๖. เอกปิณฑปาตทายิกาเถริยาปทาน

๑๔๖|๑๔๖.๔๖| นคเร พนฺธุมติยา พนฺธุมา นาม ขตฺติโย ตสฺส รญฺโญ อหํ ภริยา เอกจฺจํ วาทยามหํ ฯ |๑๔๖.๔๗| รโหคตา นิสีทิตฺวา เอวํ จินฺเตสหํ ตทา อาทาย คมนียํ หิ กุสลํ นตฺถิ เม กตํ ฯ |๑๔๖.๔๘| มหาภิตาปํ กฏุกํ โฆรรูปํ สุทารุณํ นิรยํ นูน คจฺฉามิ เอตฺถ เม นตฺถิ สํสโย ฯ |๑๔๖.๔๙| ราชานํ อุปคนฺตฺวาน อิทํ วจนมพฺรวึ เอกํ เม สมณํ เทหิ โภชยิสฺสามิ ขตฺติย ฯ |๑๔๖.๕๐| อทาสิ เม มหาราชา สมณํ ภาวิตินฺทฺริยํ ตสฺส ปตฺตํ คเหตฺวาน ปรมนฺเนน ตปฺปยึ ฯ |๑๔๖.๕๑| ปูชยิตฺวา ปรมนฺนํ คนฺธาเลปํ อกาสหํ ชาเลน ปิทหิตฺวาน ปีตโจเลน ฉาทยึ ฯ |๑๔๖.๕๒| อารมฺมณํ มม เอตํ สรามิ ยาวชีวิตํ ตตฺถ จิตฺตํ ปสาเทตฺวา ตาวตึสํ อคญฺฉหํ ฯ |๑๔๖.๕๓| ตึสานํ เทวราชูนํ มเหสิตฺตมการยึ มนสา ปตฺถิตํ มยฺหํ นิพฺพตฺตติ ยถิจฺฉกํ ฯ |๑๔๖.๕๔| วีสานํ จกฺกวตฺตีนํ มเหสิตฺตมการยึ อุปจิตตฺตา หุตฺวาน สํสรามิ ภวาภเว ฯ |๑๔๖.๕๕| สพฺพพนฺธนมุตฺตาหํ อเปตา เม อุปาทิกา สพฺพาสวปริกฺขีณา นตฺถิ ทานิ ปุนพฺภโว ฯ |๑๔๖.๕๖| เอกนวุเต อิโต กปฺเป ยํ ทานมททึ ตทา ทุคฺคตึ นาภิชานามิ ปิณฺฑปาตสฺสิทํ ผลํ ฯ |๑๔๖.๕๗| กิเลสา ฌาปิตา มยฺหํ ภวา สพฺเพ สมูหตา นาคีว พนฺธนํ เฉตฺวา วิหรามิ อนาสวา ฯ |๑๔๖.๕๘| สฺวาคตํ วต เม อาสิ พุทฺธเสฏฺฐสฺส สนฺติเก ติสฺโส วิชฺชา อนุปฺปตฺตา กตํ พุทฺธสฺส สาสนํ ฯ |๑๔๖.๕๙| ปฏิสมฺภิทา จตสฺโส วิโมกฺขาปิจ อฏฺฐิเม ฉฬภิญฺญา สจฺฉิกตา กตํ พุทฺธสฺส สาสนนฺติ ฯ อิตฺถํ สุทํ เอกปิณฺฑปาตทายิกา ภิกฺขุนี อิมา คาถาโย อภาสิตฺถาติ ฯ เอกปิณฺฑปาตทายิกาเถริยา อปทานํ สมตฺตํ ฯ