสยปจฺจเยน ปจฺจโย ฯ

๕๓๓สุขสหคโต ธมฺโม อุเปกฺขาสหคตสฺส ธมฺมสฺส อุปนิสฺสยปจฺจเยน ปจฺจโย อารมฺมณูปนิสฺสโย อนนฺตรูปนิสฺสโย ปกตูปนิสฺสโย ฯ ปกตูปนิสฺสโย: สุขสหคตํ สทฺธํ อุปนิสฺสาย อุเปกฺขาสหคเตน จิตฺเตน ทานํ เทติ ... อภิญฺญํ อุปฺปาเทติ ... ทิฏฺฐึ คณฺหาติ สุขสหคตํ สีลํ ... ปตฺถนํ ... สุขสหคตํ กายวิญฺญาณํ อุปนิสฺสาย อุเปกฺขาสหคเตน จิตฺเตน ทานํ เทติ ... นิคมฆาตํ กโรติ สุขสหคตา สทฺธา ... ปตฺถนา ... สุขสหคตํ กายวิญฺญาณํ อุเปกฺขาสหคตาย สทฺธาย ปตฺถนาย อุปนิสฺสยปจฺจเยน ปจฺจโย ฯ

๕๓๔สุขสหคโต ธมฺโม ปีติสหคตสฺส จ สุขสหคตสฺส จ ธมฺมสฺส อุปนิสฺสยปจฺจเยน ปจฺจโย อารมฺมณูปนิสฺสโย อนนฺตรูปนิสฺสโย ปกตูปนิสฺสโย ฯ ปกตูปนิสฺสโย: สุขสหคตํ สทฺธํ อุปนิสฺสาย ปีติสหคเตน จ สุขสหคเตน จ จิตฺเตน ทานํ เทติ ... ทิฏฺฐึ คณฺหาติ สุขสหคตํ สีลํ ... ปตฺถนํ ... สุขสหคตํ กายวิญฺญาณํ อุปนิสฺสาย ปีติสหคเตน จ สุขสหคเตน จ จิตฺเตน ทานํ เทติ ... นิคมฆาตํ กโรติ ฯเปฯ สุขสหคตา สทฺธา ... ปตฺถนา ... สุขสหคตํ กายวิญฺญาณํ ปีติสหคตาย จ สุขสหคตาย จ สทฺธาย ปตฺถนาย อุปนิสฺสยปจฺจเยน ปจฺจโย ฯ

๕๓๕อุเปกฺขาสหคโต ธมฺโม อุเปกฺขาสหคตสฺส ธมฺมสฺส อุปนิสฺสยปจฺจเยน ปจฺจโย อารมฺมณูปนิสฺสโย อนนฺตรูปนิสฺสโย ปกตูปนิสฺสโย ฯ ปกตูปนิสฺสโย: อุเปกฺขาสหคตํ สทฺธํ อุปนิสฺสาย อุเปกฺขาสหคเตน จิตฺเตน ทานํ เทติ ... อภิญฺญํ อุปฺปาเทติ ... ทิฏฺฐึ คณฺหาติ อุเปกฺขาสหคตํ สีลํ ... ปตฺถนํ อุปนิสฺสาย อุเปกฺขาสหคเตน จิตฺเตน ทานํ เทติ ... นิคมฆาตํ กโรติ อุเปกฺขาสหคตา สทฺธา ... ปตฺถนา อุเปกฺขาสหคตาย สทฺธาย ปตฺถนาย อุปนิสฺสยปจฺจเยน ปจฺจโย ฯ

