๕. วิฬาลิทายกเถราปทาน (๒๖๕)

๒๖๗|๒๖๗.๑๘| หิมวนฺตสฺส อวิทูเร โรมโส นาม ปพฺพโต ตมฺหิ ปพฺพตปาทมฺหิ สมโณ ภาวิตินฺทฺริโย ฯ |๒๖๗.๑๙| วิฬาลิโย คเหตฺวาน สมณสฺส อทาสหํ อนุโมทิ มหาวีโร สยมฺภู อปราชิโต ฯ |๒๖๗.๒๐| วิฬาลิ เต มม ทินฺนา วิปฺปสนฺเนน เจตสา ภเว นิพฺพตฺตมานมฺหิ ผลํ นิพฺพตฺตตํ ตว ฯ |๒๖๗.๒๑| จตุนวุเต อิโต กปฺเป ยํ วิฬาลิมทาสหํ ทุคฺคตึ นาภิชานามิ วิฬาลิยา อิทํ ผลํ ฯ |๒๖๗.๒๒| ปฏิสมฺภิทา จตสฺโส วิโมกฺขาปิจ อฏฺฐิเม ฉฬภิญฺญา สจฺฉิกตา กตํ พุทฺธสฺส สาสนนฺติ ฯ อิตฺถํ สุทํ อายสฺมา วิฬาลิทายโก เถโร อิมา คาถาโย อภาสิตฺถาติ ฯ วิฬาลิทายกตฺเถรสฺส อปทานํ สมตฺตํ ฯ