๓. สีหาเถรีคาถา

๔๔๑|๔๔๑.๗๗| ๓ อโยนิโสมนสิการา กามราเคน อทฺธิตา อโหสึ อุทฺธฏา ปุพฺเพ จิตฺเต อวสวตฺตินี ฯ |๔๔๑.๗๘| ปริยุฏฺฐิตา กิเลเสหิ สุขสญฺญานุวตฺตินี สมํ จิตฺตสฺส นาลภึ ราคจิตฺตวสานุคา ฯ |๔๔๑.๗๙| กิสา ปณฺฑุ วิวณฺณา จ สตฺต วสฺสานิ จาริหํ นาหํ ทิวา วา รตฺตึ วา สุขํ วินฺทึ สุทุกฺขิตา ฯ |๔๔๑.๘๐| ตโต รชฺชุํ คเหตฺวาน ปาวิสึ วนมนฺตรํ วรมฺเม อิธ อุพฺพนฺธํ ยญฺจ หีนํ ปุนาจเร ฯ |๔๔๑.๘๑| ทฬฺหปาสํ กริตฺวาน รุกฺขสาขาย พนฺธิย ปกฺขิปึ ปาสํ คีวายํ อถ จิตฺตํ วิมุจฺจิ เม ฯ สีหา ฯ