๙. ตัจฉกสูกรชาดก

๑๙๗๕ยเทสมานา วิจริมฺหา ปพฺพตานิ วนานิ จ อเนฺวสํ วิปุเล ญาตี เตเม อธิคตา มยา ฯ พหุํ จิทํ มูลผลํ ภกฺโข จายํ อนปฺปโก รมฺมา จิมา คิรินชฺโช ผาสุวาโส ภวิสฺสติ ฯ อิเธวาหํ วสิสฺสามิ สห สพฺเพหิ ญาติภิ อปฺโปสฺสุกฺโก นิราสงฺกี อโสโก อกุโตภโย ฯ

๑๙๗๖อญฺญญฺหิ เลณํ ปริเยส สตฺตุ โน อิธ วิชฺชติ โส ตจฺฉ สูกเร หนฺติ อิธาคนฺตฺวา วรํ วรํ ฯ

๑๙๗๗โก นุมฺหากํ อิธ สตฺตุ โก ญาตี สุสมาคเต ทุปฺปธํเส ปธํเสติ ตํ เม อกฺขาหิ ปุจฺฉิโต ฯ

๑๙๗๘อุทฺธคฺคราชี มิคราชา พลี ทาฐาวุโธ มิโค โส ตจฺฉ สูกเร หนฺติ อิธาคนฺตฺวา วรํ วรํ ฯ

๑๙๗๙น โน ทาฐา น วิชฺชนฺติ พลํ กาเย สโมหิตํ สพฺเพ สมคฺคา หุตฺวาน วสํ กาหาม เอกกํ ฯ

๑๙๘๐หทยงฺคมํ กณฺณสุขํ วาจํ ภาสสิ ตจฺฉก โยปิ ยุทฺเธ ปาลเยถ ตํปิ ปจฺฉา หนามเส ฯ

๑๙๘๑ปาณาติปาตา วิรโต นุสชฺช อภยํ นุ เต สพฺพภูเตสุ ทินฺนํ ทาฐา นุ เต มิควิริย น สนฺติ โย สงฺฆปตฺโต กปโณว ฌายสิ ฯ

๑๙๘๒น เม ทาฐา น วิชฺชนฺติ พลํ กาเย สโมหิตํ ญาตี จ ทิสฺวาน สมงฺคิ เอกโต ตสฺมา จ ฌายามิ วนมฺหิ เอกโก ฯ อิมสฺสุทํ ยนฺติ ทิสาทิสํ ปุเร ภยฏฺฏิตา เลณคเวสิโน ปุถู เตทานิ สงฺคมฺม วสนฺติ เอกโต ยตฺถฏฺฐิตา ทุปฺปสหชฺช เต มยา ปริณายกสมฺปนฺนา สหิตา เอกวาทิโน เต มํ สมคฺคา หึเสยฺยุํ ตสฺมา เนสํ น ปตฺถเย ฯ

๑๙๘๓เอโกว อินฺโท อสุเร ชินาติ เอโกว เสโน หนฺติ ทิเช ปสยฺห เอโกว พฺยคฺโฆ มิคสงฺฆปตฺโต วรํ วรํ หนฺติ พลญฺหิ ตาทิสํ ฯ

๑๙๘๔นเหว อินฺโท น เสโน นปิ พฺยคฺโฆ มิคาธิโป สมคฺเค สหิเต ญาตี พฺยคฺโฆ น กุรุเต วเส ฯ

๑๙๘๕กุมฺภิลกา สกุณิกา สงฺฆิโน คณจาริโน สมฺโมทมานา เอกชฺฌํ อุปฺปตนฺติ อุยฺยนฺติ จ ฯ เตสญฺจ ฑิยมานานํ เอเกตฺถ อปสกฺกติ ตญฺจ เสโน นิตาเลติ เวยฺยคฺฆิเยว สา คติ ฯ

๑๙๘๖อุสฺสาหิโต ชฏิเลน ลุทฺเทนามิสจกฺขุนา ทาฐี ทาฐีสุ ปกฺขนฺทิ มญฺญมาโน ยถา ปุเร ฯ

๑๙๘๗สาธุ สมฺพหุลา ญาตี อปิ รุกฺขา อรญฺญชา สูกเรหิ สมคฺเคหิ พฺยคฺโฆ เอกายเน หโต ฯ

๑๙๘๘พฺราหฺมณญฺเจว พฺยคฺฆญฺจ อุโภ หนฺตฺวาน สูกรา อานนฺทิโน ปโมทิตา มหานาทมนาทิสุํ ฯ

๑๙๘๙เต สุทุมฺพรมูลสฺมึ สูกรา สุสมาคตา ตจฺฉกํ อภิสิญฺจึสุ ตฺวํ โน ราชาสิ อิสฺสโรติ ฯ ตจฺฉสูกรชาตกํ นวมํ ฯ ---------