๓. ทรีมุขชาดก

๘๔๓ปงฺโก จ กามา ปลิโป จ กามา ภยญฺจ เมตํ ติมูลํ ปวุตฺตํ รโช จ ธูโม จ มยา ปกาสิตา หิตฺวา ตุวํ ปพฺพช พฺรหฺมทตฺต ฯ

๘๔๔คธิโต จ รตฺโต จ อธิมุจฺฉิโต จ กาเมสฺวาหํ พฺราหฺมณ ภึสรูปํ ตํ นุสฺสเห ชีวิกตฺโถ ปหาตุํ กาหามิ ปุญฺญานิ อนปฺปกานิ ฯ

๘๔๕โย อตฺถกามสฺส หิตานุกมฺปิโน โอวชฺชมาโน น กโรติ สาสนํ อิทเมว เสยฺโย อิติ มญฺญมาโน ปุนปฺปุนํ คพฺภมุเปติ มนฺโท ฯ

๘๔๖โส โฆรรูปํ นิรยํ อุเปติ สุภาสุภํ มุตฺตกรีสปูรํ สตฺตา สกาเย น ชหนฺติ คิทฺธา เย โหนฺติ กาเมสุ อวีตราคา ฯ

๘๔๗มิเฬฺหน ลิตฺตา รุหิเรน มกฺขิตา เสเมฺหน ลิตฺตา อุปนิกฺขมนฺติ ยํ ยํ หิ กาเยน ผุสนฺติ ตาวเท สพฺพํ อสาตํ ทุกฺขเมว เกวลํ ฯ

๘๔๘ทิสฺวา วทามิ น หิ อญฺญโต สวํ ปุพฺเพนิวาสํ พหุกํ สรามิ จิตฺราหิ คาถาหิ สุภาสิตาหิ ทรีมุโข นิชฺฌาปยี สุเมธนฺติ ฯ ทรีมุขชาตกํ ตติยํ ฯ ---------