๕๓๖อุเปกฺขาสหคโต ธมฺโม ปีติสหคตสฺส ธมฺมสฺส อุปนิสฺสยปจฺจเยน ปจฺจโย อารมฺมณูปนิสฺสโย อนนฺตรูปนิสฺสโย ปกตูปนิสฺสโย ฯ ปกตูปนิสฺสโย: อุเปกฺขาสหคตํ สทฺธํ อุปนิสฺสาย ปีติสหคเตน จิตฺเตน ทานํ เทติ ... ทิฏฺฐึ คณฺหาติ อุเปกฺขาสหคตํ สีลํ ... ปตฺถนํ อุปนิสฺสาย ปีติสหคเตน จิตฺเตน ทานํ เทติ ... นิคมฆาตํ กโรติ อุเปกฺขาสหคตา สทฺธา ... ปตฺถนา ปีติสหคตาย สทฺธาย ปตฺถนาย อุปนิสฺสยปจฺจเยน ปจฺจโย ฯ

๕๓๗อุเปกฺขาสหคโต ธมฺโม สุขสหคตสฺส ธมฺมสฺส อุปนิสฺสยปจฺจเยน ปจฺจโย อารมฺมณูปนิสฺสโย อนนฺตรูปนิสฺสโย ปกตูปนิสฺสโย ฯ ปกตูปนิสฺสโย: อุเปกฺขาสหคตํ สทฺธํ อุปนิสฺสาย สุขสหคเตน จิตฺเตน ทานํ เทติ ... ทิฏฺฐึ คณฺหาติ อุเปกฺขาสหคตํ สีลํ ... ปตฺถนํ อุปนิสฺสาย สุขสหคเตน จิตฺเตน ทานํ เทติ ... นิคมฆาตํ กโรติ อุเปกฺขาสหคตา สทฺธา ... ปตฺถนา สุขสหคตาย สทฺธาย ปตฺถนาย สุขสหคตสฺส กายวิญฺญาณสฺส อุปนิสฺสยปจฺจเยน ปจฺจโย ฯ

๕๓๘อุเปกฺขาสหคโต ธมฺโม ปีติสหคตสฺส จ สุขสหคตสฺส จ ธมฺมสฺส อุปนิสฺสยปจฺจเยน ปจฺจโย อารมฺมณูปนิสฺสโย อนนฺตรูปนิสฺสโย ปกตูปนิสฺสโย ฯ ปกตูปนิสฺสโย: อุเปกฺขาสหคตํ สทฺธํ อุปนิสฺสาย ปีติสหคเตน จ สุขสหคเตน จ จิตฺเตน ทานํ เทติ ... ทิฏฺฐึ คณฺหาติ อุเปกฺขาสหคตํ สีลํ ... ปตฺถนํ อุปนิสฺสาย ปีติสหคเตน จ สุขสหคเตน จ จิตฺเตน ทานํ เทติ ... นิคมฆาตํ กโรติ อุเปกฺขาสหคตา สทฺธา ... ปตฺถนา ปีติสหคตาย จ สุขสหคตาย จ สทฺธาย ปตฺถนาย อุปนิสฺสยปจฺจเยน ปจฺจโย ฯ

๕๓๙ปีติสหคโต จ สุขสหคโต จ ธมฺมา ปีติสหคตสฺส ธมฺมสฺส อุปนิสฺสยปจฺจเยน ปจฺจโย อารมฺมณูปนิสฺสโย อนนฺตรูปนิสฺสโย ปกตูปนิสฺสโย ฯ ปกตูปนิสฺสโย: ปีติสหคตญฺจ สุขสหคตญฺจ สทฺธํ อุปนิสฺสาย ปีติสหคเตน จิตฺเตน ทานํ เทติ ... ทิฏฺฐึ คณฺหาติ ปีติสหคตญฺจ สุขสหคตญฺจ สีลํ ... ปตฺถนํ อุปนิสฺสาย ปีติสหคเตน จิตฺเตน ทานํ เทติ ... นิคมฆาตํ กโรติ ปีติสหคตา จ สุขสหคตา จ สทฺธา ... ปตฺถนา ปีติสหคตาย สทฺธาย ปตฺถนาย อุปนิสฺสยปจฺจเยน ปจฺจโย ฯ

