กรุณากถา

๑๗๔๐นตฺถิ พุทฺธสฺส ภควโต กรุณาติ ฯ อามนฺตา ฯ นตฺถิ พุทฺธสฺส ภควโต เมตฺตาติ ฯ น เหวํ วตฺตพฺเพ ฯเปฯ นตฺถิ พุทฺธสฺส ภควโต กรุณาติ ฯ อามนฺตา ฯ นตฺถิ พุทฺธสฺส ภควโต มุทิตา ฯเปฯ อุเปกฺขาติ ฯ น เหวํ วตฺตพฺเพ ฯเปฯ

๑๗๔๑อตฺถิ พุทฺธสฺส ภควโต เมตฺตาติ ฯ อามนฺตา ฯ อตฺถิ พุทฺธสฺส ภควโต กรุณาติ ฯ น เหวํ วตฺตพฺเพ ฯเปฯ อตฺถิ พุทฺธสฺส ภควโต มุทิตา ฯเปฯ อุเปกฺขาติ ฯ อามนฺตา ฯ อตฺถิ พุทฺธสฺส ภควโต กรุณาติ ฯ น เหวํ วตฺตพฺเพ ฯเปฯ

๑๗๔๒นตฺถิ พุทฺธสฺส ภควโต กรุณาติ ฯ อามนฺตา ฯ ภควา อการุณิโกติ ฯ น เหวํ วตฺตพฺเพ ฯเปฯ นนุ ภควา การุณิโก โลกหิโต โลกานุกมฺปโก โลกตฺถจโรติ ฯ อามนฺตา ฯ หญฺจิ ภควา การุณิโก โลกหิโต โลกานุกมฺปโก โลกตฺถจโร โน วต เร วตฺตพฺเพ นตฺถิ พุทฺธสฺส ภควโต กรุณาติ ฯ

๑๗๔๓นตฺถิ พุทฺธสฺส ภควโต กรุณาติ ฯ อามนฺตา ฯ นนุ ภควา มหากรุณาสมาปตฺตึ สมาปชฺชีติ ฯ อามนฺตา ฯ หญฺจิ ภควา มหากรุณาสมาปตฺตึ สมาปชฺชิ โน วต เร วตฺตพฺเพ นตฺถิ พุทฺธสฺส ภควโต กรุณาติ ฯ

๑๗๔๔อตฺถิ พุทฺธสฺส ภควโต กรุณาติ ฯ อามนฺตา ฯ ภควา สราโคติ ฯ น เหวํ วตฺตพฺเพ ฯเปฯ เตน หิ นตฺถิ พุทฺธสฺส ภควโต กรุณาติ ฯ กรุณากถา ฯ ---------