[๕๑๒] กุศลธรรม เป็นปัจจัยแก่กุศลธรรม โดยสมนันตรปัจจัย เป็นต้น

๕๑๒กุสโล ธมฺโม กุสลสฺส ธมฺมสฺส สมนนฺตรปจฺจเยน ปจฺจโย ปุริมา ปุริมา กุสลา ขนฺธา ปจฺฉิมานํ ปจฺฉิมานํ กุสลานํ ขนฺธานํ สมนนฺตรปจฺจเยน ปจฺจโย อนุโลมํ โคตฺรภุสฺส อนุโลมํ โวทานสฺส โคตฺรภุ มคฺคสฺส โวทานํ มคฺคสฺส สมนนฺตรปจฺจเยน ปจฺจโย ฯ

๕๑๓กุสโล ธมฺโม อพฺยากตสฺส ธมฺมสฺส สมนนฺตรปจฺจเยน ปจฺจโย กุสลํ วุฏฺฐานสฺส มคฺโค ผลสฺส เสกฺขานํ อนุโลมํ ผลสมาปตฺติยา นิโรธา วุฏฺฐหนฺตสฺส เนวสญฺญานาสญฺญายตนกุสลํ ผลสมาปตฺติยา สมนนฺตรปจฺจเยน ปจฺจโย ฯ

๕๑๔อกุสโล ธมฺโม อกุสลสฺส ธมฺมสฺส สมนนฺตรปจฺจเยน ปจฺจโย ปุริมา ปุริมา อกุสลา ขนฺธา ปจฺฉิมานํ ปจฺฉิมานํ อกุสลานํ ขนฺธานํ สมนนฺตรปจฺจเยน ปจฺจโย ฯ

๕๑๕อกุสโล ธมฺโม อพฺยากตสฺส ธมฺมสฺส สมนนฺตรปจฺจเยน ปจฺจโย อกุสลํ วุฏฺฐานสฺส สมนนฺตรปจฺจเยน ปจฺจโย ฯ

๕๑๖อพฺยากโต ธมฺโม อพฺยากตสฺส ธมฺมสฺส สมนนฺตรปจฺจเยน ปจฺจโย ปุริมา ปุริมา วิปากาพฺยากตา กิริยาพฺยากตา ขนฺธา ปจฺฉิมานํ ปจฺฉิมานํ วิปากาพฺยากตานํ กิริยาพฺยากตานํ ขนฺธานํ สมนนฺตรปจฺจเยน ปจฺจโย ภวงฺคํ อาวชฺชนาย กิริยํ วุฏฺฐานสฺส อรหโต อนุโลมํ ผลสมาปตฺติยา นิโรธา วุฏฺฐหนฺตสฺส เนวสญฺญานาสญฺญายตนกิริยํ ผลสมาปตฺติยา สมนนฺตรปจฺจเยน ปจฺจโย ฯ

๕๑๗อพฺยากโต ธมฺโม กุสลสฺส ธมฺมสฺส สมนนฺตรปจฺจเยน ปจฺจโย อาวชฺชนา กุสลานํ ขนฺธานํ สมนนฺตรปจฺจเยน ปจฺจโย ฯ

๕๑๘อพฺยากโต ธมฺโม อกุสลสฺส ธมฺมสฺส สมนนฺตรปจฺจเยน ปจฺจโย อาวชฺชนา อกุสลานํ ขนฺธานํ สมนนฺตรปจฺจเยน ปจฺจโย ฯ