๘. ตักการิยชาดก

๑๘๒๖อหเมว ทุพฺภาสิตํ ภาสิ พาโล เภโกวรญฺเญ อหิมวฺหายมาโน ตกฺการิเย โสพฺภมิมํ ปตามิ น กิเรว สาธุ อติเวลภาณี ฯ

๑๘๒๗ปปฺโปติ มจฺโจ อติเวลภาณี พนฺธํ วธํ โสกปริทฺทวญฺจ อตฺตานเมว ครหาสิ เอตฺถ อาจริย ตํ นิกฺขณนฺติ โสพฺเภ ฯ

๑๘๒๘กิเมวาหํ ตุณฺฑิลํ อนุปุจฺฉึ กเรยฺยาสํ ภาตรํ กาลิกาย นคฺโควหํ วตฺถยุคญฺจ ชิโน อยมฺปิ อตฺโถ พหุ ตาทิโสว ฯ

๑๘๒๙โย ยุชฺฌมานานํ อยุชฺฌมาโน เมณฺฑนฺตรํ อจฺจุปตี กุลิงฺโค โส ปึสิโต เมณฺฑสิเรหิ ตตฺถ อยมฺปิ อตฺโถ พหุ ตาทิโสว ฯ

๑๘๓๐จตุโร ชนา โปตฺถกมคฺคเหสุํ เอกญฺจ โปสํ อนุรกฺขมานา สพฺเพว เต ภินฺนสิรา สยึสุ อยมฺปิ อตฺโถ พหุ ตาทิโสว ฯ

๑๘๓๑อชา ยถา เวฬุคุมฺพสฺมึ พนฺธา อเวกฺขิปนฺตี อสิมชฺฌคจฺฉิ เตเนว ตสฺสา คลกํ วิกนฺตา อยมฺปิ อตฺโถ พหุ ตาทิโสว ฯ

๑๘๓๒นยิเม เทวา นาปิ คนฺธพฺพปุตฺตา มิคา อิเม อตฺถวสาภตา อิเม เอกญฺจ นํ สายมาเส ปจนฺตุ เอกํ ปุนปฺปาตราเส ปจนฺตุ ฯ

๑๘๓๓สตํ สหสฺสาน ทุพฺภาสิตานํ กลมฺปิ นาคฺฆติ สุภาสิตสฺส ทุพฺภาสิตํ สงฺกมาโน กิเลโส ตสฺมา ตุณฺหี กึปุริโส น พาลฺยา ฯ

๑๘๓๔ยา เมสา พฺยากาสิ ปมุญฺจเถตํ คิริญฺจ นํ หิมวนฺตํ นยนฺตุ อิมญฺจ โข เทนฺตุ มหานสาย ปาโตว นํ ปาตราเส ปจนฺตุ ฯ

๑๘๓๕ปชฺชุนฺนนาถา ปสโว ปสุนาถา อยํ ปชา ตฺวํนาโถสฺมิ มหาราช อมฺหนาถา มม ภริยา ทฺวินฺนมญฺญตรํ ญตฺวา มุตฺโต คจฺเฉยฺย ปพฺพตํ ฯ

๑๘๓๖น เว นินฺทา สุปริวชฺชยาถ นานาชนา เสวิตพฺพา ชนินฺท เยเนว เอโก ลภเต ปสํสํ เตเนว อญฺโญ ลภเต นินฺทิตารํ ฯ

๑๘๓๗สพฺโพ โลโก ปรจิตฺเตน อติจิตฺโต สพฺโพ โลโก จิตฺตวา สมฺหิ จิตฺเต ปจฺเจกจิตฺตา ปุถุ สพฺพสตฺตา กสฺสีธ จิตฺตสฺส วเส น วตฺเต ฯ

๑๘๓๘ตุณฺหี อหุ กึปุริโส สภริโย โยทานิ พฺยากาสิ ภยสฺส ภีโต โสทานิ มุตฺโต สุขิโต อโรโค วาจา กิเรวตฺถวตี นรานนฺติ ฯ ตกฺการิยชาตกํ อฏฺฐมํ ฯ ---------