๔. จุลลนารทกัสสปชาดก

๑๗๖๔น เต กฏฺฐานิ ภินฺนานิ น เต อุทกมาภตํ อคฺคิปิ เต น หาสิโต กินฺนุ มนฺโทว ฌายสิ ฯ

๑๗๖๕น อุสฺสเห วเน วตฺถุํ กสฺสปามนฺตยามิ ตํ ทุกฺโข วาโส อรญฺญสฺมึ รฏฺฐํ อิจฺฉามิ คนฺตเว ฯ

๑๗๖๖ยถา อหํ อิโต คนฺตฺวา ยสฺมึ ชนปเท วสํ อาจารํ พฺรเหฺม สิกฺเขยฺย ตํ ธมฺมํ อนุสาส มํ ฯ

๑๗๖๗สเจ อรญฺญํ หิตฺวาน วนมูลผลานิ จ รฏฺเฐ โรจยเส วาสํ ตํ ธมฺมํ นิสาเมหิ เม ฯ

๑๗๖๘วิสํ มา ปฏิเสวิตฺถ ปปาตํ ปริวชฺชย ปงฺเก จ มา วิสีทิตฺโถ ยตฺโต อาสีวิเส จเร ฯ

๑๗๖๙กินฺนุ วิสํ ปปาโต วา ปงฺโก วา พฺรหฺมจารินํ กํ ตฺวํ อาสีวิสํ พฺรูหิ ตํ เม อกฺขาหิ ปุจฺฉิโต ฯ

๑๗๗๐อาสโว ตาต โลกสฺมึ สุรา นาม ปวุจฺจติ มนุญฺญา สุรภี วคฺคู มธุขุทฺทรสูปมา วิสํ ตทาหุ อริยา พฺรหฺมจริยสฺส นารท ฯ

๑๗๗๑อิตฺถิโย ตาต โลกสฺมึ ปมตฺตํ ปมเถนฺติ ตา ผรนฺติ มุนิโน จิตฺตํ ตูลํ ภฏฺฐํว มาลุโต ปปาโต เอส อกฺขาโต พฺรหฺมจริยสฺส นารท ฯ

๑๗๗๒ลาโภ สิโลโก สกฺกาโร ปูชา ปรกุเลสุ จ ปงฺโก เอโสว อกฺขาโต พฺรหฺมจริยสฺส นารท ฯ

๑๗๗๓มหนฺตา ตาต ราชาโน อาวสนฺติ มหึ อิมํ เต ตาทิเส มนุสฺสินฺเท มหนฺเต ตาต นารท ฯ

๑๗๗๔อิสฺสรานํ อธิปตีนํ น เตสํ ปาทโต จเร อาสีวิโสติ อกฺขาโต พฺรหฺมจริยสฺส นารท ฯ

๑๗๗๕ภตฺตตฺโถ ภตฺตกาเล จ ยํ เคหํ อุปสงฺกเม ยเทตฺถ กุสลํ ชญฺญา ตตฺถ ฆาเสสนํ จเร ฯ ปวิสิตฺวา ปรกุลํ ปานตฺโถ โภชนาย วา มิตํ ขาเท มิตํ ภุญฺเช น จ รูเป มนํ กเร ฯ

๑๗๗๖คุฏฺฐํ มชฺชํ กิราสญฺจ สภานิกิรณานิ จ อารกา ปริวชฺเชหิ ยานีว วิสมํ ปถนฺติ ฯ จุลฺลนารทกสฺสปชาตกํ จตุตฺถํ ฯ ---------