๗. โคตมเถรคาถา

๓๗๖|๓๗๖.๕๘๗| ๗ วิชาเนยฺย สกํ อตฺถํ อวโลเกยฺยาถ ปาวจนํ ยญฺเจตฺถ อสฺส ปฏิรูปํ สามญฺญํ อชฺฌุปคตสฺส ฯ |๓๗๖.๕๘๘| มิตฺตํ อิเธว กลฺยาณํ สิกฺขา วิปุลํ สมาทานํ สุสฺสูสา จ ครูนํ เอตํ สมณสฺส ปฏิรูปํ ฯ |๓๗๖.๕๘๙| พุทฺเธสุ สคารวตา ธมฺเม อปจิติ ยถาภูตํ สงฺเฆ จ จิตฺติกาโร เอตํ สมณสฺส ปฏิรูปํ ฯ |๓๗๖.๕๙๐| อาจารโคจเร ยุตฺโต อาชีโว โสธิโต อคารโยฺห จิตฺตสฺส จ สณฺฐปนํ เอตํ สมณสฺส ปฏิรูปํ ฯ |๓๗๖.๕๙๑| จาริตฺตํ อถ วาริตฺตํ อิริยาปถิยํ ปสาทนิยํ อธิจิตฺเต จ อาโยโค เอตํ สมณสฺส ปฏิรูปํ ฯ |๓๗๖.๕๙๒| อารญฺญกานิ เสนาสนานิ ปนฺตานิ อปฺปสทฺทานิ ภชิตพฺพานิ มุนินา เอตํ สมณสฺส ปฏิรูปํ ฯ |๓๗๖.๕๙๓| สีลญฺจ พาหุสจฺจญฺจ ธมฺมานํ ปวิจโย ยถาภูตํ สจฺจานํ อภิสมโย เอตํ สมณสฺส ปฏิรูปํ ฯ |๓๗๖.๕๙๔| ภาเวยฺย จ อนิจฺจนฺติ อนตฺตสญฺญํ อสุภสญฺญญฺจ โลกมฺหิ จ อนภิรตึ เอตํ สมณสฺส ปฏิรูปํ ฯ |๓๗๖.๕๙๕| ภาเวยฺย จ โพชฺฌงฺเค อิทฺธิปาทานิ อินฺทฺริยพลานิ อฏฺฐงฺคมคฺคมริยํ เอตํ สมณสฺส ปฏิรูปํ ฯ |๓๗๖.๕๙๖| ตณฺหํ ปชเหยฺย มุนี สมูลเก อาสเว ปทาเลยฺย วิหเรยฺย วิปฺปมุตฺโต เอตํ สมณสฺส ปฏิรูปนฺติ ฯ โคตโม เถโร ฯ อุทฺทานํ กาฬุทายี จ โส เถโร เอกวิหารี จ กปฺปิโน จูฬปนฺถโก กปฺโป จ อุปเสโน จ โคตโม สตฺติเม ทสเก เถรา คาถาโย เจตฺถ สตฺตตีติ ฯ ทสกนิปาโต นิฏฺฐิโต ฯ -----------