๕๔๐ปีติสหคโต จ สุขสหคโต จ ธมฺมา สุขสหคตสฺส ธมฺมสฺส อุปนิสฺสยปจฺจเยน ปจฺจโย อารมฺมณูปนิสฺสโย อนนฺตรูปนิสฺสโย ปกตูปนิสฺสโย ฯ ปกตูปนิสฺสโย: ปีติสหคตญฺจ สุขสหคตญฺจ สทฺธํ อุปนิสฺสาย สุขสหคเตน จิตฺเตน ทานํ เทติ ... ทิฏฺฐึ คณฺหาติ ปีติสหคตญฺจ สุขสหคตญฺจ สีลํ ... ปตฺถนํ อุปนิสฺสาย สุขสหคเตน จิตฺเตน ทานํ เทติ ... นิคมฆาตํ กโรติ ปีติสหคตา จ สุขสหคตา จ สทฺธา ... ปตฺถนา สุขสหคตาย สทฺธาย ปตฺถนาย สุขสหคตสฺส กายวิญฺญาณสฺส อุปนิสฺสยปจฺจเยน ปจฺจโย ฯ

๕๔๑ปีติสหคโต จ สุขสหคโต จ ธมฺมา อุเปกฺขาสหคตสฺส ธมฺมสฺส อุปนิสฺสยปจฺจเยน ปจฺจโย อารมฺมณูปนิสฺสโย อนนฺตรูปนิสฺสโย ปกตูปนิสฺสโย ฯ ปกตูปนิสฺสโย: ปีติสหคตญฺจ สุขสหคตญฺจ สทฺธํ อุปนิสฺสาย อุเปกฺขาสหคเตน จิตฺเตน ทานํ เทติ ... อภิญฺญํ อุปฺปาเทติ ... ทิฏฺฐึ คณฺหาติ ปีติสหคตญฺจ สุขสหคตญฺจ สีลํ ... ปตฺถนํ อุปนิสฺสาย อุเปกฺขาสหคเตน จิตฺเตน ทานํ เทติ ... นิคมฆาตํ กโรติ ปีติสหคตา จ สุขสหคตา จ สทฺธา ... ปตฺถนา อุเปกฺขาสหคตาย สทฺธาย ปตฺถนาย อุปนิสฺสยปจฺจเยน ปจฺจโย ฯ

๕๔๒ปีติสหคโต จ สุขสหคโต จ ธมฺมา ปีติสหคตสฺส จ สุขสหคตสฺส จ ธมฺมสฺส อุปนิสฺสยปจฺจเยน ปจฺจโย อารมฺมณูปนิสฺสโย อนนฺตรูปนิสฺสโย ปกตูปนิสฺสโย ฯ ปกตูปนิสฺสโย: ปีติสหคตญฺจ สุขสหคตญฺจ สทฺธํ อุปนิสฺสาย ปีติสหคเตน จ สุขสหคเตน จ จิตฺเตน ทานํ เทติ สีลํ สมาทิยติ อุโปสถกมฺมํ กโรติ ปีติสหคตญฺจ สุขสหคตญฺจ ฌานํ อุปฺปาเทติ วิปสฺสนํ ... มคฺคํ ... สมาปตฺตึ ... มานํ ... ทิฏฺฐึ คณฺหาติ ปีติสหคตญฺจ สุขสหคตญฺจ สีลํ ... สุตํ จาคํ ปญฺญํ ราคํ โมหํ มานํ ทิฏฺฐึ ... ปตฺถนํ อุปนิสฺสาย ปีติสหคเตน จ สุขสหคเตน จ จิตฺเตน ทานํ เทติ สีลํ สมาทิยติ อุโปสถกมฺมํ กโรติ ปีติสหคตญฺจ สุขสหคตญฺจ ฌานํ ... วิปสฺสนํ ... มคฺคํ ... สมาปตฺตึ อุปฺปาเทติ ปีติสหคเตน จ สุขสหคเตน จ จิตฺเตน อทินฺนํ อาทิยติ มุสา ภณติ ปิสุณํ ภณติ สมฺผํ ปลปติ สนฺธึ ฉินฺทติ นิลฺโลปํ หรติ เอกาคาริกํ กโรติ ปริปนฺเถ ติฏฺฐติ ปรทารํ คจฺฉติ คามฆาตํ กโรติ นิคมฆาตํ กโรติ ปีติสหคตา จ สุขสหคตา จ สทฺธา ... ปตฺถนา ปีติสหคตาย จ สุขสหคตาย จ สทฺธาย ปตฺถนาย อุปนิสฺสยปจฺจเยน ปจฺจโย ฯ

