๑๐. ภัณฑุติณฑุกชาดก

๒๔๑๙อปฺปมาโท อมตํปทํ ปมาโท มจฺจุโน ปทํ อปฺปมตฺตา น มียนฺติ เย ปมตฺตา ยถา มตา ฯ มทา ปมาโท ชาเยถ ปมาทา ชายเต ขโย ขยา ปโทสา ชายนฺติ มา มโท ภรตูสภ ฯ พหู หิ ขตฺติยา ชีนา อตฺถํ รฏฺฐํ ปมาทิโน อโถปิ คามิโน คามา อนาคารา อคาริโน ฯ ขตฺติยสฺส ปมตฺตสฺส รฏฺฐสฺมึ รฏฺฐวฑฺฒน สพฺเพ โภคา วินสฺสนฺติ รญฺโญ ตํ วุจฺจเต อฆํ ฯ เนส ธมฺโม มหาราช อติเวลํ ปมชฺชสิ อิทฺธํ ผีตํ ชนปทํ โจรา วิทฺธํสยนฺติ นํ ฯ น เต ปุตฺตา ภวิสฺสนฺติ น หิรญฺญํ น ธานิยํ รฏฺเฐ วิลุมฺปมานมฺหิ สพฺพโภเคหิ ชิยฺยสิ ฯ สพฺพโภคปริชิณฺณํ ราชานํ วาปิ ขตฺติยํ ญาติมิตฺตา สุหชฺชา จ น ตํ มญฺญนฺติ มนฺติยํ ฯ หตฺถาโรหา อนีกฏฺฐา รถิกา ปตฺติการกา ตเมวมุปชีวนฺตา น ตํ มญฺญนฺติ มนฺติยํ ฯ อสํวิหิตกมฺมนฺตํ พาลํ ทุมฺมนฺติมนฺตินํ สิรี ชหติ ทุมฺเมธํ ชิณฺณํว อุรโค ตจํ ฯ สุสํวิหิตกมฺมนฺตํ กาลุฏฺฐายึ อตนฺทิตํ สพฺเพ โภคาภิวฑฺฒนฺติ คาโว สอุสภามิว อุปสฺสุตึ มหาราช รฏฺเฐ ชนปเท จร ตตฺถ ทิสฺวา จ สุตฺวา จ ตโต ตํ ปฏิปชฺชสิ ฯ

๒๔๒๐เอวํ เวเทตุ ปญฺจาโล สงฺคาเม สรมปฺปิโต ยถาหมชฺช เวเทมิ กณฺฏเกน สมปฺปิโต ฯ

๒๔๒๑ชิณฺโณ ทุพฺพลจกฺขูสิ น รูปํ สาธุ ปสฺสสิ กึ ตตฺถ พฺรหฺมทตฺตสฺส ยนฺตํ มคฺเคยฺย กณฺฏโก ฯ

๒๔๒๒พเหฺวตฺถ พฺรหฺมทตฺตสฺส โยหํ มคฺคสฺมิ พฺราหฺมณ อรกฺขิตา ชานปทา อธมฺมพลินา หตา ฯ รตฺติญฺหิ โจรา ขาทนฺติ ทิวา ขาทนฺติ ตุณฺฑิยา รฏฺฐสฺมึ กูฏราชสฺส พหุ อธมฺมิโก ชโน ฯ เอตาทิเส ภเย ชาเต ภยฏฺฏา ตาต มาณวา นิลฺเลนกานิ กุพฺพนฺติ วเน อาหตฺว กณฺฏกํ ฯ

๒๔๒๓กทาสฺสุ นาม ยํ ราชา พฺรหฺมทตฺโต มริสฺสติ ยสฺส รฏฺฐสฺมิ ชิยฺยนฺติ อปฺปติกา กุมาริกา ฯ

๒๔๒๔ทุพฺภาสิตญฺหิ เต ชมฺมิ อนตฺถปทโกวิเท กุหึ ราชา กุมารีนํ ภตฺตารํ ปริเยสติ ฯ

๒๔๒๕น เม ทุพฺภาสิตํ พฺรเหฺม โกวิทตฺถปทา อหํ อรกฺขิตา ชานปทา อธมฺมพลินา หตา ฯ รตฺติญฺหิ โจรา ขาทนฺติ ทิวา ขาทนฺติ ตุณฺฑิยา รฏฺฐสฺมึ กูฏราชสฺส พหุ อธมฺมิโก ชโน ทุชฺชีเว ทุพฺภเร ทาเร กุโต ภตฺตา กุมาริยา ฯ

