๓. ภิสทายกเถราปทาน

๗๓|๗๓.๒๗| โอคฺคยฺหาหํ โปกฺขรณึ นานากุญฺชรเสวิตํ อุทฺธรามิ ภิสํ ตตฺถ อสนเหตุ อหํ ตทา ฯ |๗๓.๒๘| ภควา ตมฺหิ สมเย ปทุมุตฺตรสวฺหโย รตฺตกมฺพลธโร พุทฺโธ คจฺฉสิ อนิลญฺชเส ฯ |๗๓.๒๙| ธุนนฺโต ปํสุกูลานิ สทฺทํ อสฺโสสหํ ตทา อุทฺธํ นิชฺฌายมาโนหํ อทฺทสํ โลกนายกํ ฯ |๗๓.๓๐| ตตฺเถว ฐิตโก สนฺโต อายาจึ โลกนายกํ มธุ ภึเสหิ สวติ ขีรสปฺปิ มุฬาลิภิ ฯ |๗๓.๓๑| ปฏิคฺคณฺหาตุ เม พุทฺโธ อนุกมฺปาย จกฺขุมา ตโต การุณิโก สตฺถา โอโรหิตฺวา มหายโส ฯ |๗๓.๓๒| ปฏิคฺคณฺหิ มม ภิกฺขํ อนุกมฺปาย จกฺขุมา ปฏิคฺคเหตฺวา สมฺพุทฺโธ อกา เม อนุโมทนํ ฯ |๗๓.๓๓| สุขี โหหิ มหาปุญฺญ คติ ตุยฺหํ สมิชฺฌตุ อิมินา ภิสทาเนน ลภสฺสุ วิปุลํ สุขํ ฯ |๗๓.๓๔| อทํ วตฺวาน สมฺพุทฺโธ ชลชุตฺตมนามโก ภิกฺขมาทาย สมฺพุทฺโธ อมฺพเรนาคมา ชิโน ฯ |๗๓.๓๕| ตโต ภิสํ คเหตฺวาน อาคญฺฉึ มม อสฺสมํ ภิสํ รุกฺเข ลคฺคิตฺวาน มม ทานํ อนุสฺสรึ ฯ |๗๓.๓๖| มหาวาโต วุฏฺฐหิตฺวา สญฺจาเลสิ วนํ ตทา อากาโส อภินาทิตฺถ อสนิยา ผลนฺติยา ฯ |๗๓.๓๗| ตโต เม อสนิปาโต มตฺถเก นิปติ ตทา โส หิ นิสินฺนโก สนฺโต ตตฺถ กาลํ กโต อหํ ฯ |๗๓.๓๘| ปุญฺญกมฺเมน สํยุตฺโต ตุสิตํ อุปปชฺชหํ กเลวรมฺเม ปติตํ เทวโลเก รมามหํ ฯ |๗๓.๓๙| ฉฬาสีติสหสฺสานิ นาริโย สมลงฺกตา สายํ ปาตํ อุปฏฺเฐนฺติ ภิสทานสฺสิทํ ผลํ ฯ |๗๓.๔๐| มนุสฺสโยนิมาคนฺตฺวา สุขิโต โหมหํ ตทา โภเค เม อูนตา นตฺถิ ภิสทานสฺสิทํ ผลํ ฯ |๗๓.๔๑| อนุกมฺปิตโก เตน เทวเทเวน ตาทินา สพฺพาสวปริกฺขีโณ นตฺถิ ทานิ ปุนพฺภโว ฯ |๗๓.๔๒| สตสหสฺเส อิโต กปฺเป ยํ ภิกฺขมททึ ตทา ทุคฺคตึ นาภิชานามิ ภิสทานสฺสิทํ ผลํ ฯ |๗๓.๔๓| กิเลสา ฌาปิตา มยฺหํ ภวา สพฺเพ สมูหตา นาโคว พนฺธนํ เฉตฺวา วิหรามิ อนาสโว ฯ |๗๓.๔๔| สฺวาคตํ วต เม อาสิ มม พุทฺธสฺส สนฺติเก ติสฺโส วิชฺชา อนุปฺปตฺตา กตํ พุทฺธสฺส สาสนํ ฯ |๗๓.๔๕| ปฏิสมฺภิทา จตสฺโส วิโมกฺขาปิจ อฏฺฐิเม ฉฬภิญฺญา สจฺฉิกตา กตํ พุทฺธสฺส สาสนนฺติ ฯ อิตฺถํ สุทํ อายสฺมา ภิสทายโก เถโร อิมา คาถาโย อภาสิตฺถาติ ฯ ภิสทายกตฺเถรสฺส อปทานํ สมตฺตํ ฯ