๒. ปภัสสรวิมาน

๔๐|๔๐.๔๘๒| ๒ ปภสฺสวรวณฺณนิเภ สุรตฺตวตฺถนิวาสเน มหิทฺธิเก จนฺทนรุจิรคตฺเต กา ตฺวํ สุเภ เทวเต วนฺทเส มมํ |๔๐.๔๘๓| ปลฺลงฺโก จ เต มหคฺโฆ นานารตนจิตฺติโต รุจิโร ยตฺถ ตฺวํ นิสินฺนา วิโรจสิ เทวราชาริว นนฺทเน วเน |๔๐.๔๘๔| กึ ตฺวํ ปุเร สุจริตมาจริ ภทฺเท กิสฺส กมฺมสฺส วิปากํ อนุโภสิ เทวโลกสฺมึ เทวเต ปุจฺฉิตาจิกฺข กิสฺส กมฺมสฺสิทํ ผลนฺติ ฯ |๔๐.๔๘๕| ปิณฺฑาย เต จรนฺตสฺส มาลํ ผาณิตญฺจ อททํ ภนฺเต ตสฺส กมฺมสฺสิทํ วิปากํ อนุโภมิ เทวโลกสฺมึ |๔๐.๔๘๖| โหติ จ เม อนุตาโป อปราธํ ทุกฺขิตญฺจ เม ภนฺเต สาหํ ธมฺมํ นาสฺโสสึ สุเทสิตํ ธมฺมราเชน |๔๐.๔๘๗| ตํ ตํ วทามิ ภทฺทนฺเต ยสฺส เม อนุกมฺปิโย โกจิ ธมฺเมสุ ตํ สมาทเปถ สุเทสิตํ ธมฺมราเชน |๔๐.๔๘๘| เยสํ อตฺถิ สทฺธา พุทฺเธ ธมฺเม จ สงฺฆรตเน จ เต มํ อติวิโรจนฺติ อายุนา ยสสา สิริยา |๔๐.๔๘๙| ปตาเปน วณฺเณน อุตฺตริตรา อญฺเญ มหิทฺธิกตรา มยา เทวาติ ฯ ปภสฺสรวิมานํ ทุติยํ ฯ