๔. เอกาสนทายิกาเถริยาปทาน

๑๕๔|๑๕๔.๓๖| นคเร หํสวติยา อโหสึ มาลิกา ตทา มาตา จ เม ปิตา เจว กมฺมนฺตํ อคมํสุ เต ฯ |๑๕๔.๓๗| มชฺฌนฺติกมฺหิ สุริเย อทฺทสํ สมณํ อหํ วีถิยา อนุคจฺฉนฺตํ อาสนํ ปญฺญเปสหํ ฯ |๑๕๔.๓๘| โคณกจิตฺตกาทีหิ ปญฺญาเปตฺวาหมาสนํ ปสนฺนจิตฺตา สุมนา อิมํ วจนมพฺรวึ ฯ |๑๕๔.๓๙| สนฺตตฺตา กฐิตา ภูมิ สูโร มชฺฌนฺติโก ฐิโต มาตุลา จ น วายนฺติ กาโล เจวตฺถเมหิติ ฯ |๑๕๔.๔๐| ปญฺญตฺตมาสนมิทํ ตวตฺถาย มหามุนิ อนุกมฺปํ อุปาทาย นิสีท มม อาสเน ฯ |๑๕๔.๔๑| นิสีทิ ตตฺถ สมโณ สุทนฺโต สุทฺธมานโส ตสฺส ปตฺตํ คเหตฺวาน ยถารนฺธํ อทาสหํ ฯ |๑๕๔.๔๒| เตน กมฺเมน สุกเตน เจตนาปณิธีหิ จ ชหิตฺวา มานุสํ เทหํ ตาวตึสํ อคญฺฉหํ ฯ |๑๕๔.๔๓| ตตฺถ เม สุกตํ พฺยมฺหํ อาสเนน สุนิมฺมิตํ สฏฺฐิโยชนมุพฺเพธํ ตึสโยชนวิตฺถตํ ฯ |๑๕๔.๔๔| โสณฺณมยา มณิมยา อโถปิ ผลิกามยา โลหิตงฺกมยา เจว ปลฺลงฺกา วิวิธา มม ฯ |๑๕๔.๔๕| ตูลิกาวิกตีหิ จ กฏิสฺสาจิตฺตกาหิ จ อุทฺธํ เอกนฺตโลมิ จ ปลฺลงฺกา เม สุสณฺฐิตา ฯ |๑๕๔.๔๖| ยทา อิจฺฉามิ คมนํ หาสขิฑฺฑาสมปฺปิตา สห ปลฺลงฺกเสฏฺเฐน คจฺฉามิ มม ปตฺถิตํ ฯ |๑๕๔.๔๗| อสีติเทวราชูนํ มเหสิตฺตมการยึ สตฺตติจกฺกวตฺตีนํ มเหสิตฺตมการยึ ฯ |๑๕๔.๔๘| ภวาภเว สํสรนฺตี มหาโภคํ ลภามหํ โภเค เม อูนตา นตฺถิ เอกาสนผลํ อิทํ ฯ |๑๕๔.๔๙| ทุเว ภเว สํสรามิ เทวตฺเต อถ มานุเส อญฺเญ ภเว น ชานามิ เอกาสนผลํ อิทํ ฯ |๑๕๔.๕๐| ทุเว กุเล ปชายามิ ขตฺติเย จาปิ พฺราหฺมเณ อุจฺจากุลิกา สพฺพตฺถ เอกาสนผลํ อิทํ ฯ |๑๕๔.๕๑| โทมนสฺสํ น ชานามิ จิตฺตสนฺตาปนํ มม เววณฺณิยํ น ชานามิ เอกาสนผลํ อิทํ ฯ |๑๕๔.๕๒| ธาติโย มํ อุปฏฺฐนฺติ ขุชฺชา เจลาวกา พหู องฺเคน องฺคํ คจฺฉามิ เอกาสนผลํ อิทํ ฯ |๑๕๔.๕๓| อญฺญา มเมว นฺหาเปนฺติ อญฺญา โภเชนฺติ โภชนํ อญฺญา มํ อลงฺกโรนฺติ อญฺญา รเมนฺติ มํ สทา ฯ |๑๕๔.๕๔| อญฺญา คนฺธํ วิลิมฺปนฺติ เอกาสนผลํ อิทํ มณฺฑเป รุกฺขมูเล วา สุญฺญาคาเร วสนฺติยา ฯ |๑๕๔.๕๕| มม สงฺกปฺปมญฺญาย ปลฺลงฺโก อุปติฏฺฐติ อยํ ปจฺฉิมโก มยฺหํ จริโม วตฺตเต ภโว ฯ |๑๕๔.๕๖| อชฺชาปิ รชฺชํ ฉฑฺเฑตฺวา ปพฺพชึ อนคาริยํ สตสหสฺเส อิโต กปฺเป ยํ ทานมททึ ตทา ฯ ทุคฺคตึ นาภิชานามิ เอกาสนผลํ อิทํ |๑๕๔.๕๗| กิเลสา ฌาปิตา มยฺหํ ภวา สพฺเพ สมูหตา นาคีว พนฺธนํ เฉตฺวา วิหรามิ อนาสวา ฯ |๑๕๔.๕๘| สฺวาคตํ วต เม อาสิ พุทฺธเสฏฺฐสฺส สนฺติเก ติสฺโส วิชฺชา อนุปฺปตฺตา กตํ พุทฺธสฺส สาสนํ ฯ |๑๕๔.๕๙| ปฏิสมฺภิทา จตสฺโส วิโมกฺขาปิจ อฏฺฐิเม ฉฬภิญฺญา สจฺฉิกตา กตํ พุทฺธสฺส สาสนนฺติ ฯ อิตฺถํ สุทํ อายสฺมา เอกาสนทายิกา ภิกฺขุนี อิมา คาถาโย อภาสิตฺถาติ ฯ เอกาสนทายิกาเถริยา อปทานํ สมตฺตํ ฯ