๕๔๓ปีติสหคโต ธมฺโม ปีติสหคตสฺส ธมฺมสฺส อาเสวนปจฺจเยน ปจฺจโย ปุริมา ปุริมา ปีติสหคตา ขนฺธา ปจฺฉิมานํ ปจฺฉิมานํ ปีติสหคตานํ ขนฺธานํ อาเสวนปจฺจเยน ปจฺจโย ปีติสหคตํ อนุโลมํ ปีติสหคตสฺส โคตฺรภุสฺส อนุโลมํ โวทานสฺส โคตฺรภุ มคฺคสฺส โวทานํ มคฺคสฺส อาเสวนปจฺจเยน ปจฺจโย ฯ

๕๔๔ปีติสหคโต ธมฺโม สุขสหคตสฺส ธมฺมสฺส อาเสวนปจฺจเยน ปจฺจโย ปุริมา ปุริมา ปีติสหคตา ขนฺธา ปจฺฉิมานํ ปจฺฉิมานํ สุขสหคตานํ ขนฺธานํ อาเสวนปจฺจเยน ปจฺจโย ปีติสหคตํ อนุโลมํ สุขสหคตสฺส โคตฺรภุสฺส อาเสวนปจฺจเยน ปจฺจโย ปีติสหคตํ อนุโลมํ สุขสหคตสฺส โวทานสฺส อาเสวนปจฺจเยน ปจฺจโย ปีติสหคตํ โคตฺรภุ สุขสหคตสฺส มคฺคสฺส ปีติสหคตํ โวทานํ สุขสหคตสฺส มคฺคสฺส อาเสวนปจฺจเยน ปจฺจโย ฯ

๕๔๕ปีติสหคโต ธมฺโม ปีติสหคตสฺส จ สุขสหคตสฺส จ ธมฺมสฺส อาเสวนปจฺจเยน ปจฺจโย ปุริมา ปุริมา ปีติสหคตา ขนฺธา ปจฺฉิมานํ ปจฺฉิมานํ ปีติสหคตานญฺจ สุขสหคตานญฺจ ขนฺธานํ อาเสวนปจฺจเยน ปจฺจโย ฯ สงฺขิตฺตํ ฯ ปีติสหคตํ โวทานํ ปีติสหคตสฺส จ สุขสหคตสฺส จ มคฺคสฺส อาเสวนปจฺจเยน ปจฺจโย ฯ

๕๔๖สุขสหคโต ธมฺโม สุขสหคตสฺส ธมฺมสฺส ... ปีติสหคตสฺส ธมฺมสฺส ... ปีติสหคตสฺส จ สุขสหคตสฺส จ ธมฺมสฺส อาเสวนปจฺจเยน ปจฺจโย ฯ สงฺขิตฺตํ ฯ ปีตินยํ ปสฺสิตฺวา กาตพฺพํ ฯ

๕๔๗อุเปกฺขาสหคโต ธมฺโม อุเปกฺขาสหคตสฺส ธมฺมสฺส อาเสวนปจฺจเยน ปจฺจโย ปุริมา ปุริมา อุเปกฺขาสหคตา ขนฺธา ปจฺฉิมานํ ปจฺฉิมานํ อุเปกฺขาสหคตานํ ขนฺธานํ อุเปกฺขาสหคตํ โวทานํ อุเปกฺขาสหคตสฺส มคฺคสฺส อาเสวนปจฺจเยน ปจฺจโย ฯ

