๘. เขมาเถริยาปทาน

๑๕๘|๑๕๘.๒๘๗| ปทุมุตฺตโร นาม ชิโน สพฺพธมฺเมสุ จกฺขุมา อิโต สตสหสฺสมฺหิ กปฺเป อุปฺปชฺชิ นายโก ฯ |๑๕๘.๒๘๘| ตทาหํ หํสวติยํ ชาตา เสฏฺฐิกุเล อหุ นานารตนปชฺโชเต มหาสุขสมปฺปิตา ฯ |๑๕๘.๒๘๙| อุเปตฺวา ตํ มหาวีรํ อสฺโสสึ ธมฺมเทสนํ ตโต ชาตปฺปสาทาหํ อุเปสึ สรณํ ชินํ ฯ |๑๕๘.๒๙๐| มาตรํ ปิตรญฺจาหํ อายาจิตฺวา วินายกํ นิมนฺตยิตฺวา สตฺตาหํ โภชยึ สห สาวกํ ฯ |๑๕๘.๒๙๑| อติกฺกนฺเต จ สตฺตาเห มหาปญฺญานมุตฺตมํ ภิกฺขุนึ เอตทคฺคมฺหิ ฐเปสิ นรสารถิ ฯ |๑๕๘.๒๙๒| ตํ สุตฺวา มุทิตา หุตฺวา ปุน ตสฺส มเหสิโน การํ กตฺวาน ตํ ฐานํ ปนิปจฺจ ปณิทหึ ฯ |๑๕๘.๒๙๓| ตโต มํ ส ชิโน อาห สิชฺฌตํ ปณิธิ ตว สสงฺเฆ เม กตํ การํ อปฺปเมยฺยผลํ ตยา ฯ |๑๕๘.๒๙๔| สตสหสฺเส อิโต กปฺเป โอกฺกากกุลสมฺภโว โคตโม นาม นาเมน สตฺถา โลเก ภวิสฺสติ ฯ |๑๕๘.๒๙๕| ตสฺส ธมฺเมสุ ทายาทา โอรสา ธมฺมนิมฺมิตา เอตทคฺคมนุปฺปตฺตา เขมา นาม ภวิสฺสติ ฯ |๑๕๘.๒๙๖| เตน กมฺเมน สุกเตน เจตนาปณิธีหิ จ ชหิตฺวา มานุสํ เทหํ ตาวตึสูปคา อหํ ฯ |๑๕๘.๒๙๗| ตโต จุตา ยามมคํ ตโตหํ ตุสิตํ คตา ตโต จ นิมฺมานรตึ วสวตฺตีปุรํ คตา ฯ |๑๕๘.๒๙๘| ยตฺถ ยตฺถูปปชฺชามิ ตสฺส กมฺมสฺส วาหสา ตตฺถ ตตฺเถว ราชูนํ มเหสิตฺตมการยึ ฯ |๑๕๘.๒๙๙| ตโต จุตา มนุสฺสตฺเต ราชูนํ จกฺกวตฺตินํ มณฺฑลีนญฺจ ราชูนํ มเหสิตฺตมการยึ ฯ |๑๕๘.๓๐๐| สมฺปตฺตึ อนุโภตฺวาน เทเวสุ มานุเสสุ จ สพฺพตฺถ สุขิตา หุตฺวา เนกกปฺเปสุ สํสรึ ฯ |๑๕๘.๓๐๑| เอกนวุเต อิโต กปฺเป วิปสฺสี โลกนายโก อุปฺปชฺชิ จารุทสฺสโน สพฺพธมฺเม วิปสฺสโก ฯ |๑๕๘.๓๐๒| ตมหํ โลกนายกํ อุเปตฺวา นรสารถึ ธมฺมํ ปณีตํ สุตฺวาน ปพฺพชึ อนคาริยํ ฯ |๑๕๘.๓๐๓| ทสวสฺสสหสฺสานิ ตสฺส วีรสฺส สาสเน พฺรหฺมจริยํ จริตฺวาน ยุตฺตโยคา พหุสฺสุตา ฯ |๑๕๘.๓๐๔| ปจฺจยาการกุสลา จตุสจฺจวิสารทา นิปุณา จิตฺตกถิกา สตฺถุสาสนการิกา ฯ |๑๕๘.๓๐๕| ตโต จุตาหํ ตุสิตํ อุปปนฺนา ยสสฺสินี อภิโภสึ ตหึ อญฺเญ พฺรหฺมจริยผเลนหํ ฯ |๑๕๘.