๑๐. สมุคคชาดก

๑๒๙๒กุโต นุ อาคจฺฉถ โภ ตโย ชนา สฺวาคตา เอถ นิสีทถาสเน กจฺจิตฺถ โภนฺโต กุสลํ อนามยํ จิรสฺสมพฺภาคมนํ หิ โว อิธ ฯ

๑๒๙๓อหเมว เอโก อิธมชฺช ปตฺโต น จาปิ เม ทุติโย โกจิ วิชฺชติ กิเมว สนฺธาย เต ภาสิตํ อิเส กุโต นุ อาคจฺฉถ โภ ตโย ชนา ฯ

๑๒๙๔ตฺวญฺจ เอโก ภริยา จ เต ปิยา สมุคฺคปกฺขิตฺตนิกิณฺณมนฺตเร สา รกฺขิตา กุจฺฉิคตาว เต สทา วายุสฺส ปุตฺเตน สหา ตหึ รตา ฯ

๑๒๙๕สํวิคฺครูโป อิสินา พฺยากโต โส ทานโว ตตฺถ สมุคฺคมุคฺคิลิ อทฺทกฺขิ ภริยํ สุจิมาลธารินึ วายุสฺส ปุตฺเตน สหา ตหึ รตํ ฯ

๑๒๙๖สุทิฏฺฐรูปุคฺคตปานุวตฺตินา หีนา นรา เย ปมุทาวสงฺคตา ยถา หเว ปาณริเวตฺถ รกฺขิตา ทุฏฺฐา มยิ อญฺญมภิปฺปโมทติ ฯ

๑๒๙๗ทิวา จ รตฺโต จ มยา อุปฏฺฐิตา ตปสฺสินา โชติริวา วเน วสํ สา ธมฺมโมกฺกมฺม อธมฺมมาจริ อกฺรียรูโป ปมุทาหิ สนฺถโว ฯ

๑๒๙๘สรีรมชฺฌมฺหิ ฐิตาติ มญฺญิหํ มยฺหํ อยนฺติ อสตึ อสญฺญตํ สา ธมฺมโมกฺกมฺม อธมฺมมาจริ อกฺรียรูโป ปมุทาหิ สนฺถโว ฯ

๑๒๙๙สุรกฺขิตมฺเมติ กถนฺนุ วิสฺสเส อเนกจิตฺตาสุ น เหตฺถ รกฺขนา เอตา หิ ปาตาลปปาตสนฺนิภา ตตฺถ ปมตฺโต พฺยสนํ นิคจฺฉติ ฯ

๑๓๐๐ตสฺมา หิ เต สุขิโน วีตโสกา เย มาตุคาเมหิ จรนฺติ นิสฺสฏา เอตํ สิวํ อุตฺตมมาภิปตฺถยํ น มาตุคาเมหิ กเรยฺย สนฺถวนฺติ ฯ สมุคฺคชาตกํ ทสมํ ฯ ---------