๒. จตุราสีติสหัสสพราหมณกัญญาเถริยาปทาน

๑๗๒|๑๗๒.๑๓| จูฬาสีติสหสฺสานิ พฺราหฺมณกุลสมฺภวา สุขุมาลหตฺถปาทา ปุเร ตุยฺหํ มหามุเน ฯ |๑๗๒.๑๔| เวสฺส สุทฺทกุเล ชาตา เทวา นาคา จ กินฺนรา จตุทฺทีปา พหู กญฺญา ปุเร ตุยฺหํ มหามุเน ฯ |๑๗๒.๑๕| กาจิ ปพฺพชิตา อตฺถิ สพฺพทสฺสาวิโน พหู เทวา จ กินฺนรา นาคา พุชฺฌิสฺสนฺติ อนาคเต ฯ |๑๗๒.๑๖| อนุโภตฺวา ยสํ สพฺพํ ปตฺวาน สพฺพสมฺปทา ตุมฺหํ ปสาทํ ปฏิลทฺธา พุชฺฌิสฺสนฺติ อนาคเต ฯ |๑๗๒.๑๗| อเมฺห พฺราหฺมณธีตา ตุ พฺรหฺมญฺญกุลสมฺภวา ลกฺขณา จ มหาวีร ปาเท วนฺทาม จกฺขุมา ฯ |๑๗๒.๑๘| อุปาหตา ภวา สพฺเพ มูลตณฺหา สมูหตา สมุจฺฉินฺนา อนุสยา ปุญฺญสงฺขารทาลิตา ฯ |๑๗๒.๑๙| สมาธิโคจรา สพฺพา สมาปตฺติวสี ตถา ฌาเนน ธมฺมรติยา วิหริสฺสาม โน สทา ฯ |๑๗๒.๒๐| ภวเนตฺติ อวิชฺชา จ สงฺขาราปิ จ เขปิตา สุทุทฺทสํ ปทํ คนฺตฺวา อนุชานิมฺห นายก ฯ |๑๗๒.๒๑| อุปการา มมํ ตุเมฺห ทีฆรตฺตํ คตทฺธิโน จตุนฺนํ สํสยํ เฉตฺวา สพฺพา คจฺฉถ นิพฺพุตึ ฯ |๑๗๒.๒๒| วนฺทิตฺวา มุนิโน ปาเท กตฺวา อิทฺธิวิกุพฺพนํ กาจิ ทสฺเสนฺติ อาโลกํ อนฺธการํ ตถาปรํ ฯ |๑๗๒.๒๓| ทสฺเสนฺติ จนฺทสุริเย สาครญฺจ สมจฺฉกํ สิเนรุํ ปริภณฺฑญฺจ ทสฺเสนฺติ ปาริฉตฺตกํ ฯ |๑๗๒.๒๔| ตาวตึสญฺจ ภวนํ ยามํ ทสฺเสนฺติ อิทฺธิยา ตุสฺสิตา นิมฺมิตา เทวา วสวตฺตี มหิสฺสรา ฯ พฺรหฺมาโน กาจิ ทสฺเสนฺติ จงฺกมญฺจ มหารหํ |๑๗๒.๒๕| พฺรหฺมวณฺณญฺจ มาเปตฺวา ธมฺมํ เทเสนฺติ สุญฺญตํ ฯ นานาวิกุพฺพนํ กตฺวา อิทฺธึ ทสฺสิย สตฺถุโน |๑๗๒.๒๖| ทสฺสยึสุ พลํ สพฺพา ปาเท วนฺทึสุ สตฺถุโน ฯ อิทฺธีสุ จ วสี โหม ทิพฺพาย โสตธาตุยา เจโตปริยญาณสฺส วสี โหม มหามุเน ฯ |๑๗๒.๒๗| ปุพฺเพนิวาสํ ชานาม ทิพฺพจกฺขุํ วิโสธิตํ สพฺพาสวปริกฺขีณา นตฺถิ ทานิ ปุนพฺภโว ฯ |๑๗๒.๒๘| อตฺถธมฺมนิรุตฺตีสุ ปฏิภาเณ ตเถว จ ญาณํ อมฺหํ มหาวีร อุปฺปนฺนํ ตว สนฺติเก ฯ |๑๗๒.๒๙| พุทฺธานํ โลกนาถานํ สงฺคมนฺเตหิ ทสฺสิตํ อธิการา พหู อเมฺห ตุยฺหตฺถาย มหามุเน ฯ |๑๗๒.๓๐| ยํ อมฺหํ ปุริมํ กมฺมํ กุสลํ สร ตํ มุนิ ตุยฺหตฺถาย มหาวีร ปุญฺญานุปจิตานิ โน ฯ |๑๗๒.๓๑| สตสหสฺเส อิโต กปฺเป ปทุมุตฺตโร มหามุนิ ปุรํ หํสวตี นาม สมฺพุทฺธสฺส กุลาลยํ ฯ |๑๗๒.๓๒| ทฺวาเรน หํสวติยํ คงฺคา สนฺทติ สพฺพทา อุพฺพาฬฺหา นทิยา ภิกฺขู คมนํ น ลภนฺติ เต ฯ |๑๗๒.๓๓| ทิวสํ เทฺว ตโย เจว สตฺตาหํ มาสิกํ ตโต จาตุมาสมฺปิ สมฺปุณฺณํ คมนํ น ลภนฺติ เต ฯ |๑๗๒.