๓๐๖| ยตฺถ ยตฺโถปปนฺนาหํ มหาโภคา มหทฺธนา เมธาวินี รูปวตี วินีตปริสาปิจ ฯ |๑๕๘.๓๐๗| ภวามิ เตน กมฺเมน โยเคน ชินสาสเน สพฺพา สมฺปตฺติโย มยฺหํ สุลภา มนโส ปิยา ฯ |๑๕๘.๓๐๘| โยปิ เม ภวเต ภตฺตา ยตฺถ ยตฺถ คตายปิ วิมาเนติ น มํ โกจิ ปฏิปตฺติผเลน เม ฯ |๑๕๘.๓๐๙| อิมมฺหิ ภทฺทเก กปฺเป พฺรหฺมพนฺธุ มหายโส นาเมน โกนาคมโน อุปฺปชฺชิ วทตํ วโร ฯ |๑๕๘.๓๑๐| ตทา หิ พาราณสิยํ สุสมิทฺธิกุลปฺปชา ธนญฺชานี สุเมธา จ อหํปิจ ตโย ชนา ฯ |๑๕๘.๓๑๑| สงฺฆารามํ อทาสิมฺห เนเก สหสฺสิเก มุเน สสงฺฆสฺส วิหารํ หิ อุทฺทิสฺส การิกา มยํ ฯ |๑๕๘.๓๑๒| ตโต จุตา มยํ สพฺพา ตาวตึสูปคา อหุํ ยสสา อคฺคตํ ปตฺตา มนุสฺเสสุ ตเถว จ ฯ |๑๕๘.๓๑๓| อิมสฺมึเยว กปฺปมฺหิ พฺรหฺมพนฺธุ มหายโส กสฺสโป นาม นาเมน อุปฺปชฺชิ วทตํ วโร ฯ |๑๕๘.๓๑๔| อุปฏฺฐาโก มเหสิสฺส ตทา อาสิ นริสฺสโร กาสิราชา กิกี นาม พาราณสิปุรุตฺตเม ฯ |๑๕๘.๓๑๕| ตสฺสาสึ เชฏฺฐกา ธีตา สมณี อิติ วิสฺสุตา ธมฺมํ สุตฺวา ชินคฺคสฺส ปพฺพชฺชํ สมโรจยึ ฯ |๑๕๘.๓๑๖| อนุชานิ น โน ตาโต อคาเรว ตทา มยํ วีสวสฺสสหสฺสานิ วิจริมฺห อตนฺทิตา ฯ |๑๕๘.๓๑๗| โกมาริพฺรหฺมจริยํ ราชกญฺญา สุเข ฐิตา พุทฺโธปฏฺฐานนิรตา มุทิตา สตฺต ธีตโร ฯ |๑๕๘.๓๑๘| สมณี สมณคุตฺตา จ ภิกฺขุนี ภิกฺขุทาสิกา ธมฺมา เจว สุธมฺมา จ สตฺตมี สงฺฆทาสิกา ฯ |๑๕๘.๓๑๙| อหํ อุปฺปลวณฺณา จ ปฏาจารา จ กุณฺฑลา กิสาโคตมี ธมฺมทินฺนา วิสาขา โหติ สตฺตมี ฯ |๑๕๘.๓๒๐| กทาจิ โส นราทิจฺโจ ธมฺมํ เทเสติ อพฺภุตํ มหานิทานสุตฺตนฺตํ สุตฺวา ตํ ปริยาปุณึ ฯ |๑๕๘.๓๒๑| เตหิ กมฺเมหิ สุกเตหิ เจตนาปณิธีหิ จ ชหิตฺวา มานุสํ เทหํ ตาวตึสํ อคญฺฉหํ ฯ |๑๕๘.๓๒๒| ปจฺฉิเม จ ภเว ทานิ สากลายํ ปุรุตฺตเม รญฺโญ มทฺทสฺส ธีตาสึ มนาปา ทยิตา ปิยา ฯ |๑๕๘.๓๒๓| สห เม ชาตมตฺตมฺหิ เขมํ ตมฺหิ ปุเร อหุ ตโต เขมาติ นามํ เม คุณโต อุปปชฺชถ ฯ |๑๕๘.๓๒๔| ยทาหํ โยพฺพนํ ปตฺตา รูปวณฺณวิภูสิตา ตทา อทาสิ มํ ตาโต พิมฺพิสารสฺส ราชิโน ฯ |๑๕๘.