๒๔๒๖เอวํ สยตุ ปญฺจาโล สงฺคาเม สตฺติยา หโต ยถายํ กปโณ เสติ หโต ผาเลน สาลิโย ฯ

๒๔๒๗อธมฺเมน ตุวํ ชมฺม พฺรหฺมทตฺตสฺส กุชฺฌสิ โย ตฺวํ สปสิ ราชานํ อปรชฺฌิตฺวาน อตฺตโน ฯ

๒๔๒๘ธมฺเมน พฺรหฺมทตฺตสฺส อหํ กุชฺฌามิ พฺราหฺมณ อรกฺขิตา ชานปทา อธมฺมพลินา หตา ฯ รตฺติญฺห โจรา ขาทนฺติ ทิวา ขาทนฺติ ตุณฺฑิยา รฏฺฐสฺมึ กูฏราชสฺส พหุ อธมฺมิโก ชโน ฯ สา นูน ปุน เร ปกฺกา วิกาเล ภตฺตมาหริ ภตฺตหารึ อเปกฺขนฺโต หโต ผาเลน สาลิโย ฯ

๒๔๒๙เอวํ หญฺญตุ ปญฺจาโล สงฺคาเม อสินา หโต ยถาหมชฺช ปหโต ขีรญฺจ เม ปวตฺติตํ ฯ

๒๔๓๐ยํ ปสุ ขีรํ ฉฑฺเฑติ ปสุ ผาลํ วิหึสติ กึ ตตฺถ พฺรหฺมทตฺตสฺส ยํ โน ครหเต ภวํ ฯ

๒๔๓๑คารโยฺห พฺรเหฺม ปญฺจาโล พฺรหฺมทตฺตสฺส ราชิโน อรกฺขิตา ชานปทา อธมฺมพลินา หตา ฯ รตฺติญฺหิ โจรา ขาทนฺติ ทิวา ขาทนฺติ ตุณฺฑิยา รฏฺฐสฺมึ กูฏราชสฺส พหุ อธมฺมิโก ชโน ฯ จณฺฑา อากฑฺฒนา คาวี ยํ ปุเร น ทุหามเส ตํทานิ อชฺช โทหาม ขีรกาเมหุปทฺทุตา ฯ

๒๔๓๒เอวํ กนฺทตุ ปญฺจาโล วิมุตฺโต วิปฺปสุกฺขตุ ยถายํ กปณา คาวี วิมุตฺตา ปริธาวติ ฯ

๒๔๓๓ยํ ปสุ ปสุปาลสฺส สมฺภเมยฺย รเวยฺย วา โกนีธ อปราธตฺถิ พฺรหฺมทตฺตสฺส ราชิโน ฯ

๒๔๓๔อปราโธ มหาพฺรเหฺม พฺรหฺมทตฺตสฺส ราชิโน อรกฺขิตา ชานปทา อธมฺมพลินา หตา ฯ รตฺติญฺหิ โจรา ขาทนฺติ ทิวา ขาทนฺติ ตุณฺฑิยา รฏฺฐสฺมึ กูฏราชสฺส พหุ อธมฺมิโก ชโน กถํ โน อสิโกสตฺถา ขีรปา หญฺญเต ปชา ฯ

๒๔๓๕เอวํ ขชฺชตุ ปญฺจาโล หโต ยุทฺเธ สปุตฺตโก ยถาหมชฺช ขชฺชามิ คามิเกหิ อรญฺญโช ฯ

๒๔๓๖น สพฺพภูเตสุ วิเธนฺติ รกฺขํ ราชาโน มณฺฑูก มนุสฺสโลเก เนตฺตาวตา ราชา อธมฺมจารี ยํ ตาทิสํ ชีวมเทยฺยุ ธงฺกา ฯ

๒๔๓๗อธมฺมรูโป วต พฺรหฺมจารี อนุปฺปิยํ ภาสสิ ขตฺติยสฺส วิลุมฺปมานาย ปุถุปฺปชาย ปูเชสิ ราชํ ปรมปฺปวาทึ ฯ สเจ อิทํ พฺรเหฺม สุรชฺชกํ สิยา ผีตํ รฏฺฐํ มุทิตํ วิปฺปสนฺนํ ภุตฺวา พลึ อคฺคปิณฺฑญฺจ กากา น มาทิสํ ชีวมเทยฺยุ ธงฺกาติ ฯ ภณฺฑุติณฺฑุกชาตกํ ทสมํ ฯ --------- ตสฺสุทฺทานํ กึฉนฺท กุมฺภ ชยทฺทิส ฉทฺทนฺต อถ ปณฺฑิตสมฺภว สีรกปิ ทกรกฺขส ปณฺฑรนาควโร อถ สมฺพุล ติณฺฑุกเทวสุโต ฯ ตึสตินิปาตํ นิฏฺฐิตํ ฯ ---------