๑๑. นาคเปตวัตถุ

๙๖|๙๖.๗๓| ๑๑ ปุรโต จ เสเตน ปเลติ หตฺถินา มชฺเฌ ปน อสฺสตรีรเถน ปจฺฉา จ กญฺญา สิวิกายํ นิยฺยาติ โอภาสยนฺตี ทส สพฺพโต ทิสา ฯ |๙๖.๗๔| ตุเมฺห ปน มุคฺครหตฺถปาณิโน รุทมฺมุขา ภินฺนปภินฺนคตฺตา มนุสฺสภูตา กิมกตฺถ ปาปํ เยนญฺญมญฺญสฺส ปิวาถ โลหิตํ (อิติ) ฯ |๙๖.๗๕| ปุรโต ว โย คจฺฉติ กุญฺชเรน เสเตน นาเคน จตุกฺกเมน อมฺหากํ ปุตฺโต อหุ โส ปเชฏฺฐโก ทานานิ ทตฺวาน สุขึ ปโมทติ ฯ |๙๖.๗๖| โย โส มชฺเฌ อสฺสตรีรเถน จตุพฺภิ ยุตฺเตน สุวคฺคิเตน อมฺหากํ ปุตฺโต อหุ มชฺฌิโม โส อมจฺฉรี ทานปติ วิโรจติ ฯ |๙๖.๗๗| ยา สา ปจฺฉา สิวิกาย นิยฺยาติ นารี สปญฺญา มิคมนฺทโลจนา อมฺหากํ ธีตา อหุ สา กนิฏฺฐา ภาคฑฺฒภาเคน สุขี ปโมทติ ฯ |๙๖.๗๘| เอเต จ ทานานิ อทํสุ ปุพฺเพ ปสนฺนจิตฺตา สมณพฺราหฺมณานํ มยํ ปน มจฺฉริโน อหุมฺหา ปริภาสกา สมณพฺราหฺมณานํ เอเต จ ทตฺวา ปริจารยนฺติ มยญฺจ สุสฺสาม นโฬว ทิตฺโตติ ฯ |๙๖.๗๙| กึ ตุมฺหากํ โภชนํ กึ สยนํ กถญฺจ ยาเปถ สุปาปธมฺมิโน ปหูตโภเคสุ อนปฺปเกสุ สุขํ วิราคาย ทุกฺขชฺช ปตฺตา ฯ |๙๖.๘๐| อญฺญมญฺญํ วธิตฺวาน ปิวาม ปุพฺพโลหิตํ พหุํ ปิตฺวา น ทาตา โหม นจฺฉาทิมฺหมฺหเส มยํ ฯ |๙๖.๘๑| อิจฺเจว มจฺจา ปริเทวยนฺติ อทายิกา เปจฺจ ยมสฺส ฐายิโน เย เต วิริจฺจา อธิคมฺม โภเค น ภุญฺชเร นาปิ กโรนฺติ ปุญฺญํ ฯ |๙๖.๘๒| เต ขุปฺปิปาสุปคตา ปรตฺถ ปจฺฉา จิรํ ฌายิเร ฑยฺหมานา กมฺมานิ กตฺวาน ทุกฺขุทฺรยานิ อนุโภนฺติ ทุกฺขํ กฏุกปฺผลานิ ฯ |๙๖.๘๓| อิตฺตรํ หิ ธนธญฺญํ อิตฺตรํ อิธ ชีวิตํ อิตฺตรํ อิตฺตรโต ญตฺวา ทีปํ กยิราถ ปณฺฑิโต ฯ |๙๖.๘๔| เย เต เอวํ ปชานนฺติ นรา ธมฺมสฺส โกวิทา เต ทาเน นปฺปมชฺชนฺติ สุตฺวา อรหตํ วโจติ ฯ นาคเปตวตฺถุ เอกาทสมํ ฯ