๑๒. มุนีสูตร

๓๑๓|๓๑๓.๖๓๒| ๑๒ สนฺถวาโต ภยํ ชาตํ กิเกตา ชายเต รโช อนิเกตมสนฺถวํ เอตํ เว มุนิทสฺสนํ ฯ |๓๑๓.๖๓๓| โย ชาตมุจฺฉิชฺช น โรปเยยฺย ชายนฺตมสฺส นานุปฺปเวจฺเฉ ตมาหุ เอกํ มุนินํ จรนฺตํ อทฺทกฺขิ โส สนฺติปทํ มเหสิ ฯ |๓๑๓.๖๓๔| สงฺขาย วตฺถูนิ ปมาย พีชํ สิเนหมสฺส นานุปฺปเวจฺเฉ ส เว มุนิ ชาติขยนฺตทสฺสี ตกฺกํ ปหาย น อุเปติ สงฺขํ ฯ |๓๑๓.๖๓๕| อญฺญาย สพฺพานิ นิเวสนานิ อนิกามยํ อญฺญตรมฺปิ เตสํ ส เว มุนิ วีตเคโธ อคิทฺโธ นายูหตี ปารคโต หิ โหติ ฯ |๓๑๓.๖๓๖| สพฺพาภิภุํ สพฺพวิทุํ สุเมธํ สพฺเพสุ ธมฺเมสุ อนูปลิตฺตํ สพฺพญฺชหํ ตณฺหกฺขเย วิมุตฺตํ ตํ วาปิ ธีรา มุนิ เวทยนฺติ ฯ |๓๑๓.๖๓๗| ปญฺญาพลํ สีวลตูปปนฺนํ สมาหิตํ ฌานรตํ สตีมํ สงฺคา ปมุตฺตํ อขิลํ อนาสวํ ตํ วาปิ ธีรา มุนิ เวทยนฺติ ฯ |๓๑๓.๖๓๘| เอกํ จรนฺตํ มุนิ อปฺปมตฺตํ นินฺทาปสํสาสุ อเวธมานํ สีหํว สทฺเทสุ อสนฺตสนฺตํ วาตํว ชาลมฺหิ อสชฺชมานํ ปทุมํว โตเยน อลิมฺปมานํ เนตารมญฺเญสมนญฺญเนยฺยํ ตํ วาปิ ธีรา มุนิ เวทยนฺติ ฯ |๓๑๓.๖๓๙| โย โอคหเณ ถมฺโภริวาภิชายติ ยสฺมึ ปเร วาจาปริยนฺตํ วทนฺติ ตํ วีตราคํ สุสมาหิตินฺทฺริยํ ตํ วาปิ ธีรา มุนิ เวทยนฺติ ฯ |๓๑๓.๖๔๐| โย เว ฐิตตฺโต ตสรํว อุชฺชุํ ชิคุจฺฉติ กมฺเมหิ ปาปเกหิ วีมํสมาโน วิสมํ สมญฺจ ตํ วาปิ ธีรา มุนิ เวทยนฺติ ฯ |๓๑๓.๖๔๑| โย สญฺญตตฺโต น กโรติ ปาปํ ทหโร จ มชฺโฌ จ มุนี ยตตฺโต อโรสเนยฺโย น โรเสติ กญฺจิ ตํ วาปิ ธีรา มุนิ เวทยนฺติ ฯ |๓๑๓.๖๔๒| ยทคฺคโต มชฺฌโต เสสโต วา ปิณฺฑํ ลเภถ ปรทตฺตูปชีวี นาลํ ถุตุํ นาปิ นิปจฺจวาที ตํ วาปิ ธีรา มุนิ เวทยนฺติ ฯ |๓๑๓.๖๔๓| มุนึ จรนฺตํ วิรตํ เมถุนสฺมา โย โยพฺพเน น อุปนิภชฺฌเต กฺวจิ มทปฺปมาทา วิรตํ วิปฺปยุตฺตํ ตํ วาปิ ธีรา มุนิ เวทยนฺติ ฯ |๓๑๓.๖๔๔| อญฺญาย โลกํ ปรมตฺถทสฺสึ โอฆํ สมุทฺทํ อติตริย ตาทึ ตํ ฉินฺนคนฺถํ อสิตํ อนาสวํ ตํ วาปิ ธีรา มุนิ เวทยนฺติ ฯ |๓๑๓.๖๔๕| อสฺมา อุโภ ทูรวิหารวุตฺติโน คิหี ทารโปสี อมโม จ สุพฺพโต ปรปาณโรธาย คิหี อสญฺญโต นิจฺจํ มุนี รกฺขติ ปาณิเน ยโต ฯ |๓๑๓.๖๔๖| สิขี ยถา นีลคิโว วิหงฺคโม หํสสฺส โนเปติ ชวํ กุทาจนํ เอวํ คิหี นานุกโรติ ภิกฺขุโน มุนิโน วิวิตฺตสฺส วนมฺหิ ฌายโตติ ฯ มุนิสุตฺตํ ทฺวาทสมํ ฯ อุรควคฺโค ปฐโม ตสฺสุทฺทานํ อุรโค ธนิโย ขคฺค วิสาโณ กสิ จุนฺท จ ปราภโว วสโล เมตฺต เหมวตาฬวโก อถ วิชยํ มุนิ อุรค วคฺคํ วทนฺติ พารส ฯ ------------