๑๐. ขลาตยเปตวัตถุ

๙๕|๙๕.๕๘| ๑๐ กา นุ อนฺโตวิมานสฺมึ ติฏฺฐนฺตี นูปนิกฺขมิ อุปนิกฺขมสฺสุ ภทฺเท ปสฺสามิ ตํ มหิทฺธิกนฺติ ฯ |๙๕.๕๙| อฏฺฏิยามิ หรายามิ นคฺคา นิกฺขมิตุํ พหิ เกเสหมฺหิ ปฏิจฺฉนฺนา ปุญฺญํ เม อปฺปกํ กตนฺติ ฯ |๙๕.๖๐| หนฺทุตฺตรียํ ทามิ เต อิมํ ทุสฺสํ นิวาสย อิมํ ทุสฺสํ นิวาเสตฺวา พหิ นิกฺขม โสภเณ อุปนิกฺขมสฺสุ ภทฺเท ปสฺสามิ ตํ มหิทฺธิกนฺติ ฯ |๙๕.๖๑| หตฺเถน หตฺเถ เต ทินฺนํ น มยฺหํ อุปกปฺปติ เอเสตฺถุปาสโก สทฺโธ สมฺมา สมฺพุทฺธสาวโก |๙๕.๖๒| เอตํ อจฺฉาทยิตฺวาน มม ทกฺขิณมาทิส ตถาหํ สุขิตา เหสฺสํ สพฺพกามสมิทฺธินีติ ฯ |๙๕.๖๓| ตญฺจ เต นหาปยิตฺวาน วิลิมฺปิตฺวาน วาณิชา วตฺเถหจฺฉาทยิตฺวาน ตสฺสา ทกฺขิณมาทิสุํ |๙๕.๖๔| สมนนฺตรานุทิฏฺเฐ วิปาโก อุปปชฺชถ โภชนจฺฉาทนปานียํ ทกฺขิณาย อิทํ ผลํ |๙๕.๖๕| ตโต สุทฺธา สุจิวสนา กาสิกุตฺตมธารินี หสนฺตี วิมานา นิกฺขมิ ทกฺขิณาย อิทํ ผลนฺติ ฯ |๙๕.๖๖| สุจิตฺตรูปํ รุจิรํ วิมานํ เต จ ภาสติ เทวเต ปุจฺฉิตาจิกฺข กิสฺส กมฺมสฺสิทํ ผลนฺติ ฯ |๙๕.๖๗| ภิกฺขุโน จรมานสฺส โทณินิมฺมุชฺชนี อหํ อทาสึ อุชุภูตสฺส วิปฺปสนฺเนน เจตสา |๙๕.๖๘| ตสฺส กมฺมสฺส กุสลสฺส วิปากํ ทีฆมนฺตรํ อนุโภมิ วิมานสฺมึ ตญฺจ ทานิ ปริตฺตกํ ฯ |๙๕.๖๙| อุทฺธํ จตูหิ มาเสหิ กาลกิริยา ภวิสฺสติ เอกนฺตํ กฏุกํ โฆรํ นิรยูปปติสฺสหํ |๙๕.๗๐| จตุกฺกณฺณํ จตุทฺวารํ วิภตฺตํ ภาคโส มิตํ อโยปาการปริยนฺตํ อยสา ปฏิกุชฺชิตํ ฯ |๙๕.๗๑| ตสฺส อโยมยา ภูมิ ชลิตา เตชสา ยุตฺตา สมนฺตา โยชนสตํ ผริตฺวา ติฏฺฐติ สพฺพทา |๙๕.๗๒| ตตฺถาหํ ทีฆมทฺธานํ ทุกฺขํ เวทิสฺสํ เวทนํ ผลญฺจ ปาปกมฺมสฺส ตสฺมา โสจามิทํ ภูตนฺติ ฯ ขลาติยเปตวตฺถุ ทสมํ ฯ