๘. ยโสธราเถริยาปทาน

๑๖๘|๑๖๘.๓๑๕| ปุรกฺขตา ภิกฺขุนีหิ สเตหิ สหสฺเสหิ สา มหิทฺธิกา มหาปญฺญา สมฺพุทฺธํ อุปสงฺกมึ ฯ |๑๖๘.๓๑๖| สมฺพุทฺธํ อภิวาเทตฺวา สตฺถุโน จกฺกลกฺขเณ นิสินฺนา เอกมนฺตมฺหิ อิทํ วจนมพฺรวึ ฯ |๑๖๘.๓๑๗| อฏฺฐสตฺตติวสฺสาหํ ปจฺฉิมา วตฺตยิ วยา ปพฺภารมฺหิ อนุปฺปตฺตา อาโรเจมิ มหามุนึ ฯ |๑๖๘.๓๑๘| ปริปกฺโก วโย มยฺหํ ปริตฺตํ มม ชีวิตํ ปหาย โว คมิสฺสามิ กตํ เม สรณมตฺตโน ฯ |๑๖๘.๓๑๙| วยมฺหิ ปจฺฉิเม กาเล มรณํ อุปรุทฺธติ อชฺช รตฺตึ มหาวีร ปาปุณิสฺสามิ นิพฺพุตึ ฯ |๑๖๘.๓๒๐| นตฺถิ ชาติ ชรา พฺยาธิ มรณญฺจ มหามุเน อชรามราภยปุรํ คมิสฺสามิ อสงฺขตํ ฯ |๑๖๘.๓๒๑| ยาวตา ปริสา นาม สมุปาสนฺติ สตฺถุโน อปราธํ ปชานนฺติ ขมนฺตํ สมฺมุขา มุเน ฯ |๑๖๘.๓๒๒| สํสริตฺวา จ สํสาเร ขลิตญฺเจ มมนฺตยิ อาโรเจมิ มหาวีร อปราธํ ขมสฺสุ เม ฯ |๑๖๘.๓๒๓| อิทฺธิญฺจาปิ นิทสฺเสหิ มม สาสนการิเก ปริสานญฺจ สพฺพาสํ กงฺขํ ฉินฺทสฺสุ สาสเน ฯ |๑๖๘.๓๒๔| ยโสธรา อหํ วีร อคาเร เต ปชาปติ สากิยมฺหิ กุเล ชาตา อิตฺถีองฺเค ปติฏฺฐิตา ฯ |๑๖๘.๓๒๕| ถีนํ สตสหสฺสานํ นวุตีนํ ฉฬุตฺตริ อคาเร เต อหํ วีร ปาโมกฺขา สพฺพมิสฺสรา ฯ |๑๖๘.๓๒๖| รูปาจารคุณูเปตา โยพฺพนฏฺฐาปิ สพฺพทา สพฺพา มํ อปจายนฺติ เทวตา วิย มานุสา ฯ |๑๖๘.๓๒๗| กญฺญาสหสฺสปมุขา สกฺยปุตฺตนิเวสเน สมานสุขทุกฺขา ตา เทวตา วิย นนฺทเน ฯ |๑๖๘.๓๒๘| กามธาตุมติกฺกนฺตา ปณฺฑิตา รูปธาตุยา รูเปน สทิสา นตฺถิ ฐเปตฺวา โลกนายกํ ฯ |๑๖๘.๓๒๙| สมฺพุทฺธํ อภิวาเทตฺวา อิทฺธึ ทสฺเสสิ สตฺถุโน เนกา นานาวิธาการา มหาอิทฺธีปิ ทสฺสยิ ฯ |๑๖๘.๓๓๐| จกฺกวาฬสมํ กายํ สีสํ อุตฺตรโต กุรุ อุโภ ปกฺขา ทุเว ทีปา ชมฺพูทีปํ สรีรโต ฯ |๑๖๘.๓๓๑| ทกฺขิณญฺจ สรํ ปิญฺฉํ นานาสาขา ตุ ปตฺตกา จนฺทญฺจ สูริยญฺจกฺขี เมรุปพฺพตโต สิขํ ฯ |๑๖๘.๓๓๒| จกฺกวาฬคิรึ ตุณฺฑํ ชมฺพูรุกฺขํ สมูลกํ วีชมานา อุปาคนฺตฺวา วนฺทเต โลกนายกํ ฯ |๑๖๘.