๕๔๘ปีติสหคโต จ สุขสหคโต จ ธมฺมา ปีติสหคตสฺส ธมฺมสฺส ... สุขสหคตสฺส ธมฺมสฺส ... ปีติสหคตสฺส จ สุขสหคตสฺส จ ธมฺมสฺส อาเสวนปจฺจเยน ปจฺจโย ปุริมา ปุริมา ปีติสหคตา จ สุขสหคตา จ ขนฺธา ปจฺฉิมานํ ปจฺฉิมานํ ปีติสหคตานญฺจ สุขสหคตานญฺจ ขนฺธานํ อาเสวนปจฺจเยน ปจฺจโย ฯ สงฺขิตฺตํ ฯ ปีติสหคตญฺจ สุขสหคตญฺจ โวทานํ ปีติสหคตสฺส จ สุขสหคตสฺส จ มคฺคสฺส อาเสวนปจฺจเยน ปจฺจโย ฯ

๕๔๙ปีติสหคโต ธมฺโม ปีติสหคตสฺส ธมฺมสฺส กมฺมปจฺจเยน ปจฺจโย สหชาตา นานาขณิกา ฯ สหชาตา: ปีติสหคตา เจตนา สมฺปยุตฺตกานํ ขนฺธานํ กมฺมปจฺจเยน ปจฺจโย ปฏิสนฺธิกฺขเณ ปีติสหคตา เจตนา สมฺปยุตฺตกานํ ขนฺธานํ กมฺมปจฺจเยน ปจฺจโย ฯ นานาขณิกา: ปีติสหคตา เจตนา วิปากานํ ปีติสหคตานํ ขนฺธานํ กมฺมปจฺจเยน ปจฺจโย ฯ

๕๕๐ปีติสหคโต ธมฺโม สุขสหคตสฺส ธมฺมสฺส กมฺมปจฺจเยน ปจฺจโย สหชาตา นานาขณิกา ฯ สหชาตา: ปีติสหคตา เจตนา สมฺปยุตฺตกานํ สุขสหคตานํ ขนฺธานํ กมฺมปจฺจเยน ปจฺจโย ปฏิสนฺธิกฺขเณ ปีติสหคตา เจตนา สมฺปยุตฺตกานํ สุขสหคตานํ ขนฺธานํ กมฺมปจฺจเยน ปจฺจโย ฯ นานาขณิกา: ปีติสหคตา เจตนา วิปากานํ สุขสหคตานํ ขนฺธานํ กมฺมปจฺจเยน ปจฺจโย ฯ

๕๕๑ปีติสหคโต ธมฺโม อุเปกฺขาสหคตสฺส ธมฺมสฺส กมฺมปจฺจเยน ปจฺจโย ฯ นานาขณิกา: ปีติสหคตา เจตนา วิปากานํ อุเปกฺขาสหคตานํ ขนฺธานํ กมฺมปจฺจเยน ปจฺจโย ฯ

๕๕๒ปีติสหคโต ธมฺโม ปีติสหคตสฺส จ สุขสหคตสฺส จ ธมฺมสฺส กมฺมปจฺจเยน ปจฺจโย สหชาตา นานาขณิกา ฯ สหชาตา: ปีติสหคตา เจตนา สมฺปยุตฺตกานํ ปีติสหคตานญฺจ สุขสหคตานญฺจ ขนฺธานํ กมฺมปจฺจเยน ปจฺจโย ปฏิสนฺธิกฺขเณ ... ฯ นานาขณิกา: ปีติสหคตา เจตนา วิปากานํ ปีติสหคตานญฺจ สุขสหคตานญฺจ ขนฺธานํ กมฺมปจฺจเยน ปจฺจโย ฯ

