๗. ธนปาลเปตวัตถุ

๑๐๔|๑๐๔.๒๐๗| ๗ นคฺโค ทุพฺพณฺณรูโปสิ กีโส ธมนิสณฺฐิโต อุปฺผาสุลิโก กีสิโก โก นุ ตฺวํ อสิ มาริสาติ ฯ |๑๐๔.๒๐๘| อหํ ภทนฺเต เปโตมฺหิ ทุคฺคโต ยมโลกิโก ปาปกมฺมํ กริตฺวาน เปตโลกํ อิโต คโตติ ฯ |๑๐๔.๒๐๙| กึ นุ กาเยน วาจาย มนสา ทุกฺกฏํ กตํ กิสฺส กมฺมวิปาเกน เปตโลกํ อิโต คโตติ ฯ |๑๐๔.๒๑๐| นครํ อตฺถิ ทสนฺนานํ เอรกจฺฉนฺติ วิสฺสุตํ ตตฺถ เสฏฺฐี ปุเร อาสึ ธนปาโลติ มํ วิทู ฯ |๑๐๔.๒๑๑| อสีติ สกฏวาหานํ หิรญฺญสฺส อโหสิ เม ปหูตํ เม ชาตรูปํ มุตฺตาเวฬุริยา พหู ฯ |๑๐๔.๒๑๒| ตาว มหาธนสฺสาปิ น เม ทาตุํ ปิยํ อหุ ปิทหิตฺวา ทฺวารํ ภุญฺชามิ มา มํ ยาจนกาทฺทสุํ ฯ |๑๐๔.๒๑๓| อสทฺโธ มจฺฉรี วาสึ กทริโย ปริภาสโก ททนฺตานํ กโรนฺตานํ วารยิสฺสํ พหุชฺชนํ ฯ |๑๐๔.๒๑๔| วิปาโก นตฺถิ ทานสฺส สํยมสฺส กุโต ผลํ โปกฺขรญฺโญทปานานิ อารามานิ จ โรปิเต ปปาโย จ วินาเสสึ ทุคฺเค สงฺกมนานิ จ ฯ |๑๐๔.๒๑๕| สฺวาหํ อกตกลฺยาโณ กตปาโป ตโต จุโต อุปฺปนฺโน ปิตฺติวิสยํ ขุปฺปิปาสสมปฺปิโต |๑๐๔.๒๑๖| ปญฺจปญฺญาสวสฺสานิ ตโต กาลกโต อหํ ฯ นาภิชานามิ ภุตฺตํ วา ปีตํ วา ปน ปานิยํ |๑๐๔.๒๑๗| โย สํยโม โส วินาโส โย วินาโส โส สํยโม เปตา หิ กิร ชานนฺติ โย สํยโม โส วินาโส ฯ |๑๐๔.๒๑๘| อหํ ปุเร สํยมิสฺสํ นาทาสึ พหุเก ธเน สนฺเตสุ เทยฺยธมฺเมสุ ทีปํ นากาสิมตฺตโน ฯ สฺวาหํ ปจฺฉานุตปฺปามิ อตฺตกมฺมผลูปโค |๑๐๔.๒๑๙| อุทฺธํ จตูหิ มาเสหิ กาลกิริยา ภวิสฺสติ ฯ เอกนฺตํ กฏุกํ โฆรํ นิรยํ ปปติสฺสหํ |๑๐๔.๒๒๐| จตุกฺกณฺณํ จตุทฺวารํ วิภตฺตํ ภาคโส มิตํ อโยปาการปริยนฺตํ อยสา ปฏิกุชฺชิตํ ฯ |๑๐๔.๒๒๑| ตสฺส อโยมยา ภูมิ ชลิตา เตชสา ยุตฺตา สมนฺตา โยชนสตํ ผริตฺวา ติฏฺฐติ สพฺพทา ฯ |๑๐๔.๒๒๒| ตตฺถาหํ ทีฆมทฺธานํ ทุกฺขํ เวทิสฺส เวทนํ ผลํ ปาปสฺส กมฺมสฺส ตสฺมา โสจามหํ ภุสํ ฯ |๑๐๔.๒๒๓| ตํ โว วทามิ ภทฺทํ โว ยาวนฺเตตฺถ สมาคตา มา กตฺถ ปาปกํ กมฺมํ อาวึ วา ยทิ วา รโห ฯ |๑๐๔.๒๒๔| สเจ ตํ ปาปกํ กมฺมํ กริสฺสถ กโรถ วา น โว ทุกฺขา ปมุตฺตตฺถิ อุปจฺฉาปิ ปลายิตํ |๑๐๔.๒๒๕| มตฺเตยฺยา โหถ เปตฺเตยฺยา กุเล เชฏฺฐาปจายิกา สามญฺญา โหถ พฺรหฺมญฺญา เอวํ สคฺคํ คมิสฺสถาติ ฯ |๑๐๔.๒๒๖| น อนฺตลิกฺเข น สมุทฺทมชฺเฌ น ปพฺพตานํ วิวรํ ปวิสฺส น วิชฺชตี โส ชคติปฺปเทโส ยตฺรฏฺฐิโต มุญฺเจยฺย ปาปกมฺมาติ ฯ ธนปาลเปตวตฺถุ สตฺตมํ ฯ