๙. รุรุมิคชาดก

๑๘๓๙ตสฺส คามวรํ ทมฺมิ นาริโย จ อลงฺกตา โก เม ตํ มิคมกฺขาสิ มิคานํ มิคมุตฺตมํ ฯ

๑๘๔๐มยฺหํ คามวรํ เทหิ นาริโย จ อลงฺกตา อหํ เต มิคมกฺขิสฺสํ มิคานํ มิคมุตฺตมํ ฯ

๑๘๔๑เอตสฺมึ วนสณฺฑสฺมึ อมฺพา สาลา จ ปุปฺผิตา อินฺทโคปกสญฺฉนฺนา เอตฺเถโส ติฏฺฐติ มิโค ฯ

๑๘๔๒ธนุํ อเทฺวชฺฌํ กตฺวาน อุสุํ สนฺนยฺหุปาคมิ มิโค จ ทิสฺวา ราชานํ ทูรโต อชฺฌภาสถ อาคเมหิ มหาราช มา มํ วิชฺฌิ รเถสภ โก นุ เต อิทมกฺขาสิ เอตฺเถโส ติฏฺฐติ มิโค ฯ

๑๘๔๓เอส ปาปจโร โปโส สมฺม ติฏฺฐติ อารกา โส หิ เม อิทมกฺขาสิ เอตฺเถโส ติฏฺฐติ มิโค ฯ

๑๘๔๔สจฺจํ กิเรวมาหํสุ นรา เอกจฺจิยา อิธ กฏฺฐํ นิปาวตํ เสยฺโย น เตฺวเวกจฺจิโย นโร ฯ

๑๘๔๕กินฺนุ รุรุ ครหสิ มิคานํ กึ ปกฺขินํ กึ ปน มานุสานํ ภยํ หิ มํ วินฺทตินปฺปรูปํ สุตฺวาน ตํ มานุสิ ภาสมานํ ฯ

๑๘๔๖ยมุทฺธรึ วาหเน วุยฺหมานํ มโหทเก สลิเล สีฆโสเต ตโตนิทานํ ภยมาคตํ มม ทุกฺโข หเว ราช อสพฺภิ สงฺคโม ฯ

๑๘๔๗โสหํ จตุปฺปตฺตมิมํ วิหงฺคมํ ตนุจฺฉิทํ หทเย โอสชฺชามิ หนามิ ตํ มิตฺตทุพฺภึ อกิจฺจการึ โย ตาทิสํ กมฺมกตํ น ชาเน ฯ

๑๘๔๘ธีรสฺส พาลสฺส หเว ชนินฺท สนฺโต วธํ นปฺปสํสนฺติ ชาตุ กามํ ฆรํ คจฺฉตุ ปาปธมฺโม ยญฺจสฺส ภตฺตํ ตเทตสฺส เทหิ อหญฺจ เต กามกโร ภวามิ ฯ

๑๘๔๙อทฺธา รุรุ อญฺญตโร สตํ โส โย ทุพฺภิโน มานุสสฺส น ทุพฺภี กามํ ฆรํ คจฺฉตุ ปาปธมฺโม ยญฺจสฺส ภตฺตํ ตเทตสฺส ทมฺมิ อหญฺจ เต คามวรํ ททามิ ฯ

๑๘๕๐สุวิชานํ สิคาลานํ สกุนฺตานญฺจ วสฺสิตํ มนุสฺสวสฺสิตํ ราช ทุพฺพิชานตรํ ตโต อปิ เจ มญฺญตี โปโส ญาติ มิตฺโต สขาติ วา โย ปุพฺเพ สุมโน หุตฺวา ปจฺฉา สมฺปชฺชเต ทิโส ฯ

๑๘๕๑สมาคตา ชานปทา เนคมา จ สมาคตา มิคา ธญฺญานิ ขาทนฺติ ตํ เทโว ปฏิเสธตุ ฯ

๑๘๕๒กามํ ชนปโท มาสิ รฏฺฐญฺจาปิ วินสฺสตุ น เตฺววาหํ รุรุํ ทุพฺเภ ทตฺวา อภย ปกฺขินํ ฯ

๑๘๕๓มา เม ชนปโท อาสิ มา มํ ชนปโท อหุ น เตฺววาหํ มิคราชสฺส วรํ ทตฺวา มุสา ภเณติ ฯ รุรุมิคชาตกํ นวมํ ฯ ---------