๑๐. ปฏาจาราเถริยาปทาน

๑๖๐|๑๖๐.๔๖๖| ปทุมุตฺตโร นาม ชิโน สพฺพธมฺมาน ปารคู อิโต สตสหสฺสมฺหิ กปฺเป อุปฺปชฺชิ นายโก ฯ |๑๖๐.๔๖๗| ตทาหํ หํสวติยํ ชาตา เสฏฺฐิกุเล อหุ นานารตนปชฺโชเต มหาสุขสมปฺปิตา ฯ |๑๖๐.๔๖๘| อุเปตฺวา ตํ มหาวีรํ อสฺโสสึ ธมฺมเทสนํ ตโต ชาตปฺปสาทาหํ อุเปสึ สรณํ ชินํ ฯ |๑๖๐.๔๖๙| ตโต วินยธารีนํ อคฺคํ วณฺเณสิ นายโก ภิกฺขุนึ ลชฺชินึ ตาทึ กปฺปากปฺปวิสารทํ ฯ |๑๖๐.๔๗๐| ตทา มุทิตจิตฺตาหํ ตํ ฐานํ อภิกงฺขยึ นิมนฺเตตฺวา ทสพลํ สสงฺฆํ โลกนายกํ ฯ |๑๖๐.๔๗๑| โภชยิตฺวาน สตฺตาหํ ททิตฺวา ปตฺตจีวรํ นิปจฺจ สิรสา ปาเท อิมํ วจนมพฺรวึ ฯ |๑๖๐.๔๗๒| ยา ตยา วณฺณิตา ธีร อิโต อฏฺฐมเก มุนิ ตาทิสาหํ ภวิสฺสามิ ยทิ สิชฺฌติ นายก ฯ |๑๖๐.๔๗๓| ตทา อโวจ มํ สตฺถา ภทฺเท มา ภายิ อสฺสส อนาคตมฺหิ อทฺธาเน ลจฺฉเสตํ มโนรถํ ฯ |๑๖๐.๔๗๔| สตสหสฺเส อิโต กปฺเป โอกฺกากกุลสมฺภโว โคตโม นาม นาเมน สตฺถา โลเก ภวิสฺสติ ฯ |๑๖๐.๔๗๕| ตสฺส ธมฺเมสุ ทายาทา โอรสา ธมฺมนิมฺมิตา ปฏาจาราติ นาเมน เหสฺสติ สตฺถุสาวิกา ฯ |๑๖๐.๔๗๖| ตทาหํ มุทิตา หุตฺวา ยาวชีวํ ตทา ชินํ เมตฺตจิตฺตา ปริจรึ สสงฺฆํ โลกนายกํ ฯ |๑๖๐.๔๗๗| เตน กมฺเมน สุกเตน เจตนาปณิธีหิ จ ชหิตฺวา มานุสํ เทหํ ตาวตึสํ อคญฺฉหํ ฯ |๑๖๐.๔๗๘| อิมมฺหิ ภทฺทเก กปฺเป พฺรหฺมพนฺธุ มหายโส กสฺสโป นาม นาเมน อุปฺปชฺชิ วทตํ วโร ฯ |๑๖๐.๔๗๙| อุปฏฺฐาโก มเหสิสฺส ตทา อาสิ นริสฺสโร กาสิราชา กิกี นาม พาราณสิปุรุตฺตเม ฯ |๑๖๐.๔๘๐| ตสฺสาสึ ตติยา ธีตา ภิกฺขุนี อิติ วิสฺสุตา ธมฺมํ สุตฺวา ชินคฺคสฺส ปพฺพชฺชํ สมโรจยึ ฯ |๑๖๐.๔๘๑| อนุชานิ น โน ตาโต อคาเรว ตทา มยํ วีสํ วสฺสสหสฺสานิ วิจริมฺห อตนฺทิตา ฯ |๑๖๐.๔๘๒| โกมาริพฺรหฺมจริยํ ราชกญฺญา สุเขฏฺฐิตา พุทฺโธปฏฺฐานนิรตา มุทิตา สตฺต ธีตโร ฯ |๑๖๐.๔๘๓| สมณี สมณคุตฺตา จ ภิกฺขุนี ภิกฺขุทาสิกา ธมฺมา เจว สุธมฺมา จ สตฺตมี สงฺฆทาสิกา ฯ |๑๖๐.๔๘๔| อหํ อุปฺปลวณฺณา จ เขมา ภทฺทา จ ภิกฺขุนี กิสาโคตมี ธมฺมทินฺนา วิสาขา โหติ สตฺตมี ฯ |๑๖๐.๔๘๕| เตหิ กมฺเมหิ สุกเตหิ เจตนาปณิธีหิ จ ชหิตฺวา มานุสํ เทหํ ตาวตึสํ อคญฺฉหํ ฯ |๑๖๐.๔๘๖| ปจฺฉิเม จ ภเว ทานิ ชาตา เสฏฺฐิกุเล อหํ สาวตฺถิยํ ปุรวเร อิทฺเธ ผีเต มหทฺธเน ฯ |๑๖๐.๔๘๗| ยทา จ โยพฺพนูเปตา วิตกฺกวสคา อหํ นรญฺชานปทํ ทิสฺวา เตน สทฺธึ อคญฺฉหํ ฯ |๑๖๐.๔๘๘| เอกปุตฺตปฺปสุตาหํ ทุติโย กุจฺฉิยา มม ตทาหํ มาตาปิตโร อิกฺขามีติ สุนิจฺฉิตา ฯ |๑๖๐.๔๘๙| นาโรเจสึ ปตึ มยฺหํ ตทา ตมฺหิ ปวาสิเต เอกิกา นิคฺคตา เคหา คนฺตุํ สาวตฺถิมุตฺตมํ ฯ |๑๖๐.