๕๕๓สุขสหคโต ธมฺโม สุขสหคตสฺส ธมฺมสฺส ... ฯ จตฺตาริปิ คณนานิ ปสฺสิตฺวา กาตพฺพา ฯ

๕๕๔อุเปกฺขาสหคโต ธมฺโม อุเปกฺขาสหคตสฺส ธมฺมสฺส กมฺมปจฺจเยน ปจฺจโย สหชาตา นานาขณิกา ฯ ... ปีติสหคตสฺส ธมฺมสฺส กมฺมปจฺจเยน ปจฺจโย นานาขณิกา ฯ ... สุขสหคตสฺส ธมฺมสฺส กมฺมปจฺจเยน ปจฺจโย นานาขณิกา: อุเปกฺขาสหคตา เจตนา ... ฯ ... ปีติสหคตสฺส จ สุขสหคตสฺส จ ธมฺมสฺส กมฺมปจฺจเยน ปจฺจโย นานาขณิกา: อุเปกฺขาสหคตา เจตนา ... ฯ ปีติสหคโต จ สุขสหคโต จ ธมฺมา ปีติสหคตสฺส ธมฺมสฺส ... จตฺตาริ กาตพฺพานิ ฯ ปีติสหคตํ อนุมชฺชนฺเตน วิภชิตพฺพํ ฯ

๕๕๕ปีติสหคโต ธมฺโม ปีติสหคตสฺส ธมฺมสฺส วิปากปจฺจเยน ปจฺจโย ปีติสหคโต วิปาโก เอโก ขนฺโธ ติณฺณนฺนํ ขนฺธานํ วิปากปจฺจเยน ปจฺจโย เทฺว ขนฺธา ทฺวินฺนํ ขนฺธานํ ปฏิสนฺธิกฺขเณ ปีติสหคโต เอโก ขนฺโธ ติณฺณนฺนํ ขนฺธานํ เทฺว ขนฺธา ทฺวินฺนํ ขนฺธานํ ฯเปฯ ยถา ปฏิจฺจวาเร เหตุปจฺจเย เอวํ วิตฺถาเรตพฺพา ทส ปญฺหา ฯ

๕๕๖ปีติสหคโต ธมฺโม ปีติสหคตสฺส ธมฺมสฺส อาหารปจฺจเยน ปจฺจโย อินฺทฺริยปจฺจเยน ปจฺจโย ฌานปจฺจเยน ปจฺจโย มคฺคปจฺจเยน ปจฺจโย สมฺปยุตฺตปจฺจเยน ปจฺจโย อตฺถิปจฺจเยน ปจฺจโย ฯ ทส ปญฺหา วิตฺถาเรตพฺพา ฯ นตฺถิปจฺจเยน ปจฺจโย วิคตปจฺจเยน ปจฺจโย ฯ นตฺถิปิ วิคตมฺปิ อนนฺตรสทิสํ ฯ อวิคตปจฺจเยน ปจฺจโย ฯ

๕๕๗เหตุยา ทส อารมฺมเณ โสฬส อธิปติยา โสฬส อนนฺตเร โสฬส สมนนฺตเร โสฬส สหชาเต ทส อญฺญมญฺเญ ทส นิสฺสเย ทส อุปนิสฺสเย โสฬส อาเสวเน ทส กมฺเม โสฬส วิปาเก ทส อาหาเร อินฺทฺริเย ฌาเน มคฺเค สมฺปยุตฺเต อตฺถิยา ทส นตฺถิยา โสฬส วิคเต โสฬส อวิคเต ทส ฯ กุสลตฺติกํ อนุโลมํ อนุมชฺชนฺเตน คเณตพฺพํ ฯ อนุโลมํ ฯ