๓๓๓| หตฺถิวณฺณํ ตเถวสฺสํ ปพฺพตํ ชลชนฺตถา จนฺทญฺจ สุริยํ เมรุํ สกฺกวณฺณญฺจ ทสฺสยิ ฯ |๑๖๘.๓๓๔| ยโสธรา อหํ วีร ปาเท วนฺทามิ จกฺขุม สหสฺสโลกธาตูนํ ผุลฺลปทฺเธน ฉาทยิ ฯ |๑๖๘.๓๓๕| พฺรหฺมวณฺณญฺจ มาเปตฺวา ธมฺมํ เทเสสิ สุญฺญตํ ยโสธรา อหํ วีร ปาเท วนฺทามิ จกฺขุม ฯ |๑๖๘.๓๓๖| อิทฺธีสุ จ วสี โหมิ ทิพฺพาย โสตธาตุยา เจโตปริยญาณสฺส วสี โหมิ มหามุเน ฯ |๑๖๘.๓๓๗| ปุพฺเพนิวาสํ ชานามิ ทิพฺพจกฺขุํ วิโสธิตํ สพฺพาสวา ปริกฺขีณา นตฺถิ ทานิ ปุนพฺภโว ฯ |๑๖๘.๓๓๘| อตฺถธมฺมนิรุตฺตีสุ ปฏิภาเณ ตเถว จ ญาณํ มยฺหํ มหาวีร อุปฺปนฺนํ ตว สนฺติเก ฯ |๑๖๘.๓๓๙| พุทฺธานํ โลกนาถานํ สงฺคมํ เต สุทสฺสิตํ อธิการํ พหุํ มยฺหํ ตุยฺหตฺถาย มหามุเน ฯ |๑๖๘.๓๔๐| ยํ มยฺหํ ปุริมํ กมฺมํ กุสลํ สรเส มุเน ตุยฺหตฺถาย มหาวีร ปุญฺญํ อุปจิตํ มยา ฯ |๑๖๘.๓๔๑| อภพฺพฏฺฐาเน วชฺชิตฺวา วารยิตฺวา อนาจรํ ตุยฺหตฺถาย มหาวีร สญฺจตฺตํ ชีวิตํ มยา ฯ |๑๖๘.๓๔๒| เนกโกฏิสหสฺสานิ ภริยตฺถายทาสิ มํ น ตตฺถ วิมนา โหมิ ตุยฺหตฺถาย มหามุเน ฯ |๑๖๘.๓๔๓| เนกโกฏิสหสฺสานิ อุปการายทาสิ มํ น ตตฺถ วิมนา โหมิ ตุยฺหตฺถาย มหามุเน ฯ |๑๖๘.๓๔๔| เนกโกฏิสหสฺสานิ โภชนตฺถายทาสิ มํ น ตตฺถ วิมนา โหมิ ตุยฺหตฺถาย มหามุเน ฯ |๑๖๘.๓๔๕| เนกโกฏิสหสฺสานิ ชีวิตานิ ปริจฺจชึ ภยโมกฺขํ กริสฺสนฺติ ททามิ มม ชีวิตํ |๑๖๘.๓๔๖| องฺคคเต อลงฺกาเร วตฺเถ นานาวิเธ พหู อิตฺถีภณฺเฑ น คุยฺหามิ ตุยฺหตฺถาย มหามุเน ฯ |๑๖๘.๓๔๗| ธนธญฺญปริจฺจาคํ คามานิ นิคมานิ จ เขตฺตํ ปุตฺตา จ ธีตา จ ปริจตฺตํ มหามุนิ ฯ |๑๖๘.๓๔๘| หตฺถี อสฺสํ ควญฺจาปิ ทาสิโย ปริจาริกา ตุยฺหตฺถาย มหาวีร ปริจตฺตา อสงฺขยา ฯ |๑๖๘.๓๔๙| ยํ มยฺหํ ปฏิมนฺเตสิ ทานํ ทสฺสามิ ยาจเก วิมนํ เม น ปสฺสามิ ททโต ทานมุตฺตมํ ฯ |๑๖๘.๓๕๐| นานาวิธํ พหุํ ทุกฺขํ สํสาเร จ พหุวิเธ ตุยฺหตฺถาย มหาวีร อนุภุตฺตํ อสงฺขยํ ฯ |๑๖๘.