วรรคที่ ๖

๑๕๑เอตทคฺคํ ภิกฺขเว มม สาวกานํ อุปาสกานํ ปฐมํ สรณํ คจฺฉนฺตานํ ยทิทํ ตปุสฺสภลฺลิกา วาณิชา ฯ ทายกานํ ยทิทํ สุทตฺโต คหปติ อนาถปิณฺฑิโก ฯ ธมฺมกถิกานํ ยทิทํ จิตฺโต คหปติ มจฺฉิกสณฺฑิโก ฯ จตูหิ สงฺคหวตฺถูหิ ปริสํ สํคณฺหนฺตานํ ยทิทํ หตฺถโก อาฬวโก ฯ ปณีตทายกานํ ยทิทํ มหานาโม สกฺโก ฯ มนาปทายกานํ ยทิทํ อุคฺโค คหปติ เวสาลิโก ฯ สงฺฆุปฏฺฐากานํ ยทิทํ อุคฺคโต คหปติ ฯ อเวจฺจปฺปสนฺนานํ ยทิทํ สูโร อมฺพฏฺโฐ ฯ ปุคฺคลปฺปสนฺนานํ ยทิทํ ชีวโก โกมารภจฺโจ ฯ วิสฺสาสกานํ ยทิทํ นกุลปิตา คหปตีติ ฯ วคฺโค ฉฏฺโฐ ฯ