๑. ชคติทายกเถราปทาน

๔๑|๔๑.๑| ธมฺมทสฺสิสฺส มุนิโน โพธิยา ปาทปุตฺตเม ปสนฺนจิตฺโต สุมโน ชคตึ การยึ อหํ ฯ |๔๑.๒| ทริโต ปพฺพตาโต วา รุกฺขโต ปติโต อหํ จุโต ปติฏฺฐํ วินฺทามิ ชคติยา อิทํ ผลํ ฯ |๔๑.๓| น เม โจรา วิเหสนฺติ นาติมญฺญนฺติ ขตฺติยา สพฺพามิตฺเตติกฺกมามิ ชคติยา อิทํ ผลํ ฯ |๔๑.๔| ยํ ยํ โยนูปปชฺชามิ เทวตฺตํ อถ มานุสํ สพฺพตฺถ ปูชิโต โหมิ ชคติยา อิทํ ผลํ ฯ |๔๑.๕| อฏฺฐารเส กปฺปสเต ชคตึ การยึ อหํ ทุคฺคตึ นาภิชานามิ ชคติทานสฺสิทํ ผลํ ฯ |๔๑.๖| กิเลสา ฌาปิตา มยฺหํ ภวา สพฺเพ สมูหตา นาโคว พนฺธนํ เฉตฺวา วิหรามิ อนาสโว ฯ |๔๑.๗| สฺวาคตํ วต เม อาสิ มม พุทฺธสฺส สนฺติเก ติสฺโส วิชฺชา อนุปฺปตฺตา กตํ พุทฺธสฺส สาสนํ ฯ |๔๑.๘| ปฏิสมฺภิทา จตสฺโส วิโมกฺขาปิจ อฏฺฐิเม ฉฬภิญฺญา สจฺฉิกตา กตํ พุทฺธสฺส สาสนนฺติ ฯ อิตฺถํ สุทํ อายสฺมา ชคติทายโก เถโร อิมา คาถาโย อภาสิตฺถาติ ฯ ชคติทายกตฺเถรสฺส อปทานํ สมตฺตํ ฯ