๓๕๑| สุขปฺปตฺตานุโมทามิ น จ ทุกฺเขสุ ทุมฺมนา สพฺพตฺถ ตุสิตา โหมิ ตุยฺหตฺถาย มหามุนิ ฯ |๑๖๘.๓๕๒| อนุมคฺเคน สมฺพุทฺโธ ยํ ธมฺมํ อภินีหริ อนุโภตฺวา สุขทุกฺขํ ปตฺโต โพธึ มหามุนิ ฯ |๑๖๘.๓๕๓| พฺรหฺมเทวญฺจ สมฺพุทฺธํ โคตมํ โลกนายกํ อญฺเญสํ โลกนาถานํ สงฺคมนฺเต พหุํ มยา ฯ |๑๖๘.๓๕๔| อธิการํ พหุํ มยฺหํ ตุยฺหตฺถาย มหามุนิ คเวสนฺตี พุทฺธธมฺมํ อหนฺเต ปริจาริกา ฯ |๑๖๘.๓๕๕| กปฺปสตสหสฺเส จ จตุโร จ อสงฺขเย ทีปงฺกโร มหาวีโร อุปฺปชฺชิ โลกนายโก ฯ |๑๖๘.๓๕๖| ปจฺจนฺตเทสวิสเย นิมนฺเตตฺวา ตถาคตํ ตสฺส อาคมนํ มคฺคํ โสเธนฺติ ตุฏฺฐมานสา ฯ |๑๖๘.๓๕๗| เตน กาเลน โส อาสิ สุเมโธ นาม พฺราหฺมโณ มคฺคญฺจ ปฏิยาเทสิ อายโต สพฺพทสฺสิโน ฯ |๑๖๘.๓๕๘| เตน กาเลนหํ อาสึ กญฺญา พฺราหฺมณสมฺภวา สุมิตฺตา นาม นาเมน อุปคญฺฉึ สมาคมํ ฯ |๑๖๘.๓๕๙| อฏฺฐ อุปฺปลหตฺถานิ ปูชนตฺถาย สตฺถุโน อาทาย ชนสฺส มชฺเฌ อทฺทสํ อิสิมุตฺตมํ ฯ |๑๖๘.๓๖๐| จิรานุคตํ ทยิตํ อติกฺกนฺตํ มโนหรํ ทิสฺวา ตทา อมญฺญิสฺสํ สผลํ ชีวิตํ มม ฯ |๑๖๘.๓๖๑| ปรกฺกมนฺตํ สผลํ อทฺทสํ อิสิโน ตทา ปุพฺพกมฺเมน สมฺพุทฺเธ จิตฺตญฺจาปิ ปสีทิ เม ฯ |๑๖๘.๓๖๒| ภิยฺโย จิตฺตํ ปสาเทสึ อิเส อุทคฺคมานเส เทยฺยํ อญฺญํ น ปสฺสามิ เทมิ ปุปฺผานิ เต อิเส ฯ |๑๖๘.๓๖๓| ปญฺจ หตฺถา ตว โหนฺตุ ตโย โหนฺตุ มมํ อิเส เตน สทฺธึ สมา โหนฺตุ โพธิตฺถาย ตว อิเส ฯ จตุตฺถํ ภาณวารํ ฯ |๑๖๘.๓๖๔| อิสิ คเหตฺวา ปุปฺผานิ อาคจฺฉนฺตํ มหายสํ ปูเชสิ ชนสฺส มชฺเฌ โพธิตฺถาย มหาอิสึ ฯ |๑๖๘.๓๖๕| ปสฺสิตฺวา ชนสฺส มชฺเฌ ทีปงฺกรมหามุนิ วิยากาสิ มหาวีโร อิสิมุคฺคตมานสํ ฯ |๑๖๘.๓๖๖| อปริเมยฺเย อิโต กปฺเป ทีปงฺกรมหามุนิ มม กมฺมํ วิยากาสิ อุชุภาวํ มหามุนิ ฯ |๑๖๘.๓๖๗| สมจิตฺตา สมกมฺมา สมการี ภวิสฺสติ ปิยา เหสฺสติ กมฺเมน ตุยฺหตฺถาย มหาอิเส ฯ |๑๖๘.๓๖๘| สุทสฺสนา สุปิยา จ มนาปา ปิยวาทินี ตสฺส ธมฺเมสุ ทายาทา วิหริสฺสติ อิทฺธิกา ฯ |๑๖๘.