๓๒๕| ตสฺสาหํ สุปิยา อาสึ รูปเกลายเน รตา รูปานํ โทสวาทีติ น อุเปมิ มหาทยํ ฯ |๑๕๘.๓๒๖| พิมฺพิสาโร ตทา ราชา มมานุคฺคหพุทฺธิยา วณฺณยิตฺวา เวฬุวนํ คายเก คาปยี มมํ ฯ |๑๕๘.๓๒๗| รมฺมํ เวฬุวนํ เยน น ทิฏฺฐํ สุคตาลยํ น เตน นนฺทนํ ทิฏฺฐํ อิติ มญฺญมฺหเส มยํ ฯ |๑๕๘.๓๒๘| เยน เวฬุวนํ ทิฏฺฐํ นรนนฺทนนนฺทนํ สุทิฏฺฐํ นนฺทนํ เตน อมรินฺทสุนนฺทนํ ฯ |๑๕๘.๓๒๙| วิหาย นนฺทนํ เทวา โอตริตฺวา มหีตเล รมฺมํ เวฬุวนํ ทิสฺวา น ตปฺปนฺติ สุวิมฺหิตา ฯ |๑๕๘.๓๓๐| ราชปุญฺเญน นิพฺพตฺตํ พุทฺธปุญฺเญน ภูสิตํ โก วตฺตา ตสฺส นิสฺเสสํ วนสฺส คุณสญฺจยํ ฯ |๑๕๘.๓๓๑| ตํ สุตฺวา วนสมิทฺธึ มม โสตมโนหรํ ทฏฺฐุกามา ตมุยฺยานํ รญฺโญ อาโรจยึ ตทา ฯ |๑๕๘.๓๓๒| มหตา ปริวาเรน ตทา มํ โส มหีปติ สมฺเปเสสิ ตมุยฺยานํ ทสฺสนาย สมุสฺสุกํ ฯ |๑๕๘.๓๓๓| คจฺฉ ปสฺส มหาโภเค วนํ เนตฺตรสายนํ ยํ สทา ภาติ สิริยา สุคตาภาณุรญฺชิตํ ฯ |๑๕๘.๓๓๔| ยทา จ ปิณฺฑาย มุนิ คิริพฺพชปุรุตฺตมํ ปวิฏฺโฐหํ ตทาเยว วนํ ทฏฺฐุมุปาคมึ ฯ |๑๕๘.๓๓๕| ตทา ตํ สมฺผุลฺลวนํ นานาภมรกุชฺชิตํ โกกิลาคีตสหิตํ มยูรคณนจฺจิตํ ฯ |๑๕๘.๓๓๖| อปฺปสทฺทมนากิณฺณํ นานาจงฺกมภูสิตํ กุฏิมณฺฑปสงฺกิณฺณํ โยคีวิรวิราชิตํ ฯ |๑๕๘.๓๓๗| วิจรนฺตี อมญฺญิสฺสํ สผลํ นยนํ มมํ ตทาปิ ตรุณํ ภิกฺขุํ ยุตฺตํ ทิสฺวา วิจินฺตยึ ฯ |๑๕๘.๓๓๘| อีทิเสปิ วเน รมฺเม ฐิโตยํ นวโยพฺพเน วสนฺตมิว กนฺเตน รูเปน สุสมนฺวิโต ฯ |๑๕๘.๓๓๙| นิสินฺโน รุกฺขมูลมฺหิ มุณฺโฑ สงฺฆาฏิปารุโต ฌายเต วตยํ ภิกฺขุ หิตฺวา วิสยชํ รตึ ฯ |๑๕๘.๓๔๐| นนุ นาม คหฏฺเฐน กามํ ภุตฺวา ยถาสุขํ ปจฺฉา ชิณฺเณน ธมฺโมยํ จริตพฺโพ สุภทฺทโก ฯ |๑๕๘.๓๔๑| สุญฺญกนฺติ วิทิตฺวาน คนฺธเคหํ ชินาลยํ อุเปตฺวา ชินมทฺทกฺขึ อุทยนฺตํว ภากรํ ฯ |๑๕๘.๓๔๒| เอกกํ สุขมาสีนํ วีชมานํ วริตฺถิยา ทิสฺวาเนวํ วิจินฺเตสึ นายํ ลูโข นราสโภ ฯ |๑๕๘.๓๔๓| สา กญฺญา กนกาภาสา ปทุมานนโลจนา พิมฺโพฏฺฐิ กุนฺททสฺสนา มโนเนตฺตรสายนา ฯ |๑๕๘.๓๔๔| เหมโทลา สุวทนา กมลาการสุตฺถนี เวทิมชฺฌา วรโสณี รมฺโมรู จารุภูสนา ฯ |๑๕๘.