๑๒. อุรคเปตวัตถุ

๙๗|๙๗.๘๕| ๑๒ อุรโคว ตจํ ชิณฺณํ หิตฺวา คจฺฉติ สนฺตนุํ เอวํ สรีเร นิพฺโภเค เปเต กาลกเต สติ |๙๗.๘๖| ฑยฺหมาโน น ชานาติ ญาตีนํ ปริเทวิตํ ตสฺมา เอตํ น โสจามิ คโต โส ตสฺส ยา คติ |๙๗.๘๗| อนพฺภิโต ตโต อาคา นานุญฺญาโต อิโต คโต ยถาคโต ตถา คโต ตตฺถ กา ปริเทวนา |๙๗.๘๘| ฑยฺหมาโน น ชานาติ ญาตีนํ ปริเทวิตํ ตสฺมา เอตํ น โรทามิ คโต โส ตสฺส ยา คติ ฯ |๙๗.๘๙| สเจ โรเท กิสา อสฺสํ ตตฺถ เม กึ ผลํ สิยา ญาติมิตฺตสุหชฺชานํ ภิยฺโย โน อรตี สิยา |๙๗.๙๐| ฑยฺหมาโน น ชานาติ ญาตีนํ ปริเทวิตํ ตสฺมา เอตํ น โรทามิ คโต โส ตสฺส ยา คติ ฯ |๙๗.๙๑| ยถาปิ ทารโก จนฺทํ คจฺฉนฺตํ อนุโรทติ เอวํ สมฺปทเมเวตํ โย เปตํ อนุโสจติ |๙๗.๙๒| ฑยฺหมาโน น ชานาติ ญาตีนํ ปริเทวิตํ ตสฺมา เอตํ น โรทามิ คโต โส ตสฺส ยา คติ ฯ |๙๗.๙๓| ยถาปิ พฺรเหฺม อุทกุมฺโภ ภินฺโน อปฺปฏิสนฺธิโย เอวํ สมฺปทเมเวตํ โย เปตํ อนุโสจติ |๙๗.๙๔| ฑยฺหมาโน น ชานาติ ญาตีนํ ปริเทวิตํ ตสฺมา เอตํ น โรทามิ คโต โส ตสฺส ยา คตีติ ฯ อุรคเปตวตฺถุ ทฺวาทสมํ ฯ อุทฺทานํ เขตฺตูปมา วณฺณา ทุเว ธีตลีกํ ติโรกุฑฺฑํ ปุตฺตขาทิกา โคณคูถํ ปาสาทํ นาโครค ทฺวาทสา เต วตฺถูนิ วคฺเค ปฐเม อุทฺทานํ ฯ อุรควคฺโค ปฐโม ฯ