๓๔| ตทา อหุ สตฺตสาโร ชชฺชิโย นาม รฏฺฐโก โอรตีเร ภิกฺขโว ทิสฺวา เสตุํ คงฺคาย การยิ ฯ |๑๗๒.๓๕| ตทา สตสหสฺเสหิ เสตุํ คงฺคาย การยึ สงฺฆสฺส ปาริเม ตีเร วิหารญฺจ อการยิ ฯ |๑๗๒.๓๖| อิตฺถิโย ปุริสา เจว อุจฺจานีจกุลานิ จ ตสฺส เสตุํ วิหารํ จ สมภาคํ อกํสุ เต ฯ |๑๗๒.๓๗| อเมฺห อญฺเญ จ มนุชา วิปฺปสนฺเนน เจตสา ตสฺส ธมฺเมสุ ทายาทา นคเร ชนปเทสุ จ ฯ |๑๗๒.๓๘| อิตฺถี ปุมา กุมารา จ พหู เจว กุมาริกา เสตุโน จ วิหารสฺส วาลุกา อากิรึสุ เต ฯ |๑๗๒.๓๙| วีถิสมฺมชฺชนํ กตฺวา กทลีปุณฺณฆฏทฺธชา ธูปํ จุณฺณญฺจ มาลญฺจ การํ กตฺวาน สตฺถุโน ฯ |๑๗๒.๔๐| เสตุวิหาเร กตฺวาน นิมนฺเตตฺวา วินายกํ มหาทานํ ททิตฺวาน สมฺโพธึ อภิปตฺถยึ ฯ |๑๗๒.๔๑| ปทุมุตฺตโร มหาวีโร ครุโก สพฺพปาณินํ อนุโมทนิยํ กตฺวา พฺยากาสิ มหามุนิ ฯ |๑๗๒.๔๒| สตสหสฺเส อติกฺกนฺเต กปฺโป เหสฺสติ ภทฺทโก ภวาภเว สุขํ ลทฺธา ปาปุณิสฺสติ โพธิยํ ฯ |๑๗๒.๔๓| เย เกจิ หตฺถกมฺมญฺจ กตาวี นรนาริโย อนาคตสฺมิ อทฺธาเน สพฺเพ เหสฺสนฺติ สมฺมุขา ฯ |๑๗๒.๔๔| เตน กมฺมวิปาเกน เจตนาปณิธีหิ จ อุปฺปนฺนา เทวภวเน ตุยฺหนฺเต ปริจาริกา ฯ |๑๗๒.๔๕| ทิพฺพสุขํ อสงฺเขยฺยํ มานุสญฺจ อสงฺขิยํ อนุโภนฺติ จิรํ กาลํ สํสริตฺวา ภวาภเว ฯ |๑๗๒.๔๖| สตสหสฺเส อิโต กปฺเป สุกตํ กมฺมสมฺปทํ สุขุมาลิมนุสฺเสสุ อโถ เทวปุเร วเร ฯ |๑๗๒.๔๗| รูปโภคยสญฺเจว อโถ กิตฺติสุขํ ปิยํ ลภาม สตตํ สพฺพํ สุกตํ กมฺมสมฺปทํ ฯ |๑๗๒.๔๘| ปจฺฉิเม ภวสมฺปตฺเต ชายาม พฺราหฺมเณ กุเล สุขุมาลหตฺถปาทา สกฺยปุตฺตนิเวสเน ฯ |๑๗๒.๔๙| สพฺพกาลมฺปิ ปฐวึ น ปสฺสาม นลงฺกตํ จิกฺขลฺลํ ภูมึ คมนํ น ปสฺสาม มหามุนิ ฯ |๑๗๒.๕๐| อคาราวสนฺเต อเมฺห สกฺการํ สพฺพกาลิกํ อุปเนนฺติ สทา สพฺพํ ปุพฺพกมฺมผเลน โน ฯ |๑๗๒.๕๑| อคารํ ปชหิตฺวาน ปพฺพชิตฺวานคาริยํ สํสารปถํ นิติณฺณา นตฺถิ ทานิ ปุนพฺภโว ฯ |๑๗๒.๕๒| จีวรํ ปิณฺฑปาตญฺจ ปจฺจยํ สยนาสนํ อุปเนนฺติ สทา อเมฺห สหสฺสานิ ตโต ตโต ฯ |๑๗๒.๕๓| กิเลสา ฌาปิตามฺหากํ ภวา สพฺเพ สมูหตา นาคีว พนฺธนํ เฉตฺวา วิหราม อนาสวา ฯ |๑๗๒.๕๔| สฺวาคตํ วต โน อาสิ พุทฺธเสฏฺฐสฺส สนฺติเก ติสฺโส วิชฺชา อนุปฺปตฺตา กตํ พุทฺธสฺส สาสนํ ฯ |๑๗๒.๕๕| ปฏิสมฺภิทา จตสฺโส วิโมกฺขาปิจ อฏฺฐิเม ฉฬภิญฺญา สจฺฉิกตา กตํ พุทฺธสฺส สาสนนฺติ ฯ อิตฺถํ สุทํ จตุราสีติ พฺราหฺมณกญฺญาภิกฺขุนีสหสฺสานิ ภควโต สมฺมุขา อิมา คาถาโย อภาสิตฺถาติ ฯ จตุราสีติสหสฺสพฺราหฺมณกญฺญาเถรีนํ อปทานํ สมตฺตํ ฯ