๓๖๙| ยถาปิ ภณฺฑสามุคฺคํ อนุรกฺขนฺติ สามิโน เอวํ กุสลธมฺมานํ อนุรกฺขิสฺสเต อยํ ฯ |๑๖๘.๓๗๐| ตสฺส ตํ อนุกมฺปนฺติ ปูรยิสฺสติ ปารมี สีโหว ปญฺชรํ หิตฺวา ปาปุณิสฺสติ โพธิยํ ฯ |๑๖๘.๓๗๑| อปริเมยฺเย อิโต กปฺเป ยํ มํ พุทฺโธ วิยากริ ตํ วาจํ อนุโมทนฺตี เอวํการี ภวึ อหํ ฯ |๑๖๘.๓๗๒| ตสฺส กมฺมสฺส สุกตสฺส ตตฺถ จิตฺตํ ปสาทยึ เทวมานุสกํ โยนึ อนุโภตฺวา อสงฺขยํ ฯ |๑๖๘.๓๗๓| สุขทุกฺขํ อนุโภตฺวาน เทเวสุ มานุเสสุ จ ปจฺฉิเม ภวสมฺปตฺเต อชายึ สากิเย กุเล ฯ |๑๖๘.๓๗๔| รูปวตี โภควตี ยสสีลวตี ตโต สพฺพงฺคสมฺปทา โหมิ กุเลสุ ปติสกฺกตา ฯ |๑๖๘.๓๗๕| ลาภสิโลกสกฺการํ โลกธมฺมสมาคมํ จิตฺตญฺจ ทุกฺขิตํ นตฺถิ วสามิ อกุโตภยา ฯ |๑๖๘.๓๗๖| วุตฺตํ เหตํ ภควตา รญฺโญ อนฺเตปุเร ตทา ขตฺติยานํ ปุเร วีร อุปการญฺจ นิทฺทิสิ ฯ |๑๖๘.๓๗๗| อุปการา จ ยา นารี ยา จ นารี สุเข ทุกฺเข อตฺถกฺขายี จ ยา นารี ยา นารี จานุกมฺปิกา ฯ |๑๖๘.๓๗๘| ปญฺจโกฏิสตา พุทฺธา นวโกฏิสตานิ จ เอเตสํ เทวเทวานํ มหาทานํ ปวตฺตยึ ฯ |๑๖๘.๓๗๙| อธิการํ มหา มยฺหํ มหาราช สุโณหิ เม เอกาทสโกฏิสตา โหนฺติ โลกคฺคนายกา ฯ |๑๖๘.๓๘๐| เอเตสํ เทวเทวานํ มหาทานํ ปวตฺตยึ อธิการํ มหา มยฺหํ มหาราช สุโณหิ เม ฯ |๑๖๘.๓๘๑| วีสโกฏิสตา พุทฺธา ตึสโกฏิสตานิ จ เอเตสํ เทวเทวานํ มหาทานํ ปวตฺตยึ ฯ |๑๖๘.๓๘๒| อธิการํ มหา มยฺหํ มหาราช สุโณหิ เม จตฺตาฬีสโกฏิสตา ปญฺจโกฏิสตานิ จ ฯ |๑๖๘.๓๘๓| เอเตสํ เทวเทวานํ มหาทานํ ปวตฺตยึ อธิการํ มหา มยฺหํ มหาราช สุโณหิ เม ฯ |๑๖๘.๓๘๔| สฏฺฐิโกฏิสตา พุทฺธา สตฺตติโกฏิสตานิ จ เอเตสํ เทวเทวานํ มหาทานํ ปวตฺตยึ ฯ |๑๖๘.๓๘๕| อธิการํ มหา มยฺหํ มหาราช สุโณหิ เม อสีติโกฏิสตา พุทฺธา นวุติโกฏิสตานิ จ ฯ |๑๖๘.๓๘๖| เอเตสํ เทวเทวานํ มหาทานํ ปวตฺตยึ อธิการํ มหา มยฺหํ มหาราช สุโณหิ เม ฯ |๑๖๘.๓๘๗| โกฏิสตสหสฺสานิ โหนฺติ โลกคฺคนายกา เอเตสํ เทวเทวานํ มหาทานํ ปวตฺตยึ ฯ |๑๖๘.