๓. มหากัปปินเถราปทาน

๑๒๓|๑๒๓.๖๖| ปทุมุตฺตโร นาม ชิโน สพฺพธมฺมาน ปารคู อุทิโต อชตากาเส รวิว สรทมฺพเร ฯ |๑๒๓.๖๗| วจนาภาย โพเธติ เวเนยฺยปทุมานิ โส กิเลสปงฺกํ โสเสติ มติรํสีหิ นายโก ฯ |๑๒๓.๖๘| ติตฺถิยานํ ยเส หนฺติ วชิรตา ยถา รวิ สพฺพตฺถ สมฺปกาเสติ รตฺตินฺทิวํ ทิวากโร ฯ |๑๒๓.๖๙| คุณานํ อายติภูโต รตนานํว สาคโร ปชุนฺโนริว ภูตานํ ธมฺมเมเฆน วสฺสติ ฯ |๑๒๓.๗๐| อกฺขทสฺโส ตทา อาสึ นคเร หํสสวฺหเย อุเปจฺจ ธมฺมมสฺโสสึ ชลชุตฺตมนามิโน ฯ |๑๒๓.๗๑| โอวาทกสฺส ภิกฺขูนํ สาวกสฺส สตาวิโน คุณํ ปกาสยนฺตสฺส หาสยนฺตสฺส เม มนํ ฯ |๑๒๓.๗๒| สุตฺวา ปีติโต สุมโน นิมนฺเตตฺวา ตถาคตํ สสิสฺสํ โภชยิตฺวาน ตณฺฐานํ อภิปตฺถยึ ฯ |๑๒๓.๗๓| ตทา หํสสมภาโค หํสทุนฺทุภินิสฺสโน ปสฺสเถตํ มหามตฺตํ วินิจฺฉยวิสารทํ ฯ |๑๒๓.๗๔| มม ปาทมูเล ปติตํ สมุทฺธคฺคตนุรุหํ ชูมุตฺตวณฺณํ รุจิรํ ปสนฺนยนานนํ ฯ |๑๒๓.๗๕| ปริวาเรน มหตา ราชยุตฺตํ มหายสํ เอโส กถาวิโน ฐานํ ปตฺเถติ มุทิตาย โส ฯ |๑๒๓.๗๖| อิมินา ปิณฺฑปาเตน จาเคน ปณิธีหิ จ กปฺปสตสหสฺสานิ นุปปชฺชติ ทุคฺคตึ ฯ |๑๒๓.๗๗| เทเวสุ เทวโสภาคฺยํ มนุสฺเสสุ มหคฺคตํ อนุโภตฺวาวเสเสน นิพฺพานํ ปาปุณิสฺสติ ฯ |๑๒๓.๗๘| สตสหสฺเส อิโต กปฺเป โอกฺกากกุลสมฺภโว โคตโม นาม นาเมน สตฺถา โลเก ภวิสฺสติ ฯ |๑๒๓.๗๙| ตสฺส ธมฺเมสุ ทายาโท โอรโส ธมฺมนิมฺมิโต กปฺปิโน นาม นาเมน เหสฺสติ สตฺถุสาวโก ฯ |๑๒๓.๘๐| ตโตหํ สุกตํ การํ กตฺวาน ชินสาสเน ชหิตฺวา มานุสํ เทหํ ตุสิตํ อคมาสหํ ฯ |๑๒๓.๘๑| เทวมนุสฺสรชฺชานิ สุตฺตโส อนุสาสิย พาราณสีสมาสนฺเน ชาโต เกณิยชาติยา ฯ |๑๒๓.๘๒| สตสหสฺสปริวาโร สปชาปติโก อหํ ปญฺจปจฺเจกพุทฺธานํ สตานิ สมุปฏฺฐหึ ฯ |๑๒๓.๘๓| เตมาสํ โภชยิตฺวาน อจฺฉาทมฺปิ ติจีวรํ ตโต จุตา มยํ สพฺเพ อหุมฺห ติทสูปคา ฯ |๑๒๓.๘๔| ปุโน สพฺเพ มนุสฺสตฺตํ อาคตมฺห ตโต จุตา กุกฺกุฏมฺหิ ปุเร ชาตา หิมวนฺตสฺส ปสฺสโต ฯ |๑๒๓.๘๕| กปฺปิโน นามหํ อาสึ ราชปุตฺโต มหายโส เสสามจฺจกุเล ชาตา มเมว ปริวารยุํ ฯ |๑๒๓.๘๖| มหารชฺชสุขํ ปตฺโต สพฺพกามสมิทฺธิโม วาณิเชหิ สมกฺขาตํ พุทฺธุปฺปาทมหํ สุณึ ฯ |๑๒๓.๘๗| พุทฺโธ โลเก สมุปฺปนฺโน อสโม เอกปุคฺคโล โส ปกาเสติ สทฺธมฺมํ อมตํ สุขมุตฺตมํ ฯ |๑๒๓.