๑๐. ธาตุวิวัณณเปตวัตถุ

๑๒๐|๑๒๐.๔๙๐| ๑๐ อนฺตลิกฺขสฺมึ ติฏฺฐนฺโต ทุคฺคนฺโธ ปูติ วายสิ มุขญฺจ เต กิมิโย ปูติคนฺธํ ขาทนฺติ กึ กมฺมมกาสิ ปุพฺเพ ฯ |๑๒๐.๔๙๑| ตโต สตฺถํ คเหตฺวาน โอกฺกนฺตนฺติ ปุนปฺปุนํ ขาเรน ปริปฺโผสิตฺวา โอกฺกนฺตนฺติ ปุนปฺปุนํ ฯ |๑๒๐.๔๙๒| กินฺนุ กาเยน วาจาย มนสา ทุกฺกฏํ กตํ กิสฺส กมฺมวิปาเกน อิทํ ทุกฺขํ นิคจฺฉสิ ฯ |๑๒๐.๔๙๓| อหํ ราชคเห รมฺเม รมณีเย คิริพฺพเช อิสฺสโร ธนธญฺญสฺส สุปหูตสฺส มาริส ฯ |๑๒๐.๔๙๔| ตสฺสายํ เม ภริยา จ ธีตา จ สุณิสา จ เม ตมาลํ อุปฺปลญฺจาปิ ปจฺจคฺฆญฺจ วิเลปนํ ถูปํ หรนฺติโย วาเรสึ ตํ ปาปํ ปกตํ มยา ฯ |๑๒๐.๔๙๕| ฉฬาสีติสหสฺสานิ มยํ ปจฺจตฺตเวทนา ถูปปูชํ วิวณฺเณตฺวา ปจาม นิรเย ภุสํ |๑๒๐.๔๙๖| เย จ โข ถูปปูชาย วตฺตนฺเต อรหโต มเห ฯ อาทีนวํ ปกาเสนฺติ วิเวจเยถ โน ตโต |๑๒๐.๔๙๗| อิมา จ ปสฺส อายนฺติโย มาลธารี อลงฺกตา ฯ มาลาวิปากํ อนุโภนฺติโย สมิทฺธา ตา ยสสฺสิโย |๑๒๐.๔๙๘| ตญฺจ ทิสฺวาน อจฺเฉรํ อพฺภูตํ โลมหํสนํ ฯ นโม กโรนฺติ สปฺปญฺญา วนฺทนฺติ ตํ มหามุนึ |๑๒๐.๔๙๙| โสหํ นูน อิโต คนฺตฺวา โยนึ ลทฺธาน มานุสึ ถูปปูชํ กริสฺสามิ อปฺปมตฺโต ปุนปฺปุนนฺติ ฯ ธาตุวิวณฺณเปตวตฺถุ ทสมํ ฯ อุทฺทานํ อภิชฺชมาโน โกณฺฑญฺโญ รถการี ภุเสน จ กุมาโร ภณิกา เจว เทฺว ลุทฺทา ปิฏฺฐิปูชโย วคฺโค เตน วุจฺจตีติ ฯ จูฬวคฺโค ตติโย ฯ -------------