๘. ปาทปิฐิยเถราปทาน

๓๘|๓๘.๕๐| สุเมโธ นาม สมฺพุทฺโธ การุณิโก มหามุนิ ตารยิตฺวา พหู สตฺเต นิพฺพุโต โส มหายโส ฯ |๓๘.๕๑| สีหาสนสฺส สามนฺตา สุเมธสฺส มเหสิโน ปสนฺนจิตฺโต สุมโน ปาทปีฐมการยึ ฯ |๓๘.๕๒| กตฺวาน กุสลํ กมฺมํ สุขปากํ สุขุทฺรยํ ปุญฺญกมฺเมน สํยุตฺโต ตาวตึสํ อคญฺฉหํ ฯ |๓๘.๕๓| ตตฺถ เม วสมานสฺส ปุญฺญกมฺมสมงฺคิโน ปทานิ อุทฺธรนฺตสฺส โสณฺณปีฐา ภวนฺติ เม ฯ |๓๘.๕๔| ลาภา เตสํ สุลทฺธนฺเต เย ลภนฺติ อุปสฺสุติ นิพฺพุเต การํ กตฺวาน ลภนฺติ วิปุลํ สุขํ ฯ |๓๘.๕๕| มยาปิ สุกตํ กมฺมํ วาณิชฺเช สุปโยชิตํ ปาทปีฐํ กริตฺวาน โสณฺณปีฐํ ลภามหํ ฯ |๓๘.๕๖| ยํ ยํ ทิสํ ปกฺกมามิ เกนจิ กิจฺจเยนหํ โสณฺณปีเฐ อกฺกมามิ ปุญฺญกมฺมสฺสิทํ ผลํ ฯ |๓๘.๕๗| ตึสกปฺปสหสฺสมฺหิ ยํ กมฺมมกรึ ตทา ทุคฺคตึ นาภิชานามิ ปาทปีฐสฺสิทํ ผลํ ฯ |๓๘.๕๘| กิเลสา ฌาปิตา มยฺหํ ภวา สพฺเพ สมูหตา นาโคว พนฺธนํ เฉตฺวา วิหรามิ อนาสโว ฯ ติสฺโส วิชฺชา อนุปฺปตฺตา กตํ พุทฺธสฺส สาสนํ ฯ |๓๘.๕๙| ปฏิสมฺภิทา จตสฺโส วิโมกฺขาปิจ อฏฺฐิเม ฉฬภิญฺญา สจฺฉิกตา กตํ พุทฺธสฺส สาสนนฺติ ฯ อิตฺถํ สุทํ อายสฺมา ปาทปีฐิโย เถโร อิมา คาถาโย อภาสิตฺถาติ ฯ ปาทปีฐิยตฺเถรสฺส อปทานํ สมตฺตํ ฯ