๕๕๘ปีติสหคโต ธมฺโม ปีติสหคตสฺส ธมฺมสฺส อารมฺมณปจฺจเยน ปจฺจโย สหชาตปจฺจเยน ปจฺจโย อุปนิสฺสยปจฺจเยน ปจฺจโย กมฺมปจฺจเยน ปจฺจโย ฯ

๕๕๙ปีติสหคโต ธมฺโม สุขสหคตสฺส ธมฺมสฺส อารมฺมณปจฺจเยน ปจฺจโย สหชาตปจฺจเยน ปจฺจโย อุปนิสฺสยปจฺจเยน ปจฺจโย กมฺมปจฺจเยน ปจฺจโย ฯ

๕๖๐ปีติสหคโต ธมฺโม อุเปกฺขาสหคตสฺส ธมฺมสฺส อารมฺมณปจฺจเยน ปจฺจโย อุปนิสฺสยปจฺจเยน ปจฺจโย ฯ

๕๖๑ปีติสหคโต ธมฺโม ปีติสหคตสฺส จ สุขสหคตสฺส จ ธมฺมสฺส อารมฺมณปจฺจเยน ปจฺจโย สหชาตปจฺจเยน ปจฺจโย อุปนิสฺสยปจฺจเยน ปจฺจโย กมฺมปจฺจเยน ปจฺจโย ฯ

๕๖๒สุขสหคโต ธมฺโม สุขสหคตสฺส ธมฺมสฺส อารมฺมณปจฺจเยน ปจฺจโย สหชาตปจฺจเยน ปจฺจโย อุปนิสฺสยปจฺจเยน ปจฺจโย กมฺมปจฺจเยน ปจฺจโย ฯ

๕๖๓สุขสหคโต ธมฺโม ปีติสหคตสฺส ธมฺมสฺส อารมฺมณปจฺจเยน ปจฺจโย สหชาตปจฺจเยน ปจฺจโย อุปนิสฺสยปจฺจเยน ปจฺจโย กมฺมปจฺจเยน ปจฺจโย ฯ

๕๖๔สุขสหคโต ธมฺโม อุเปกฺขาสหคตสฺส ธมฺมสฺส อารมฺมณปจฺจเยน ปจฺจโย อุปนิสฺสยปจฺจเยน ปจฺจโย กมฺมปจฺจเยน ปจฺจโย ฯ

๕๖๕สุขสหคโต ธมฺโม ปีติสหคตสฺส จ สุขสหคตสฺส จ ธมฺมสฺส อารมฺมณปจฺจเยน ปจฺจโย สหชาตปจฺจเยน ปจฺจโย อุปนิสฺสยปจฺจเยน ปจฺจโย กมฺมปจฺจเยน ปจฺจโย ฯ

๕๖๖อุเปกฺขาสหคโต ธมฺโม อุเปกฺขาสหคตสฺส ธมฺมสฺส อารมฺมณปจฺจเยน ปจฺจโย สหชาตปจฺจเยน ปจฺจโย อุปนิสฺสยปจฺจเยน ปจฺจโย กมฺมปจฺจเยน ปจฺจโย ฯ

๕๖๗อุเปกฺขาสหคโต ธมฺโม ปีติสหคตสฺส ธมฺมสฺส อารมฺมณปจฺจเยน ปจฺจโย อุปนิสฺสยปจฺจเยน ปจฺจโย กมฺมปจฺจเยน ปจฺจโย ฯ

๕๖๘อุเปกฺขาสหคโต ธมฺโม สุขสหคตสฺส ธมฺมสฺส อารมฺมณปจฺจเยน ปจฺจโย อุปนิสฺสยปจฺจเยน ปจฺจโย กมฺมปจฺจเยน ปจฺจโย ฯ

๕๖๙อุเปกฺขาสหคโต ธมฺโม ปีติสหคตสฺส จ สุขสหคตสฺส จ ธมฺมสฺส อารมฺมณปจฺจเยน ปจฺจโย อุปนิสฺสยปจฺจเยน ปจฺจโย กมฺมปจฺจเยน ปจฺจโย ฯ

