๘. ตักกลชาดก

๑๔๐๐น ตกฺกลา สนฺติ น อาลุปานิ น วิลาลิโย น กลมฺพานิ ตาต เอโก อรญฺญมฺหิ สุสานมชฺเฌ กิมตฺถิโก ตาต ขณาสิ กาสุํ ฯ

๑๔๐๑ปิตามโห ตาต สุทุพฺพโล เต อเนกพฺยาธีหิ ทุกฺเขหิ ผุฏฺโฐ ตมชฺชหํ นิกฺขณิสฺสามิ โสพฺเภ น หิสฺส ตํ ชีวิตํ โรจยามิ ฯ

๑๔๐๒สงฺกปฺปเมตํ ปฏิลทฺธปาปกํ อจฺจาหิตํ กมฺมํ กโรสิ ลุทฺทํ มยาปิ ตาต ปฏิลจฺฉเส ตุวํ เอตาทิสํ กมฺม ชรูปนีโต ตํ กูลวตฺตํ อนุวตฺตมาโน อหมฺปิ ตํ นิกฺขณิสฺสามิ โสพฺเภ ฯ

๑๔๐๓ผรุสาหิ วาจาหิ ปกุพฺพมาโน อาสชฺช มํ ตฺวํ วทเส กุมาร ปุตฺโต มมํ โอรสโก สมาโน อหิตานุกมฺปี เม ตฺวํสิ ปุตฺต ฯ

๑๔๐๔น ตฺยาหํ ตาต อหิตานุกมฺปี หิตานุกมฺปี เต อหญฺหิ ตาต ปาปญฺจ ตํ กมฺม ปกุพฺพมานํ อรหามิ โน วารยิตุํ ตโต หิ ฯ

๑๔๐๕โย มาตรํ วา ปิตรํ สวิฏฺฐ อทูสเก หึสติ ปาปธมฺโม กายสฺส เภทา อภิสมฺปรายํ อสํสยํ โส นิรยํ อุเปติ ฯ

๑๔๐๖โย มาตรํ วา ปิตรํ สวิฏฺฐ อนฺเนน ปาเนน อุปฏฺฐหาติ กายสฺส เภทา อภิสมฺปรายํ อสํสยํ โส สุคตึ อุเปติ ฯ

๑๔๐๗น เม ตฺวํ ปุตฺต อหิตานุกมฺปี หิตานุกมฺปี เม ตฺวํสิ ปุตฺต อหญฺจ เต มาตรา วุจฺจมาโน เอตาทิสํ กมฺม กโรมิ ลุทฺทํ ฯ

๑๔๐๘ยา เต สา ภริยา อนริยรูปา มาตา มเมสา สกิยา ชเนตฺติ นิทฺธาปเย ตญฺจ สกา อคารา อญฺญมฺปิ เต สา ทุขมาวเหยฺย ฯ

๑๔๐๙ยา เต สา ภริยา อนริยรูปา มาตา มเมสา สกิยา ชเนตฺติ ทนฺตา กเรณูว วสูปนีตา สา ปาปธมฺมา ปุนราวชาตูติ ฯ ตกฺกลชาตกํ อฏฺฐมํ ฯ