๒. โมรหัตถิยเถราปทาน

๔๒|๔๒.๙| โมรหตฺถํ คเหตฺวาน อุเปสิ โลกนายกํ ปสนฺนจิตฺโต สุมโน โมรหตฺถํ อทาสหํ ฯ |๔๒.๑๐| อิมินา โมรหตฺเถน เจตนาปณิธีหิ จ นิพฺพุตา เม ตโย อคฺคี ลภามิ วิปุลํ สุขํ ฯ |๔๒.๑๑| อโห พุทฺธา อโห ธมฺมา อโห โน สตฺถุสมฺปทา ทตฺวานหํ โมรหตฺถํ ลภามิ วิปุลํ สุขํ ฯ |๔๒.๑๒| ติธคฺคี นิพฺพุตา มยฺหํ ภวา สพฺเพ สมูหตา สพฺพาสวา ปริกฺขีณา นตฺถิ ทานิ ปุนพฺภโว ฯ |๔๒.๑๓| เอกตึเส อิโต กปฺเป ยํ ทานมททินฺตทา ทุคฺคตึ นาภิชานามิ โมรหตฺถสฺสิทํ ผลํ ฯ |๔๒.๑๔| กิเลสา ฌาปิตา มยฺหํ ภวา สพฺเพ สมูหตา นาโคว พนฺธนํ เฉตฺวา วิหรามิ อนาสโว ฯ |๔๒.๑๕| สฺวาคตํ วต เม อาสิ มม พุทฺธสฺส สนฺติเก ติสฺโส วิชฺชา อนุปฺปตฺตา กตํ พุทฺธสฺส สาสนํ ฯ |๔๒.๑๖| ปฏิสมฺภิทา จตสฺโส วิโมกฺขาปิจ อฏฺฐิเม ฉฬภิญฺญา สจฺฉิกตา กตํ พุทฺธสฺส สาสนนฺติ อิตฺถํ สุทํ อายสฺมา โมรหตฺถิโย เถโร อิมา คาถาโย อภาสิตฺถาติ ฯ โมรหตฺถิยตฺเถรสฺส อปทานํ สมตฺตํ ฯ