๖. ติณสันถารทายกเถราปทาน (๗๖)

๗๘|๗๘.๒๒| หิมวนฺตสฺส อวิทูเร มหาชาตสฺสโร อหุ สตฺตปตฺเตหิ สญฺฉนฺโน นานาสกุณมาลโย ฯ |๗๘.๒๓| ตมฺหิ นฺหาตฺวา จ ปิตฺวา จ อวิทูเร วสามหํ อทฺทสํ สมณานคฺคํ คจฺฉนฺตํ อนิลญฺชเส ฯ |๗๘.๒๔| มม สงฺกปฺปมญฺญาย สตฺถา โลเก อนุตฺตโร อพฺภโต โอโรหิตฺวาน ภูมิยํ ฐาติ ตาวเท ฯ |๗๘.๒๕| ลายเนน ติณํ คยฺห นิสีทนมทาสหํ นิสีทิ ภควา ตตฺถ ติโลกปติ นายโก ฯ |๗๘.๒๖| สกํ จิตฺตํ ปสาเทตฺวา อวนฺทึ โลกนายกํ อุกฺกุฏิโก อวสกฺขิ นิชฺฌายนฺโต มหามุนึ ฯ |๗๘.๒๗| เตน จิตฺตปฺปสาเทน นิมฺมานํ อุปปชฺชหํ ทุคฺคตึ นาภิชานามิ สนฺถารสฺส อิทํ ผลํ ฯ |๗๘.๒๘| อิโต ทุติยเก กปฺเป มิตฺตสมฺมตขตฺติโย สตฺตรตนสมฺปนฺโน จกฺกวตฺติ มหพฺพโล ฯ |๗๘.๒๙| ปฏิสมฺภิทา จตสฺโส วิโมกฺขาปิจ อฏฺฐิเม ฉฬภิญฺญา สจฺฉิกตา กตํ พุทฺธสฺส สาสนนฺติ ฯ อิตฺถํ สุทํ อายสฺมา ติณสนฺถารทายโก เถโร อิมา คาถาโย อภาสิตฺถาติ ฯ ติณสนฺถารทายกตฺเถรสฺส อปทานํ สมตฺตํ ฯ