๖. สัมปสาทิกเถราปทาน (๓๐๖)

๓๐๘|๓๐๘.๒๔| นโม เต พุทฺธวีรตฺถุ วิปฺปมุตฺโตสิ สพฺพธิ พฺยสนมฺหิ อนุปฺปตฺโต ตสฺส เม สรณํ ภว ฯ |๓๐๘.๒๕| สิทฺธตฺโถ ตสฺส พฺยากาสิ โลเก อปฺปฏิปุคฺคโล มโหทธิสโม สงฺโฆ อปฺปเมยฺโย อนุตฺตโร ฯ |๓๐๘.๒๖| ตตฺถ ตฺวํ วิรเช เขตฺเต อนนฺตผลทายเก สงฺเฆ จิตฺตํ ปสาเทหิ สุวีชํ วาปิ โรปย ฯ |๓๐๘.๒๗| อิทํ วตฺวาน สพฺพญฺญู โลกเชฏฺโฐ นราสโภ มเมวํ อนุสาสิตฺวา เวหาสตลมุคฺคมิ ฯ |๓๐๘.๒๘| อจิรํ คตมตฺตมฺหิ สพฺพญฺญุมฺหิ นราสเภ มรณํ สมนุปฺปตฺโต ตุสิตํ อุปปชฺชหํ ฯ |๓๐๘.๒๙| ตทาหํ วิรเช เขตฺเต อนนฺตผลทายเก สงฺเฆ จิตฺตํ ปสาเทตฺวา กปฺปํ สคฺคมฺหิ โมทหํ ฯ |๓๐๘.๓๐| จตุนวุเต อิโต กปฺเป ปสาทมลภึ ตทา ทุคฺคตึ นาภิชานามิ ปสาทสฺส อิทํ ผลํ ฯ |๓๐๘.๓๑| ปฏิสมฺภิทา จตสฺโส วิโมกฺขาปิจ อฏฺฐิเม ฉฬภิญฺญา สจฺฉิกตา กตํ พุทฺธสฺส สาสนนฺติ ฯ อิตฺถํ สุทํ อายสฺมา สมฺปสาทิโก เถโร อิมา คาถาโย อภาสิตฺถาติ ฯ สมฺปสาทิกตฺเถรสฺส อปทานํ สมตฺตํ ฯ