๕. กุมารเปตวัตถุ

๑๑๕|๑๑๕.๔๓๖| ๕ อจฺเฉรรูปํ สุคตสฺส ญาณํ สตฺถา ยถา ปุคฺคลํ พฺยากาสิ อุสฺสนฺนปุญฺญาปิ ภวนฺติ เหเก ปริตฺตปุญฺญาปิ ภวนฺติ เหเก ฯ |๑๑๕.๔๓๗| อยํ กุมาโร สีวถิกาย ฉฑฺฑิโต องฺคุฏฺฐเสฺนเหน ยาเปสิ รตฺตึ ฯ น ยกฺขภูตา น สิริสปา วา วิเหฐเยยฺยุํ กตปุญฺญกุมารํ |๑๑๕.๔๓๘| สุนขาปิ อิมสฺส ปลิหึสุ ปาเท ธงฺกา สิงฺคาลา ปริวตฺตยนฺติ ฯ คพฺภาสยํ ปกฺขิคณา หรนฺติ กากา ปน อกฺขิมลํ หรนฺติ |๑๑๕.๔๓๙| น อิมสฺส รกฺขํ วิทหึสุ เกจิ น โอสถํ สาสปธูปนํ วา ฯ นกฺขตฺตโยคํ ปน อุคฺคเหสุํ น สพฺพธญฺญานิปิ อากิรึสุ |๑๑๕.๔๔๐| เอตาทิสํ อุตฺตมกิจฺฉปตฺตํ รตฺตาภตํ สีวถิกาย ฉฑฺฑิตํ ฯ นวนีตปิณฺฑํ วิย เวธมานํ สสํสยํ ชีวิตสาวเสสํ |๑๑๕.๔๔๑| ตมทฺทส เทวมนุสฺสปูชิโต ทิสฺวา ปน พฺยากริ ภูริปญฺโญ อยํ กุมาโร นครสฺสิมสฺส อคฺคกุลิโก ภวิสฺสติ โภควา จ |๑๑๕.๔๔๒| กิสฺส วตํ กึ ปน พฺรหฺมจริยํ กิสฺส สุจิณฺณสฺส อยํ วิปาโก เอตาทิสํ พฺยสนํ ปาปุณิตฺวา ตํ ตาทิสํ ปจฺจนุโภสฺสติทฺธินฺติ ฯ |๑๑๕.๔๔๓| พุทฺธปฺปมุขสฺส ภิกฺขุสงฺฆสฺส ปูชํ อกาสิ ชนตา อุฬารํ ตตฺรสฺส จิตฺตสฺส อหุ อญฺญถตฺตํ วาจํ อภาสิ ผรุสํ อสพฺภํ |๑๑๕.๔๔๔| โส ตํ วิตกฺกํ ปฏิวิโนทยิตฺวา ปีติปสาทํ ปฏิลทฺธา ปจฺฉา ตถาคตํ เชตวเน วสนฺตํ ยาคุยา อุปฏฺฐาสิ โส สตฺตรตฺตํ ฯ |๑๑๕.๔๔๕| ตสฺส วตํ ตํ ปน พฺรหฺมจริยํ ตสฺส สุจิณฺณสฺส อยํ วิปาโก เอตาทิสํ พฺยสนํ ปาปุณิตฺวา ตํ ตาทิสํ ปจฺจนุโภสฺสติทฺธึ ฯ |๑๑๕.๔๔๖| ฐตฺวาน โส วสฺสสตํ อิเธว สพฺเพหิ กาเมหิ สมงฺคิภูโต กายสฺส เภทา อภิสมฺปรายํ สหพฺยตํ คจฺฉติ วาสวสฺสาติ ฯ กุมารเปตวตฺถุ ปญฺจมํ ฯ