๑๐. กัปปรุกขิยเถราปทาน (๔๐)

๔๒|๔๒.๑๐๘| สิทฺธตฺถสฺส ภควโต ถูปเสฏฺฐสฺส สมฺมุขา วิจิตฺตทุสฺเส ลคฺเคตฺวา กปฺปรุกฺขํ ฐเปสหํ ฯ |๔๒.๑๐๙| ยํ ยํ โยนูปปชฺชามิ เทวตฺตํ อถ มานุสํ โสภยนฺโต มม ทฺวาเร กปฺปรุกฺโข ปติฏฺฐติ ฯ |๔๒.๑๑๐| อหญฺจ ปริสา เจว เย เกจิ สมวสฺสิกา ตมฺหา ทุสฺสํ คเหตฺวาน นิวาเสม มยํ ตทา ฯ |๔๒.๑๑๑| จตุนวุเต อิโต กปฺเป ยํ รุกฺขํ ฐปยึ อหํ ทุคฺคตึ นาภิชานามิ กปฺปรุกฺขสฺสิทํ ผลํ ฯ |๔๒.๑๑๒| อิโต จ สตฺตเม กปฺเป สุเจลา อฏฺฐ ขตฺติยา สตฺตรตนสมฺปนฺนา จกฺกวตฺตี มหพฺพลา ฯ |๔๒.๑๑๓| ปฏิสมฺภิทา จตสฺโส วิโมกฺขาปิจ อฏฺฐิเม ฉฬภิญฺญา สจฺฉิกตา กตํ พุทฺธสฺส สาสนนฺติ ฯ อิตฺถํ สุทํ อายสฺมา กปฺปรุกฺขิโย เถโร อิมา คาถาโย อภาสิตฺถาติ ฯ กปฺปรุกฺขิยตฺเถรสฺส อปทานํ สมตฺตํ ฯ อุทฺทานํ กุณฺฑสาคตกจฺจานา อุทายี ราชสวฺหโย อธิมุตฺโต ลสุณโท อายาตี ธมฺมจกฺกิโก กปฺปรุกฺขี จ ทสโม คาถาทฺวยํ ทสสตํปิจ ฯ กุณฺฑธานวคฺโค จตุตฺโถ ฯ