๔๙๐| ตโต เม สามิ อาคนฺตฺวา สมฺภาเวสิ ปเถ มมํ ตทา เม กมฺมชา วาตา อุปฺปนฺนา อติทารุณา ฯ |๑๖๐.๔๙๑| อุทิโตว มหาเมโฆ ปสูติสมเย มม ทพฺพตฺถาย ตทา คนฺตฺวา สามิ สปฺเปน มาริโต ฯ |๑๖๐.๔๙๒| ตทา วิชาตทุกฺเขน อนาถา กปณา อหํ กุนฺนทึ ปูริตํ ทิสฺวา คจฺฉนฺตี สกุลาลยํ ฯ |๑๖๐.๔๙๓| พาลํ อาทาย โอตรึ ปารกูเล จ เอกิกา ปาเยตฺวา พาลกํ ปุตฺตํ อิตรํ ตารณายหํ ฯ |๑๖๐.๔๙๔| นิวตฺตา อุกฺกุโส หาสิ ตรุณํ วิลปนฺตกํ อิตรญฺจ วหิ โสโต สาหํ โสกสมปฺปิตา ฯ |๑๖๐.๔๙๕| สาวตฺถินครํ คนฺตฺวา อสฺโสสึ สชเน มเต ตทา อโวจ โสกฏฺฏา มหาโสกสมปฺปิตา ฯ |๑๖๐.๔๙๖| อุโภ ปุตฺตา กาลกตา วเน มยฺหํ ปติ มโต มาตา ปิตา จ ภาตา จ เอกจิตมฺหิ ฑยฺหเร ฯ |๑๖๐.๔๙๗| ตทา กิสา จ ปณฺฑุ จ อนาถา ทินมานสา อิโต ตโต คจฺฉนฺตีหํ อทฺทสํ นรสารถึ ฯ |๑๖๐.๔๙๘| ตโต อโวจ มํ สตฺถา ปุตฺเต มา โสจิ อสฺสส อตฺตานํ เต คเวสสฺสุ กึ นิรตฺถํ วิหญฺญสิ ฯ |๑๖๐.๔๙๙| น สนฺติ ปุตฺตา ตาณาย น ญาติ นปิ พนฺธวา อนฺตเกนาธิปนฺนสฺส นตฺถิ ญาตีสุ ตาณตา ฯ |๑๖๐.๕๐๐| ตํ สุตฺวา มุนิโน วากฺยํ ปฐมํ ผลมชฺฌคํ ปพฺพชิตฺวาน น จิรํ อรหตฺตํ อปาปุณึ ฯ |๑๖๐.๕๐๑| อิทฺธีสุ จ วสี โหมิ ทิพฺพาย โสตธาตุยา ปรจิตฺตานิ ชานามิ สตฺถุ สาสนการิกา ฯ |๑๖๐.๕๐๒| ปุพฺเพนิวาสํ ชานามิ ทิพฺพจกฺขุํ วิโสธิตํ เขเปตฺวา อาสเว สพฺเพ วิสุทฺธาสึ สุนิมฺมลา ฯ |๑๖๐.๕๐๓| ตโตหํ วินยํ สพฺพํ สนฺติเก สพฺพทสฺสิโน อุคฺคหึ สพฺพวิตฺถารํ พฺยาหรึ จ ยถาตถํ ฯ |๑๖๐.๕๐๔| ชิโน ตสฺมึ คุเณ ตุฏฺโฐ เอตทคฺเค ฐเปสิ มํ อคฺคํ วินยธารีนํ ปฏาจาราว เอกิกา ฯ |๑๖๐.๕๐๕| ปริจิณฺโณ มยา สตฺถา กตํ พุทฺธสฺส สาสนํ โอหิโต ครุโก ภาโร ภวเนตฺติ สมูหตา ฯ |๑๖๐.๕๐๖| ยสฺส อตฺถาย ปพฺพชิตา อคารสฺมา อนคาริยํ โส เม อตฺโถ อนุปฺปตฺโต สพฺพสํโยชนกฺขโย ฯ |๑๖๐.๕๐๗| กิเลสา ฌาปิตา มยฺหํ ภวา สพฺเพ สมูหตา นาคีว พนฺธนํ เฉตฺวา วิหรามิ อนาสวา ฯ |๑๖๐.๕๐๘| สฺวาคตํ วต เม อาสิ พุทฺธเสฏฺฐสฺส สนฺติเก ติสฺโส วิชฺชา อนุปฺปตฺตา กตํ พุทฺธสฺส สาสนํ ฯ |๑๖๐.๕๐๙| ปฏิสมฺภิทา จตสฺโส วิโมกฺขาปิจ อฏฺฐิเม ฉฬภิญฺญา สจฺฉิกตา กตํ พุทฺธสฺส สาสนนฺติ ฯ อิตฺถํ สุทํ ปฏาจารา ภิกฺขุนี อิมา คาถาโย อภาสิตฺถาติ ฯ ปฏาจาราเถริยา อปทานํ สมตฺตํ ฯ อุทฺทานํ เอกุโปสถิกา เจว สลฬา จาถ โมทกา เอกาสนา ปญฺจทีปา นฬมาลี จ โคตมี ฯ เขมา อุปฺปลวณฺณา จ ปฏาจารา จ ภิกฺขุนี คาถาสตานิ ปญฺเจว นว จาปิ ตทุตฺตริ ฯ เอกุโปสถวคฺโค ทุติโย ฯ --------------