๙. สมาทปกเถราปทาน (๑๖๙)

๑๗๑|๑๗๑.๔๔| พนฺธุมติยา นคเร มหาปูคคโณ อหุ เตสาหํ ปวโร อาสึ มม ปฏฺฐจรา ว เต ฯ |๑๗๑.๔๕| เต สพฺเพ สนฺนิปาเตตฺวา ปุญฺญกมฺเม สมาทยึ มาฬํ กริสฺสาม สงฺฆสฺส ปุญฺญกฺเขตฺตมนุตฺตรํ ฯ |๑๗๑.๔๖| สาธูติ เต ปฏิสฺสุตฺวา มม ฉนฺทวสานุคา นิฏฺฐาเปตฺวาว ตํ มาฬํ วิปสฺสิสฺส อทมฺหเส ฯ |๑๗๑.๔๗| เอกนวุเต อิโต กปฺเป ยํ มาฬมททึ ตทา ทุคฺคตึ นาภิชานามิ มาฬทานสฺสิทํ ผลํ ฯ |๑๗๑.๔๘| เอกูนสฏฺฐิกปฺปมฺหิ เอโก อาสิ ชนาธิโป อาเวโล นาม นาเมน จกฺกวตฺติ มหพฺพโล ฯ |๑๗๑.๔๙| ปฏิสมฺภิทา จตสฺโส วิโมกฺขาปิจ อฏฺฐิเม ฉฬภิญฺญา สจฺฉิกตา กตํ พุทฺธสฺส สาสนนฺติ ฯ อิตฺถํ สุทํ อายสฺมา สมาทปโก เถโร อิมา คาถาโย อภาสิตฺถาติ ฯ สมาทปกตฺเถรสฺส อปทานํ สมตฺตํ ฯ