๕. นฬมาลิกาเถริยาปทาน

๑๔๕|๑๔๕.๓๗| จนฺทภาคานทีตีเร อโหสึ กินฺนรี ตทา อทฺทสํ วิรชํ พุทฺธํ สยมฺภุํ อปราชิตํ ฯ |๑๔๕.๓๘| ปสนฺนจิตฺตา สุมนา เวทชาตา กตญฺชลี นฬมาลํ คเหตฺวาน สยมฺภุํ อภิปูชยึ ฯ |๑๔๕.๓๙| เตน กมฺเมน สุกเตน เจตนาปณิธีหิ จ ชหิตฺวา กินฺนรีเทหํ อคจฺฉึ ติทสํ คณํ ฯ |๑๔๕.๔๐| ฉตฺตึสเทวราชูนํ มเหสิตฺตมการยึ ทสนฺนํ จกฺกวตฺตีนํ มเหสิตฺตมการยึ ฯ เวทยิตฺวาน กุสลํ ปพฺพชึ อนคาริยํ |๑๔๕.๔๑| กิเลสา ฌาปิตา มยฺหํ ภวา สพฺเพ สมูหตา สพฺพาสวา ปริกฺขีณา นตฺถิ ทานิ ปุนพฺภโว ฯ |๑๔๕.๔๒| จตุนวุเต อิโต กปฺเป ยํ ปุปฺผมภิปูชยึ ทุคฺคตึ นาภิชานามิ พุทฺธปูชายิทํ ผลํ ฯ |๑๔๕.๔๓| กิเลสา ฌาปิตา มยฺหํ ภวา สพฺเพ สมูหตา นาคีว พนฺธนํ เฉตฺวา วิหรามิ อนาสวา ฯ |๑๔๕.๔๔| สฺวาคตํ วต เม อาสิ พุทฺธเสฏฺฐสฺส สนฺติเก ติสฺโส วิชฺชา อนุปฺปตฺตา กตํ พุทฺธสฺส สาสนํ ฯ |๑๔๕.๔๕| ปฏิสมฺภิทา จตสฺโส วิโมกฺขาปิจ อฏฺฐิเม ฉฬภิญฺญา สจฺฉิกตา กตํ พุทฺธสฺส สาสนนฺติ ฯ อิตฺถํ สุทํ นฬมาลิกา ภิกฺขุนี อิมา คาถาโย อภาสิตฺถาติ ฯ นฬมาลิกาเถริยา อปทานํ สมตฺตํ ฯ