๑๖. สัฏฐีกูฏสหัสสเปตวัตถุ

๑๓๖|๑๓๖.๗๑๕| ๑๖ กินฺนุ อุมฺมตฺตรูโปว มิโค ภนฺโตว ธาวสิ นิสํสยํ ปาปกมฺมํ กินฺนุ สทฺทยเส ตุวนฺติ ฯ |๑๓๖.๗๑๖| อหํ ภนฺเต เปโตมฺหิ ทุคฺคโต ยมโลกิโก ปาปกมฺมํ กริตฺวาน เปตโลกํ อิโต คโต ฯ |๑๓๖.๗๑๗| สฏฺฐี กูฏสหสฺสานิ ปริปุณฺณานิ สพฺพโส สีเส มยฺหํ นิปตนฺติ เต ภินฺทนฺติ จ มตฺถกนฺติ ฯ |๑๓๖.๗๑๘| กินฺนุ กาเยน วาจาย มนสา ทุกฺกฏํ กตํ กิสฺส กมฺมวิปาเกน เปตโลกํ อิโต คโตติ ฯ |๑๓๖.๗๑๙| สฏฺฐี กูฏสหสฺสานิ ปริปุณฺณานิ สพฺพโส สีเส ตุยฺหํ นิปตนฺติ เต ภินฺทนฺติ จ มตฺถกนฺติ ฯ |๑๓๖.๗๒๐| อถทฺทุสาสึ สมฺพุทฺธํ สุเนตฺตํ ภาวิตินฺทฺริยํ นิสินฺนํ รุกฺขมูลสฺมึ ฌายนฺตํ อกุโตภยํ ฯ |๑๓๖.๗๒๑| สาลิตฺตกปฺปหาเรน ภินฺทิสฺสํ ตสฺส มตฺถกํ ตสฺส กมฺมวิปาเกน อิทํ ทุกฺขํ นิคจฺฉิสฺสํ ฯ |๑๓๖.๗๒๒| สฏฺฐี กูฏสหสฺสานิ ปริปุณฺณานิ สพฺพโส สีเส มยฺหํ นิปตนฺติ เต ภินฺทนฺติ จ มตฺถกนฺติ ฯ |๑๓๖.๗๒๓| ธมฺเมน เต กาปุริส สฏฺฐี กูฏสหสฺสานิ ปริปุณฺณานิ สพฺพโส สีเส ตุยฺหํ นิปตนฺติ เต ภินฺทนฺติ จ มตฺถกนฺติ ฯ สฏฺฐิกูฏสหสฺสเปตวตฺถุ โสฬสมํ ฯ ตสฺสุทฺทานํ อมฺพสกฺขโร เสริสฺสโก จ ปิงฺคโล เรวตี อุจฺฉุขาทโก เทฺว กุมารา เทฺว คูถโภชนา ปาฏลิโปกฺขรณี จ อกฺขโต โภคสํหรา เสฏฺฐิปุตฺตา สฏฺฐิกูฏสหสฺสานิ วคฺโค เตน ปวุจฺจตีติ ฯ มหาวคฺโค จตุตฺโถ ฯ เปตวตฺถุ สมตฺตํ ฯ -------------