Scripture · พระสุตตันตปิฎก · Other items in this volumeเล่ม ๑๘ · สังยุตตนิกาย สฬายตนวรรค
๕. นาสยิตถสูตร
พระไตรปิฎกภาษาไทย ฉบับหลวง · Public domain (term expired) — operator determination
๔๘๙ปญฺจิมานิ ภิกฺขเว มาตุคามสฺส พลานิ ฯ กตมานิ ปญฺจ ฯ รูปพลํ โภคพลํ ญาติพลํ ปุตฺตพลํ สีลพลํ ฯ
๔๙๐รูปพเลน จ ภิกฺขเว มาตุคาโม สมนฺนาคโต โหติ น จ สีลพเลน นาเสนฺเตว นํ กุเล น วาเสนฺติ ฯ รูปพเลน จ ภิกฺขเว มาตุคาโม สมนฺนาคโต โหติ โภคพเลน จ น จ สีลพเลน นาเสนฺเตว นํ กุเล น วาเสนฺติ ฯ รูปพเลน จ ภิกฺขเว มาตุคาโม สมนฺนาคโต โหติ โภคพเลน จ ญาติพเลน จ น จ สีลพเลน นาเสนฺเตว นํ กุเล น วาเสนฺติ ฯ รูปพเลน จ ภิกฺขเว มาตุคาโม สมนฺนาคโต โหติ โภคพเลน จ ญาติพเลน จ ปุตฺตพเลน จ น จ สีลพเลน นาเสนฺเตว นํ กุเล น วาเสนฺติ ฯ ยโต จ โข ภิกฺขเว มาตุคาโม รูปพเลน สมนฺนาคโต โหติ โภคพเลน จ ญาติพเลน จ ปุตฺตพเลน จ สีลพเลน จ วาเสนฺเตว นํ กุเล น นาเสนฺติ ฯ สีลพเลน จ ภิกฺขเว มาตุคาโม สมนฺนาคโต โหติ น จ รูปพเลน วาเสนฺเตว นํ กุเล น นาเสนฺติ ฯ สีลพเลน จ ภิกฺขเว มาตุคาโม สมนฺนาคโต โหติ น จ โภคพเลน วาเสนฺเตว นํ กุเล น นาเสนฺติ ฯ สีลพเลน จ ภิกฺขเว มาตุคาโม สมนฺนาคโต โหติ น จ ญาติพเลน วาเสนฺเตว นํ กุเล น นาเสนฺติ ฯ สีลพเลน จ ภิกฺขเว มาตุคาโม สมนฺนาคโต โหติ น จ ปุตฺตพเลน วาเสนฺเตว นํ กุเล น นาเสนฺติ ฯ อิมานิ โข ภิกฺขเว ปญฺจ มาตุคามสฺส พลานีติ ฯ ปญฺจมํ ฯ