๑. กุมุทมาลิยเถราปทาน (๑๗๑)

๑๗๓|๑๗๓.๑| ปพฺพเต หิมวนฺตมฺหิ มหาชาตสฺสโร อหุ ตตฺถโช รกฺขโส อาสึ โฆรรูโป มหพฺพโล ฯ |๑๗๓.๒| กุมุทํ ปุปฺผิตํ ตตฺถ จกฺกมตฺตานิ ชายเร โอจินามิ จหํ ปุปฺผํ ผลิโน สมิตํ ตทา ฯ |๑๗๓.๓| อตฺถทสฺสี ตุ ภควา ทิปทินฺโท นราสโภ ปุปฺผํ สงฺโกจิตํ ทิสฺวา อาคจฺฉิ มม สนฺติเก ฯ |๑๗๓.๔| อุปาคตญฺจ สมฺพุทฺธํ เทวเทวํ นราสภํ สพฺพญฺจ ปุปฺผํ ปคฺคยฺห พุทฺธสฺส อภิโรปยึ ฯ |๑๗๓.๕| ยาวตา หิมวนฺตสฺมึ ยาว มาลา ตทา อหุ ตาวจฺฉทนสมฺปนฺโน อคมาสิ ตถาคโต ฯ |๑๗๓.๖| อฏฺฐารเส กปฺปสเต ยํ ปุปฺผมภิโรปยึ ทุคฺคตึ นาภิชานามิ พุทฺธปูชายิทํ ผลํ ฯ |๑๗๓.๗| อิโต ปณฺณรเส กปฺเป สตฺตาเหสุํ ชนาธิปา สหสฺสรถนามา เต จกฺกวตฺตี มหพฺพลา ฯ |๑๗๓.๘| ปฏิสมฺภิทา จตสฺโส วิโมกฺขาปิจ อฏฺฐิเม ฉฬภิญฺญา สจฺฉิกตา กตํ พุทฺธสฺส สาสนนฺติ ฯ อิตฺถํ สุทํ อายสฺมา กุมุทมาลิโย เถโร อิมา คาถาโย อภาสิตฺถาติ ฯ กุมุทมาลิยตฺเถรสฺส อปทานํ สมตฺตํ ฯ