๓๔๕| รตฺตํสกุปสมฺพฺยานา นีลมฏฺฐนิวาสนา อตปฺปเนยฺยรูเปน สพฺพาภรณมณฺฑิตา ฯ |๑๕๘.๓๔๖| ทิสฺวา ตเมวํ จินฺเตสึ อโหยมติรูปินี น มยาเนน เนตฺเตน ทิฏฺฐปุพฺพา กุทาจนํ ฯ |๑๕๘.๓๔๗| ตโต ชราภิภูตา สา วิวณฺณา วิกตานนา ฉินฺนทนฺตา เสตสิรา สลาลา วทนาสุจิ ฯ |๑๕๘.๓๔๘| สงฺขิตฺตกณฺณา เสตกฺขี ลมฺพาสุภปโยธรา วลีวิตตสพฺพงฺคี สิราวิตตเทหินี ฯ |๑๕๘.๓๔๙| นตงฺคี ทณฺฑทุติยา อุปณฺฑุปณฺฑุกา กิสา ปเวธมานา ปติตา นิสฺสสนฺตี มหุํ มหุํ ฯ |๑๕๘.๓๕๐| ตโต เม อาสิ สํเวโค อพฺภูโต โลมหํสโน ธิรตฺถุ รูปํ อสุจึ รมนฺเต ยตฺถ พาลิสา ฯ |๑๕๘.๓๕๑| ตทา มหาการุณิโก ทิสฺวา สํวิคฺคมานสํ อุทคฺคจิตฺโต สุมโน อิมา คาถา อภาสถ ฯ |๑๕๘.๓๕๒| อาตุรํ อสุจึ ปูตึ ปสฺส เขเม สมุสฺสยํ อุคฺฆรนฺตํ ปคฺฆรนฺตํ พาลานํ อภินนฺทิตํ ฯ |๑๕๘.๓๕๓| อสุภาย จิตฺตํ ภาเวหิ เอกคฺคํ สุสมาหิตํ สติ กายคตา ตฺยตฺถุ นิพฺพิทาพหุลา ภว ฯ |๑๕๘.๓๕๔| ยถา อิทํ ตถา เอตํ ยถา เอตํ ตถา อิทํ อชฺฌตฺตญฺจ พหิทฺธา จ กาเย ฉนฺทํ วิราชย ฯ |๑๕๘.๓๕๕| อนิมิตฺตญฺจ ภาเวหิ มานานุสย ปชฺชห ตโต มานาภิสมยา อุปสนฺตา จริสฺสสิ ฯ |๑๕๘.๓๕๖| เย ราครตฺตานุปตนฺติ โสตํ สยํ กตํ มกฺกฏโกว ชาลํ เอตมฺปิ เฉตฺวาน ปริพฺพชนฺติ อนเปกฺขิโน กามสุขํ ปหาย ฯ |๑๕๘.๓๕๗| ตโต กลฺลิกจิตฺตํ มํ ญตฺวาน นรสารถิ มหานิทานํ เทเสสิ สุตฺตนฺตํ วินยาย เม ฯ |๑๕๘.๓๕๘| สุตฺวา สุตฺตนฺตเสฏฺฐนฺต ปุพฺพสญฺญมนุสฺสรึ ตตฺถฏฺฐิตาวหํ สนฺตี ธมฺมจกฺขุํ วิโสธยึ ฯ |๑๕๘.๓๕๙| นิปติตฺวา มเหสิสฺส ปาทมูลมฺหิ ตาวเท อจฺจยํ เทสนตฺถาย อิมํ วจนมพฺรวึ ฯ |๑๕๘.๓๖๐| นโม เต สพฺพทสฺสาวิ นโม เต กรุณาลย นโม เต ติณฺณสํสาร นโม เต อมตนฺทท ฯ |๑๕๘.๓๖๑| ทิฏฺฐิคหนปกฺขนฺตา กามราควิโมหิตา ตยา สมฺมา อุปาเยน วินีตา วินเย รตา ฯ |๑๕๘.๓๖๒| อทสฺสเนน วิหิตา ตาทิสานํ มเหสินํ อนุโภนฺติ มหาทุกฺขํ สตฺตา สํสารสาคเร ฯ |๑๕๘.๓๖๓| ยทาหํ โลกสรณํ อรณํ มรณนฺตคํ นาทฺทสามิ มธุรตฺถํ เทเสสฺสามิ ตมจฺจยํ ฯ |๑๕๘.