๕๗๐ปีติสหคโต จ สุขสหคโต จ ธมฺมา ปีติสหคตสฺส ธมฺมสฺส อารมฺมณปจฺจเยน ปจฺจโย สหชาตปจฺจเยน ปจฺจโย อุปนิสฺสยปจฺจเยน ปจฺจโย กมฺมปจฺจเยน ปจฺจโย ฯ

๕๗๑ปีติสหคโต จ สุขสหคโต จ ธมฺมา สุขสหคตสฺส ธมฺมสฺส อารมฺมณปจฺจเยน ปจฺจโย สหชาตปจฺจเยน ปจฺจโย อุปนิสฺสยปจฺจเยน ปจฺจโย กมฺมปจฺจเยน ปจฺจโย ฯ

๕๗๒ปีติสหคโต จ สุขสหคโต จ ธมฺมา อุเปกฺขาสหคตสฺส ธมฺมสฺส อารมฺมณปจฺจเยน ปจฺจโย อุปนิสฺสยปจฺจเยน ปจฺจโย กมฺมปจฺจเยน ปจฺจโย ฯ

๕๗๓ปีติสหคโต จ สุขสหคโต จ ธมฺมา ปีติสหคตสฺส จ สุขสหคตสฺส จ ธมฺมสฺส อารมฺมณปจฺจเยน ปจฺจโย สหชาตปจฺจเยน ปจฺจโย อุปนิสฺสยปจฺจเยน ปจฺจโย กมฺมปจฺจเยน ปจฺจโย ฯ

๕๗๔นเหตุยา โสฬส นอารมฺมเณ นอธิปติยา นอนนฺตเร นสมนนฺตเร นสหชาเต นอญฺญมญฺเญ นนิสฺสเย นอุปนิสฺสเย นปุเรชาเต นปจฺฉาชาเต นอาเสวเน นกมฺเม นวิปาเก นอาหาเร นอินฺทฺริเย นฌาเน นมคฺเค นสมฺปยุตฺเต นวิปฺปยุตฺเต โนอตฺถิยา โนนตฺถิยา โนวิคเต โนอวิคเต สพฺพตฺถ โสฬส ฯ ปจฺจนียํ อนุมชฺชนฺเตน คเณตพฺพํ ฯ ปจฺจนียํ ฯ

๕๗๕เหตุปจฺจยา นอารมฺมเณ ทส ... นอธิปติยา ทส นอนนฺตเร นสมนนฺตเร นอุปนิสฺสเย นปุเรชาเต นปจฺฉาชาเต นอาเสวเน นกมฺเม นวิปาเก นอาหาเร นอินฺทฺริเย นฌาเน นมคฺเค นวิปฺปยุตฺเต โนนตฺถิยา โนวิคเต สพฺพตฺถ ทส ฯ อนุโลมปจฺจนียํ อนุมชฺชนฺเตน คเณตพฺพํ ฯ อนุโลมปจฺจนียํ ฯ

๕๗๖นเหตุปจฺจยา อารมฺมเณ โสฬส ... อธิปติยา อนนฺตเร สมนนฺตเร โสฬส สหชาเต ทส อญฺญมญฺเญ ทส นิสฺสเย ทส อุปนิสฺสเย โสฬส อาเสวเน ทส กมฺเม โสฬส วิปาเก ทส อาหาเร ทส อินฺทฺริเย ทส ฌาเน ทส มคฺเค ทส สมฺปยุตฺเต ทส อตฺถิยา ทส นตฺถิยา โสฬส วิคเต โสฬส อวิคเต ทส ฯ ปจฺจนียานุโลมํ อนุมชฺชนฺเตน คเณตพฺพํ ฯ ปจฺจนียานุโลมํ ฯ ปีติตฺติกํ สตฺตมํ นิฏฺฐิตํ ฯ --------