๕. จันทนมาลิยเถราปทาน

๗๕|๗๕.๗๕| ปญฺจกามคุเณ หิตฺวา ปิยรูเป มโนรเม อสีติโกฏิโย หิตฺวา ปพฺพชึ อนคาริยํ ฯ |๗๕.๗๖| ปพฺพชิตฺวาน กาเยน ปาปกมฺมํ วิวชฺชยึ วจีทุจฺจริตํ หิตฺวา นทีกูเล วสามหํ ฯ |๗๕.๗๗| เอเกกํ มํ วิหรนฺตํ พุทฺธเสฏฺโฐ อุปาคมิ นาหํ ชานามิ พุทฺโธติ อกาสึ ปฏิสนฺถรํ ฯ |๗๕.๗๘| กริตฺวา ปฏิสนฺถารํ นามโคตฺตํ อปุจฺฉหํ เทวตา นุสิ คนฺธพฺโพ อาทู สกฺโก ปุรินฺทโท ฯ |๗๕.๗๙| โก วา ตฺวํ กสฺส วา ปุตฺโต มหาพฺรหฺมา อิธาคโต วิโรจสิ ทิสา สพฺพา อุทยํ สุริโย ยถา ฯ |๗๕.๘๐| สหสฺสารานิ จกฺกานิ ปาเท ทิสฺสนฺติ มาริส โก วา ตฺวํ กสฺส วา ปุตฺโต กถํ ชาเนมุ ตํ มยํ ฯ |๗๕.๘๑| นามโคตฺตํ ปเวเทหิ สํสยํ อปเนหิ เม นมฺหิ เทโว น คนฺธพฺโพ นมฺหิ สกฺโก ปุรินฺทโท ฯ |๗๕.๘๒| พฺรหฺมภาโว จ เม นตฺถิ เอเตสํ อุตฺตโม อหํ อตีโต วิสยํ เตสํ ทาลยึ กามพนฺธนํ ฯ |๗๕.๘๓| สพฺเพ กิเลเส ฌาเปตฺวา ปตฺโต สมฺโพธิมุตฺตมํ ตสฺส วาจํ สุณิตฺวาหํ อิทํ วจนมพฺรวึ ฯ |๗๕.๘๔| ยทิ พุทฺโธสิ สพฺพญฺญู นิสีท ตฺวํ มหามุนิ ตมหํ ปูชยิสฺสามิ ทุกฺขสฺสนฺตกโร ตุวํ ฯ |๗๕.๘๕| ปตฺถริตฺวา ชินจมฺมํ อทาสิ สตฺถุโน อหํ นิสีทิ ตตฺถ ภควา สีโหว คิริคพฺภเร ฯ |๗๕.๘๖| ขิปฺปํ ปพฺพตมารุยฺห อมฺพสฺส ผลมคฺคหึ สาลกลฺยาณิกํ ปุปฺผํ จนฺทนญฺจ มหารหํ ฯ |๗๕.๘๗| ขิปฺปํ ปคฺคยฺห ตํ สพฺพํ อุเปตฺวา โลกนายกํ ผลํ พุทฺธสฺส ทตฺวาน สาลปุปฺผํ อปูชยึ ฯ |๗๕.๘๘| จนฺทนํ อนุลิมฺปิตฺวา อวนฺทึ สตฺถุโน อหํ ปสนฺนจิตฺโต สุมโน วิปุลาย จ ปีติยา ฯ |๗๕.๘๙| อชินมฺหิ นิสีทิตฺวา สุเมโธ โลกนายโก มม กมฺมํ ปกิตฺเตสิ หาสยนฺโต มมํ ตทา ฯ |๗๕.๙๐| อิมินา ผลทาเนน คนฺธมาเลหิ จูภยํ ปญฺจวีเส กปฺปสเต เทวโลเก รมิสฺสติ ฯ |๗๕.