๑๐. ยูถิกปุปผิยเถราปทาน (๒๐๐)

๒๐๒|๒๐๒.๕๓| ปทุมุตฺตโร นาม ชิโน อาหุตีนํ ปฏิคฺคโห ปวนา นิกฺขมิตฺวาน วิหารํ ยาติ จกฺขุมา ฯ |๒๐๒.๕๔| อุโภหตฺเถหิ ปคฺคยฺห ยูถิกํ ปุปฺผมุตฺตมํ พุทฺธสฺส อภิโรเปสึ เมตฺตจิตฺตสฺส ตาทิโน ฯ |๒๐๒.๕๕| เตน จิตฺตปฺปสาเทน อนุโภตฺวาน สมฺปทา กปฺปานํ สตสหสฺสํ ทุคฺคตึ นูปปชฺชหํ ฯ |๒๐๒.๕๖| อิโต ปญฺญาสกปฺเปสุ เอโก อาสิ ชนาธิโป สมิตนนฺทโน นาม จกฺกวตฺติ มหพฺพโล ฯ |๒๐๒.๕๗| ปฏิสมฺภิทา จตสฺโส วิโมกฺขาปิจ อฏฺฐิเม ฉฬภิญฺญา สจฺฉิกตา กตํ พุทฺธสฺส สาสนนฺติ ฯ อิตฺถํ สุทํ อายสฺมา ยูถิกปุปฺผิโย เถโร อิมา คาถาโย อภาสิตฺถาติ ฯ ยูถิกปุปฺผิยตฺเถรสฺส อปทานํ สมตฺตํ ฯ อุทฺทานํ ตมาลิ ติณสนฺถาโร ขณฺฑผุลฺลิ อโสกิโย องฺโกลโก กิสลโย ตินฺทุโก เนลปุปฺผิโย ติกณฺฑิโก จ ยูถิโก คาถา ปญฺญาส อฏฺฐ จ ฯ ตมาลปุปฺผิยวคฺโค วีสติโม ฯ อถ วคฺคุทฺทานํ ภิกฺขทายิ ปริวาโร เสเรยฺโย โสภิโต ตถา ฉตฺโต จ พนฺธุชีวิ จ สุปาริจริโยปิจ กุมุโท กุฏโช เจว ตมาลิ ทสโม กโต ฉ สตานิ จ คาถานํ ฉสฏฺฐิ จ ตตุตฺตริ ฯ ภิกฺขวคฺคทสกํ ทุติยสตกํ สมตฺตํ ฯ เอกวีสติโม กณิการปุปฺผิยวคฺโค