๓๘๘| อธิการํ มหา มยฺหํ มหาราช สุโณหิ เม นวโกฏิสหสฺสานิ อปเร โลกนายกา ฯ |๑๖๘.๓๘๙| เอเตสํ เทวเทวานํ มหาทานํ ปวตฺตยึ อธิการํ มหา มยฺหํ มหาราช สุโณหิ เม ฯ |๑๖๘.๓๙๐| โกฏิสตสหสฺสานิ ปญฺจาสีติ มเหสินํ ปญฺจาสีติโกฏิสตา สตฺตวีสติ โกฏิโย ฯ |๑๖๘.๓๙๑| เอเตสํ เทวเทวานํ มหาทานํ ปวตฺตยึ อธิการํ มหา มยฺหํ มหาราช สุโณหิ เม ฯ |๑๖๘.๓๙๒| ปจฺเจกพุทฺธา วีตราคา อฏฺฐมตฺถกโกฏิโย อธิการํ มหา มยฺหํ มหาราช สุโณหิ เม ฯ |๑๖๘.๓๙๓| ขีณาสวา วีตมลา อสงฺเขยฺยา พุทฺธสาวกา อธิการํ มหา มยฺหํ มหาราช สุโณหิ เม ฯ |๑๖๘.๓๙๔| เอวํ ธมฺเมสุ จิณฺณานํ สทา สทฺธมฺมจาริโน ธมฺมจารี สุขํ เสติ อสฺมึ โลเก ปรมฺหิ จ ฯ |๑๖๘.๓๙๕| ธมฺมญฺจเร สุจริตํ น ตํ ทุจฺจริตํ จเร ธมฺมจารี สุขํ เสติ อสฺมึ โลเก ปรมฺหิ จ ฯ |๑๖๘.๓๙๖| นิพฺพินฺทิตฺวาน สํสาเร ปพฺพชึ อนคาริยํ สหสฺสปริวาเรน ปพฺพชิตฺวา อกิญฺจนา ฯ |๑๖๘.๓๙๗| อคารํ วิชหิตฺวาน ปพฺพชึ อนคาริยํ อฑฺฒมาเส อสมฺปตฺเต จตุสจฺจํ อปาปุณึ ฯ |๑๖๘.๓๙๘| จีวรํ ปิณฺฑปาตญฺจ ปจฺจยํ สยนาสนํ อุปเนนฺติ พหูเนเก สาคเรเยว อุมฺมิโย ฯ |๑๖๘.๓๙๙| กิเลสา ฌาปิตา มยฺหํ ภวา สพฺเพ สมูหตา นาคีว พนฺธนํ เฉตฺวา วิหรามิ อนาสวา ฯ |๑๖๘.๔๐๐| สฺวาคตํ วต เม อาสิ พุทฺธเสฏฺฐสฺส สนฺติเก ติสฺโส วิชฺชา อนุปฺปตฺตา กตํ พุทฺธสฺส สาสนํ ฯ |๑๖๘.๔๐๑| ปฏิสมฺภิทา จตสฺโส วิโมกฺขาปิจ อฏฺฐิเม ฉฬภิญฺญา สจฺฉิกตา กตํ พุทฺธสฺส สาสนํ ฯ |๑๖๘.๔๐๒| เอวํ พหุวิธํ ทุกฺขํ สมฺปตฺตึ จ พหุพฺพิธํ วิสุทฺธภาวสมฺปตฺตา ลภามิ สพฺพสมฺปทา ฯ |๑๖๘.๔๐๓| โย ททาติ สกตฺตานํ ปุญฺญตฺถาย มเหสิโน สหายสมฺปทา โหนฺติ นิพฺพานปทมสงฺขตํ ฯ |๑๖๘.๔๐๔| ปริกฺขีณํ อตีตญฺจ ปจฺจุปฺปนฺนํ อนาคตํ สพฺพกมฺมํ มมํ ขีณํ ปาเท วนฺทามิ จกฺขุมาติ ฯ อิตฺถํ สุทํ ยโสธรา ภิกฺขุนี ภควโต สมฺมุขา อิมา คาถาโย อภาสิตฺถาติ ฯ ยโสธราเถริยา อปทานํ สมตฺตํ ฯ