๙. ปทุมเถราปทาน (๕๙)

๖๑|๖๑.๖๗| จตุสจฺจํ ปกาเสนฺโต วรธมฺมํ ปวตฺตโก วสฺสเต อมตํ วุฏฺฐึ นิพฺพาเปนฺโต มหาชนํ ฯ |๖๑.๖๘| สธชํ ปทุมํ คยฺห อฑฺฒโกเส ฐิโต อหํ ปทุมุตฺตรมุนิสฺส หฏฺโฐ อุกฺขิปิมมฺพเร ฯ |๖๑.๖๙| อาคจฺฉนฺเต จ ปทุเม อพฺภูโต อาสิ ตาวเท มม สงฺกปฺปมญฺญาย ปคฺคณฺหิ วทตํ วโร ฯ |๖๑.๗๐| กรเสฏฺเฐน ปคฺคยฺห ชลชํ ปุปฺผมุตฺตมํ ภิกฺขุสงฺเฆ ฐิโต สตฺถา อิมา คาถา อภาสถ ฯ |๖๑.๗๑| เยนิทํ ปทุมํ ขิตฺตํ สพฺพญฺญุตฺตมนายเก ตมหํ กิตฺตยิสฺสามิ สุณาถ มม ภาสโต ฯ |๖๑.๗๒| ตึสกปฺปานิ เทวินฺโท เทวรชฺชํ กริสฺสติ ปฐพฺยา รชฺชํ สตฺตสตํ วสุธํ อาวสิสฺสติ ฯ |๖๑.๗๓| ตตฺถ สตฺตํ คเหตฺวาน จกฺกวตฺติ ภวิสฺสติ อากาสโต ปุปฺผวุฏฺฐิ อภิวสฺสิสฺสตี ตทา ฯ |๖๑.๗๔| กปฺเป สตสหสฺสมฺหิ โอกฺกากกุลสมฺภโว โคตโม นาม นาเมน สตฺถา โลเก ภวิสฺสติ ฯ |๖๑.๗๕| ตสฺส ธมฺเมสุ ทายาโท โอรโส ธมฺมนิมฺมิโต สพฺพาสเว ปริญฺญาย นิพฺพายิสฺสตฺยนาสโว ฯ |๖๑.๗๖| นิกฺขมิตฺวาน กุจฺฉิมฺหา สมฺปชาโน ปฏิสฺสโต ชาติยา ปญฺจวสฺโสหํ อรหตฺตํ อปาปุณึ ฯ |๖๑.๗๗| ปฏิสมฺภิทา จตสฺโส วิโมกฺขาปิจ อฏฺฐิเม ฉฬภิญฺญา สจฺฉิกตา กตํ พุทฺธสฺส สาสนนฺติ ฯ อิตฺถํ สุทํ อายสฺมา ปทุโม เถโร อิมา คาถาโย อภาสิตฺถาติ ฯ ปทุมตฺเถรสฺส อปทานํ สมตฺตํ ฯ