๑๐. ชาติปูชกเถราปทาน (๑๒๐)

๑๒๒|๑๒๒.๘๒| ชายนฺตสฺส วิปสฺสิสฺส อาโลโก วิปุโล อหุ ปฐวี จ ปกมฺปิตฺถ สสาครา สปพฺพตา ฯ |๑๒๒.๘๓| เนมิตฺตา จ วิยากํสุ พุทฺโธ โลเก ภวิสฺสติ อคฺโค จ สพฺพสตฺตานํ ชนตํ อุทฺธริสฺสติ ฯ |๑๒๒.๘๔| เนมิตฺตานํ สุณิตฺวาน ชาติปูชํ อกาสหํ เอทิสา ปูชนา นตฺถิ ยาทิสา ชาติปูชนา ฯ |๑๒๒.๘๕| สํหริตฺวาน กุสลํ สกํ จิตฺตํ ปสาทยึ ชาติปูชํ กริตฺวาน ตตฺถ กาลํ กโต อหํ ฯ |๑๒๒.๘๖| ยํ ยํ โยนูปปชฺชามิ เทวตฺตํ อถ มานุสํ สพฺเพ สตฺเต อตีโตมฺหิ ชาติปูชายิทํ ผลํ ฯ |๑๒๒.๘๗| ธาติโย มํ อุปฏฺฐนฺติ มม จิตฺตวสานุคา น เต สกฺโกนฺติ โกเปตุํ ชาติปูชายิทํ ผลํ ฯ |๑๒๒.๘๘| เอกนวุเต อิโต กปฺเป ยํ ปูชมกรึ ตทา ทุคฺคตึ นาภิชานามิ ชาติปูชายิทํ ผลํ ฯ |๑๒๒.๘๙| สุปาริจริยา นาม จตุตฺตึส ชนาธิปา อิโต ตติยกปฺปมฺหิ จกฺกวตฺตี มหพฺพลา ฯ |๑๒๒.๙๐| ปฏิสมฺภิทา จตสฺโส วิโมกฺขาปิจ อฏฺฐิเม ฉฬภิญฺญา สจฺฉิกตา กตํ พุทฺธสฺส สาสนนฺติ ฯ อิตฺถํ สุทํ อายสฺมา ชาติปูชโก เถโร อิมา คาถาโย อภาสิตฺถาติ ฯ ชาติปูชกตฺเถรสฺส อปทานํ สมตฺตํ ฯ อุทฺทานํ ปริวารสุมงฺคลฺยา สรณาสนปุปฺผิกา จิตปูชี พุทฺธสญฺญี มคฺคุปฏฺฐานชาตินา คาถาโย นวุติ วุตฺตา คณิตาโย วิภาวิหีติ ฯ มหาปริวารวคฺโค ทฺวาทสโม ฯ ----------