Sacchikaraṇīyasutta

Aṅguttara Nikāya 4.189

Numbered Discourses 4.189

19. Brāhmaṇavagga

19. Brahmins

Sacchikaraṇīyasutta

Things to be Realized

“Cattārome, bhikkhave, sacchikaraṇīyā dhammā.

“Mendicants, these four things should be realized.

Katame cattāro?

What four?

Atthi, bhikkhave, dhammā kāyena sacchikaraṇīyā;

There are things to be realized with direct meditative experience.

atthi, bhikkhave, dhammā satiyā sacchikaraṇīyā;

There are things to be realized with recollection.

atthi, bhikkhave, dhammā cakkhunā sacchikaraṇīyā;

There are things to be realized with vision.

atthi, bhikkhave, dhammā paññāya sacchikaraṇīyā.

There are things to be realized with wisdom.

Katame ca, bhikkhave, dhammā kāyena sacchikaraṇīyā?

What things are to be realized with direct meditative experience?

Aṭṭha vimokkhā, bhikkhave, kāyena sacchikaraṇīyā.

The eight liberations.

Katame ca, bhikkhave, dhammā satiyā sacchikaraṇīyā?

What things are to be realized with recollection?

Pubbenivāso, bhikkhave, satiyā sacchikaraṇīyo.

Past lives.

Katame ca, bhikkhave, dhammā cakkhunā sacchikaraṇīyā?

What things are to be realized with vision?

Sattānaṁ cutūpapāto, bhikkhave, cakkhunā sacchikaraṇīyo.

The passing away and rebirth of sentient beings.

Katame ca, bhikkhave, dhammā paññāya sacchikaraṇīyā?

What things are to be realized with wisdom?

Āsavānaṁ khayo, bhikkhave, paññāya sacchikaraṇīyo.

The ending of defilements.

Ime kho, bhikkhave, cattāro sacchikaraṇīyā dhammā”ti.

These are the four things to be realized.”

Navamaṁ.