๓๖๔| มหาหิตํ วรทฺททํ อหิโตติ วิสงฺกิตา โนเปสึ รูปนิรตา เทเสสฺสามิ ตมจฺจยํ ฯ |๑๕๘.๓๖๕| ตทา มธุรนิคฺโฆโส มหาการุณิโก ชิโน อโวจ ติฏฺฐ เขเมติ สิญฺจนฺโต อมเตน มํ ฯ |๑๕๘.๓๖๖| ตทา ปณมฺม สิรสา กตฺวา จ นํ ปทกฺขิณํ คนฺตฺวา ทิสฺวา นรปตึ อิมํ วจนมพฺรวึ ฯ |๑๕๘.๓๖๗| อโห สมฺมา อุปาโย เต จินฺติโตยมรินฺทม วนทสฺสนกามาย ทิฏฺโฐ นิพฺพนโถ มุนิ ฯ |๑๕๘.๓๖๘| ยทิ เต รุจฺจเต ราชา สาสเน ตสฺส ตาทิโน ปพฺพชิสฺสามิ รูเปหํ นิพฺพินฺนา มุนิ ภาณินา ฯ ทุติยํ ภาณวารํ ฯ |๑๕๘.๓๖๙| อญฺชลึ ปคฺคเหตฺวาน ตทาห ส มหีปติ อนุชานามิ เต ภทฺเท ปพฺพชฺชา ตว สิชฺฌตุ ฯ |๑๕๘.๓๗๐| ปพฺพชิตฺวา ตทา จาหํ สตฺตมาเส อุปฏฺฐิเต ทีโปทยญฺจ เภทญฺจ ทิสฺวา สํวิคฺคมานสา ฯ |๑๕๘.๓๗๑| นิพฺพินฺนา สพฺพสงฺขาเร ปจฺจยาการโกวิทา จตุโรเฆ อติกฺกมฺม อรหตฺตํ อปาปุณึ ฯ |๑๕๘.๓๗๒| อิทฺธิยา จ วสี อาสึ ทิพฺพาย โสตธาตุยา เจโตปริยญาณสฺส วสี จาปิ ภวามหํ ฯ |๑๕๘.๓๗๓| ปุพฺเพนิวาสํ ชานามิ ทิพฺพจกฺขุํ วิโสธิตํ สพฺพาสวา ปริกฺขีณา นตฺถิ ทานิ ปุนพฺภโว ฯ |๑๕๘.๓๗๔| อตฺถธมฺมนิรุตฺตีสุ ปฏิภาเณ ตเถว จ ปริสุทฺธํ มมํ ญาณํ อุปฺปนฺนํ พุทฺธสาสเน ฯ |๑๕๘.๓๗๕| กุสลาหํ วิสุทฺธีสุ กถาวตฺถุวิสารทา อภิธมฺมนยญฺญู จ วสิปฺปตฺตามฺหิ สาสเน ฯ |๑๕๘.๓๗๖| ตโต โตรณวตฺถุสฺมึ รญฺญา โกสลสามินา ปุจฺฉิตฺวา นิปุเณ ปเญฺห พฺยากโรนฺตี ยถากถํ ฯ |๑๕๘.๓๗๗| ตทา ส ราชา สุคตํ อุปสงฺกมฺม ปุจฺฉถ ตเถว พุทฺโธ พฺยากาสิ ยถา เต พฺยากตา มยา ฯ |๑๕๘.๓๗๘| ชิโน ตสฺมึ คุเณ ตุฏฺโฐ เอตทคฺเค ฐเปสิ มํ มหาปญฺญานมคฺคาติ ภิกฺขุนีนํ นรุตฺตโม ฯ |๑๕๘.๓๗๙| กิเลสา ฌาปิตา มยฺหํ ภวา สพฺเพ สมูหตา นาคีว พนฺธนํ เฉตฺวา วิหรามิ อนาสวา ฯ |๑๕๘.๓๘๐| สฺวาคตํ วต เม อาสิ พุทฺธเสฏฺฐสฺส สนฺติเก ติสฺโส วิชฺชา อนุปฺปตฺตา กตํ พุทฺธสฺส สาสนํ ฯ |๑๕๘.๓๘๑| ปฏิสมฺภิทา จตสฺโส วิโมกฺขาปิจ อฏฺฐิเม ฉฬภิญฺญา สจฺฉิกตา กตํ พุทฺธสฺส สาสนนฺติ ฯ อิตฺถํ สุทํ เขมา ภิกฺขุนี อิมา คาถาโย อภาสิตฺถาติ ฯ เขมาเถริยา อปทานํ สมตฺตํ ฯ