๘๘| สุยุตฺตา ตสฺส สิสฺสา จ สุมุตฺตา จ อนาสวา สุตฺวา เนสํปิ วจนํ สกฺกริตฺวาน วาณิเช ฯ |๑๒๓.๘๙| ปหาย รชฺชํ สามจฺโจ นิกฺขมึ พุทฺธมามโก นทึ ทิสฺวา มหาจนฺทํ ปูริตํ สมติตฺติกํ ฯ |๑๒๓.๙๐| อปฺปติตฺถํ อนาลมฺพํ ทุตฺตรํ สีฆพาหินึ คุณํ สริตฺวา พุทฺธสฺส โสตฺถินา สมติกฺกมึ ฯ |๑๒๓.๙๑| ภวโสตํ สเจ พุทฺโธ ติณฺโณ โลกนฺตคู วิทู เอเตน สจฺจวชฺเชน คมนํ เม สมิชฺฌตุ ฯ |๑๒๓.๙๒| ยทิ สนฺติคโม มคฺโค โมกฺขทํ สนฺติกํ สุขํ เอเตน สจฺจวชฺเชน คมนํ เม สมิชฺฌตุ ฯ |๑๒๓.๙๓| สงฺโฆ เจ ติณฺณกนฺตาโร ปุญฺญเขตฺโต อนุตฺตโร เอเตน สจฺจวชฺเชน คมนํ เม สมิชฺฌตุ ฯ |๑๒๓.๙๔| สห กเต สจฺจวเร มคฺคา อปคตํ ชลํ ตโต สุเขน อุตฺติณฺโณ นทีตีเร มโนรเม ฯ |๑๒๓.๙๕| นิสินฺนํ อทฺทสํ พุทฺธํ อุเทนฺตํว ปภงฺกรํ ชลนฺตํ เหมเสลํว ทีปรุกฺขํว โชติตํ ฯ |๑๒๓.๙๖| สสึว ตาราสหิตํ สาวเกหิ ปุรกฺขตํ วาสวํ วิย วสฺสนฺตํ เทเวน ชนนนฺทนํ ฯ |๑๒๓.๙๗| วนฺทิตฺวาน สหามจฺโจ เอกมนฺตํ อุปาวิสึ ตโต อชฺฌาสยํ ญตฺวา พุทฺโธ ธมฺมมเทสยิ ฯ |๑๒๓.๙๘| สุตฺวาน ธมฺมํ วิมลํ อโวจุมฺห มยํ ชินํ ปพฺพาเชหิ มหาวีร โอติณฺณมฺห ภเว มยํ ฯ |๑๒๓.๙๙| สฺวากฺขาโต ภิกฺขเว ธมฺโม ทุกฺขนฺตสฺส กราย โว จรถ พฺรหฺมจริยํ อิจฺจาห มุนิ สตฺตโม ฯ |๑๒๓.๑๐๐| สห วาจาย สพฺเพปิ ภิกฺขุเวสธรา มยํ อหุมฺห อุปสมฺปนฺนา โสตาปนฺนาว สาสเน ฯ |๑๒๓.๑๐๑| ตโต เชตวนํ คนฺตฺวา อนุสาสิ วินายโก อนุสิฏฺโฐ ชิเนนาหํ อรหตฺตํ อปาปุณึ ฯ |๑๒๓.๑๐๒| ตโต ภิกฺขุสหสฺสานิ อนุสาสิมหํ ตทา มมานุสาสนกรา เตปิ อาสุํ อนาสวา ฯ |๑๒๓.๑๐๓| ชิโน ตสฺมึ คุเณ ตุฏฺโฐ เอตทคฺเค ฐเปสิ มํ ภิกฺขุโอวาทกานคฺโค กปฺปิโนติ มหาชเน ฯ |๑๒๓.๑๐๔| สตสหสฺเส กตํ กมฺมํ ผลํ ทสฺเสสิ เม อิธ สุมุตฺโต สรเวโคว กิเลเส ฌาปยึ มม ฯ |๑๒๓.๑๐๕| กเลสา ฌาปิตา มยฺหํ ภวา สพฺเพ สมูหตา นาโคว พนฺธนํ เฉตฺวา วิหรามิ อนาสโว ฯ |๑๒๓.๑๐๖| สฺวาคตํ วต เม อาสิ มม พุทฺธสฺส สนฺติเก ติสฺโส วิชฺชา อนุปฺปตฺตา กตํ พุทฺธสฺส สาสนํ ฯ |๑๒๓.๑๐๗| ปฏิสมฺภิทา จตสฺโส วิโมกฺขาปิจ อฏฺฐิเม ฉฬภิญฺญา สจฺฉิกตา กตํ พุทฺธสฺส สาสนนฺติ ฯ อิตฺถํ สุทํ อายสฺมา มหากปฺปิโน เถโร อิมา คาถาโย อภาสิตฺถาติ ฯ มหากปฺปินตฺเถรสฺส อปทานํ สมตฺตํ ฯ