๕. ชนสันธชาดก

๑๖๔๙ทส ขลุมานิ ฐานานิ ยานิ ปุพฺเพ อกริตฺวา ส ปจฺฉา อนุตปฺปติ อิจฺจาห ราชา ชนสนฺโธ ฯ

๑๖๕๐อลทฺธา วิตฺตํ ตปติ ปุพฺเพ อสมุทานิตํ น ปุพฺเพ ธนเมสิสฺสํ อิติ ปจฺฉานุตปฺปติ ฯ

๑๖๕๑สกฺยรูปํ ปุเร สนฺตํ มยา สิปฺปํ น สิกฺขิตํ กิจฺฉา วุตฺติ อสิปฺปสฺส อิติ ปจฺฉานุตปฺปติ ฯ

๑๖๕๒กูฏเวที ปุเร อาสึ ปิสุโณ ปิฏฺฐิมํสิโก จณฺโฑ จ ผรุโส จาสึ อิติ ปจฺฉานุตปฺปติ ฯ

๑๖๕๓ปาณาติปาตี ปุเร อาสึ ลุทฺโท จาปิ อนาริโย ภูตานํ นาปจายิสฺสํ อิติ ปจฺฉานุตปฺปติ ฯ

๑๖๕๔พหูสุ วต สนฺตีสุ อนาปทาสุ อิตฺถิสุ ปรทารํ อาเสวิสฺสํ อิติ ปจฺฉานุตปฺปติ ฯ

๑๖๕๕พหุมฺหิ วต สนฺตมฺหิ อนฺนปาเน อุปฏฺฐิเต น ปุพฺเพ อททํ ทานํ อิติ ปจฺฉานุตปฺปติ ฯ

๑๖๕๖มาตรํ ปิตรํ จาปิ ชิณฺณเก คตโยพฺพเน ปหุสนฺโต น โปสิสฺสํ อิติ ปจฺฉานุตปฺปติ ฯ

๑๖๕๗อาจริยมนุสตฺถารํ สพฺพกามรสาหรํ ปิตรํ อติมญฺญิสฺสํ อิติ ปจฺฉานุตปฺปติ ฯ

๑๖๕๘สมเณ พฺราหฺมเณ จาปิ สีลวนฺเต พหุสฺสุเต น ปุพฺเพ ปยิรุปาสิสฺสํ อิติ ปจฺฉานุตปฺปติ ฯ

๑๖๕๙สาธุ โหติ ตโป จิณฺโณ สนฺโต จ ปยิรุปาสิโต น จ ปุพฺเพ ตโป จิณฺโณ อิติ ปจฺฉานุตปฺปติ ฯ

๑๖๖๐โย จ เอตานิ ฐานานิ โยนิโส ปฏิปชฺชติ กรํ ปุริสกิจฺจานิ ส ปจฺฉา นานุตปฺปตีติ ฯ ชนสนฺธชาตกํ ปญฺจมํ ฯ ---------