๖. ปทกุศลมาณวชาดก

๑๒๕๕พหุสฺสุตํ จิตฺตกถํ คงฺคา วหติ ปาฏลึ วุยฺหมานก ภทฺทนฺเต เอกํ เม เทหิ คาถกํ ฯ

๑๒๕๖เยน สิญฺจนฺติ ทุกฺขิตํ เยน สิญฺจนฺติ อาตุรํ ตสฺส มชฺเฌ มริสฺสามิ ชาตํ สรณโต ภยํ ฯ

๑๒๕๗ยตฺถ วีชานิ รูหนฺติ สตฺตา ยตฺถ ปติฏฺฐิตา สา เม สีสํ นิปีเฬติ ชาตํ สรณโต ภยํ ฯ

๑๒๕๘เยน ภตฺตานิ ปจฺจนฺติ สีตํ เยน วิหญฺญติ โส มํ ฑหติ คตฺตานิ ชาตํ สรณโต ภยํ ฯ

๑๒๕๙เยน ภตฺเตน ยาเปนฺติ ปุถู พฺราหฺมณขตฺติยา โส มํ ภุตฺโต พฺยาปาทิ ชาตํ สรณโต ภยํ ฯ

๑๒๖๐คิมฺหานํ ปจฺฉิเม มาเส วาตมิจฺฉนฺติ ปณฺฑิตา โส มํ ภญฺชติ คตฺตานิ ชาตํ สรณโต ภยํ ฯ

๑๒๖๑ยํ นิสฺสิตา ชคติรุหํ (วิหงฺคมา) สฺวายํ อคฺคึ ปมุญฺจติ ทิสา ภชถ วงฺกงฺคา ชาตํ สรณโต ภยํ ฯ

๑๒๖๒ยมานยึ โสมนสฺสํ มาลินึ จนฺทนุสฺสทํ สา มํ ฆรา นีหรติ ชาตํ สรณโต ภยํ ฯ

๑๒๖๓เยน ชาเตน นนฺทิสฺสํ ยสฺส จ ภวมิจฺฉิสํ โส มํ ฆรา นีหรติ ชาตํ สรณโต ภยํ ฯ

๑๒๖๔สุณนฺตุ เม ชานปทา เนคมา จ สมาคตา ยโตทกํ ตทาทิตฺตํ ยโต เขมํ ตโต ภยํ ราชา วิลุมฺปเต รฏฺฐํ พฺราหฺมโณ จ ปุโรหิโต อตฺตคุตฺตา วิหรถ ชาตํ สรณโต ภยนฺติ ฯ ปทกุสลมาณวชาตกํ ฉฏฺฐํ ฯ ---------