๙๑| อนูนมนสงฺกปฺโป วสวตฺติ ภวิสฺสติ ฉพฺพีสติกปฺปสเต มนุสฺสตฺตํ คมิสฺสติ ฯ |๗๕.๙๒| ภวิสฺสติ จกฺกวตฺติ จาตุรนฺโต มหิทฺธิโก เวกรํ นาม นครํ วิสุกมฺเมน มาปิตํ ฯ |๗๕.๙๓| เหสฺสติ สพฺพโสวณฺณํ นานารตนภูสิตํ เอเตเนว อุปาเยน สํสริสฺสติ โยนิโย ฯ |๗๕.๙๔| สพฺพตฺถ สุขิโต หุตฺวา เทวตฺเต อถ มานุเส ปจฺฉิเม ภวสมฺปตฺเต พฺรหฺมพนฺธุ ภวิสฺสติ ฯ |๗๕.๙๕| อคารา อภินิกฺขมฺม อนคาริ ภวิสฺสติ อวิญฺญตฺติปจฺจโย หุตฺวา นิพฺพายิสฺสตินาสโว ฯ |๗๕.๙๖| อิทํ วตฺวาน สมฺพุทฺโธ สุเมโธ โลกนายโก มม นิชฺฌายมานสฺส ปกฺกามิ อนิลญฺชเส ฯ |๗๕.๙๗| เตน กมฺเมน สุกเตน เจตนาปณิธีหิ จ ชหิตฺวา มานุสํ เทหํ ตุสิตํ อุปปชฺชหํ ฯ |๗๕.๙๘| ตุสิตโต จวิตฺวาน นิพฺพตฺตึ มาตุกุจฺฉิยา โภเค เม อูนตา นตฺถิ ยมฺหิ คพฺเภ วสามหํ ฯ |๗๕.๙๙| มาตุกุจฺฉิคเต มยิ อนฺนปานญฺจ โภชนํ มาตุยา มม ฉนฺเทน นิพฺพตฺตติ ยถิจฺฉกํ ฯ |๗๕.๑๐๐| ชาติยา ปญฺจวสฺเสน ปพฺพชึ อนคาริยํ โอโรปิตมฺหิ เกสมฺหิ อรหตฺตํ อปาปุณึ ฯ |๗๕.๑๐๑| ปุพฺพกมฺมํ คเวสนฺโต โอเรน นทฺทสํ อหํ ตึสกปฺปสหสฺสมฺหิ มม กมฺมํ อนุสฺสรึ ฯ |๗๕.๑๐๒| นโม เต ปุริสาชญฺญ นโม เต ปุริสุตฺตม ตว สาสนมาคมฺม ปตฺโตมฺหิ อจลํ ปทํ ฯ |๗๕.๑๐๓| ตึสกปฺปสหสฺสมฺหิ สมฺพุทฺธมภิปูชยึ ทุคฺคตึ นาภิชานามิ พุทฺธปูชายิทํ ผลํ ฯ |๗๕.๑๐๔| กิเลสา ฌาปิตา มยฺหํ ภวา สพฺเพ สมูหตา นาโคว พนฺธนํ เฉตฺวา วิหรามิ อนาสโว ฯ |๗๕.๑๐๕| สฺวาคตํ วต เม อาสิ มม พุทฺธสฺส สนฺติเก ติสฺโส วิชฺชา อนุปฺปตฺตา กตํ พุทฺธสฺส สาสนํ ฯ |๗๕.๑๐๖| ปฏิสมฺภิทา จตสฺโส วิโมกฺขาปิจ อฏฺฐิเม ฉฬภิญฺญา สจฺฉิกตา กตํ พุทฺธสฺส สาสนนฺติ ฯ อิตฺถํ สุทํ อายสฺมา จนฺทนมาลิโย เถโร อิมา คาถาโย อภาสิตฺถาติ ฯ จนฺทนมาลิยตฺเถรสฺส อปทานํ สมตฺตํ ฯ