ว่าด้วยอานิสงส์เป็นต้น

๙๙๖อฏฺฐานิสํเส สมฺปสฺสมาเนน น โส ภิกฺขุ อาปตฺติยา อทสฺสเน อุกฺขิปิตพฺโพ ฯ อฏฺฐานิสํเส สมฺปสฺสมาเนน ปเรสํปิ สทฺธาย สา อาปตฺติ เทเสตพฺพา ฯ อฏฺฐ ยาวตติยกา ฯ อฏฺฐหากาเรหิ กุลานิ ทูเสติ ฯ อฏฺฐ มาติกา จีวรสฺส อุปฺปาทาย ฯ อฏฺฐ มาติกา กฐินสฺส อุพฺภาราย ฯ อฏฺฐ ปานานิ ฯ อฏฺฐหิ อสทฺธมฺเมหิ อภิภูโต ปริยาทินฺนจิตฺโต เทวทตฺโต อาปายิโก เนรยิโก กปฺปฏฺโฐ อเตกิจฺโฉ ฯ อฏฺฐ โลกธมฺมา ฯ อฏฺฐ ครุธมฺมา ฯ อฏฺฐ ปาฏิเทสนียา ฯ อฏฺฐงฺคิโก มุสาวาโท ฯ อฏฺฐ อุโปสถงฺคานิ ฯ อฏฺฐ ทูเตยฺยงฺคานิ ฯ อฏฺฐ ติตฺถิยวตฺตานิ ฯ อฏฺฐ อจฺฉริยา อพฺภุตา ธมฺมา มหาสมุทฺเท ฯ อฏฺฐ อจฺฉริยา อพฺภุตา ธมฺมา อิมสฺมึ ธมฺมวินเย ฯ อฏฺฐ อนติริตฺตา ฯ อฏฺฐ อติริตฺตา ฯ อฏฺฐเม อรุณุคฺคมเน นิสฺสคฺคิยํ โหติ ฯ อฏฺฐ ปาราชิกา ฯ อฏฺฐมํ วตฺถุํ ปริปูเรนฺตี นาเสตพฺพา ฯ อฏฺฐมํ วตฺถุํ ปริปูเรนฺติยา เทสิตาปิ อเทสิตาปิ โหติ ฯ อฏฺฐวาจิกา อุปสมฺปทา ฯ อฏฺฐนฺนํ ปจฺจุฏฺฐาตพฺพํ ฯ อฏฺฐนฺนํ อาสนํ ทาตพฺพํ ฯ อุปาสิกา อฏฺฐ วรานิ ยาจิ ฯ อฏฺฐหงฺเคหิ สมนฺนาคโต ภิกฺขุ ภิกฺขุโนวาทโก สมฺมนฺนิตพฺโพ ฯ อฏฺฐานิสํสา วินยธเร ฯ อฏฺฐ ปรมานิ ฯ ตสฺสปาปิยสิกากมฺมกเตน ภิกฺขุนา อฏฺฐสุ ธมฺเมสุ สมฺมาวตฺติตพฺพํ ฯ อฏฺฐ อธมฺมิกานิ ปาติโมกฺขฏฺฐปนานิ ฯ อฏฺฐ ธมฺมิกานิ ปาติโมกฺขฏฺฐปนานีติ ฯ อฏฺฐกํ นิฏฺฐิตํ ฯ ตสฺสุทฺทานํ

๙๙๗น โส ภิกฺขุ ปเรสมฺปิ ยาวตติยทูสนา ฯ มาติกา กฐินุพฺภารา ปานา อภิภูเตน จ โลกธมฺมา ครุธมฺมา ปาฏิเทสนียา มุสา อุโปสถา จ ทูตงฺคา ติตฺถิกา สมุทฺเทปิ จ อพฺภุตา อนติริตฺตํ อติริตฺตํ นิสฺสคฺคิยํ ปาราชิกฏฺฐมํ วตฺถุํ อเทสิตูปสมฺปทา ปจฺจุฏฺฐานาสนญฺเจว วรํ โอวาทเกน จ อานิสํสา ปรมานิ อฏฺฐธมฺเมสุ วตฺตนา อธมฺมิกา ธมฺมิกา จ อฏฺฐกา สุปฺปกาสิตาติ ฯ